ƆKƆNDƆ 31

Mɔsɛ la Arɔna wambɛnana la Farawɔ

ETENA kakakalola Mɔsɛ l’Edjibito nde akatɛ Arɔna w’ɔnango akambo tshɛ w’endana l’ahindo. Ndo etena kakɛnya Mɔsɛ nde la Arɔna Ase Isariyɛlɛ ahindo akɔ, vɔ waketawɔ dia Jehowa aki lawɔ.

Ko Mɔsɛ la Arɔna wakatshu dia tɛnana la Farawɔ. Vɔ wakawotɛ vɔate: ‘Jehowa Nzambi k’Isariyɛlɛ kata ate: “Tshika anto ami watshu nshi shato, kele watɔtɛmɔlɛ l’oswe wa shɛnga.” ’ Ko Farawɔ akâkadimola ate: ‘Dimi haleye Jehowa. Ndo halakimɔ Ase Isariyɛlɛ dia vɔ ntshɔ.’

Farawɔ akômala nɛ dia anto wakalange mbetsha wenya w’olimu dia tɔtɛmɔla Jehowa. Omalɔkɔ nde akâkandja olimu wakaleke wolo nto. Ase Isariyɛlɛ wakatshumula Mɔsɛ lo woho wa pâ kɛnɛ kamboyoleka ka ntondo, ndo Mɔsɛ akanyange efula. Koko Jehowa akawotɛ di’aha nde nyanga. Jehowa akate ate: ‘Dimi layosala tshɛ dia Farawɔ tshika wodja ami dia vɔ ntshɔ.’

Mɔsɛ la Arɔna wakatshu dia tɛnana la Farawɔ nto. Mbala kɛnɛ vɔ wambotosalɛ dihindo dimɔtshi. Arɔna akakasha danga diande la kɛtɛ, ko diɔ diakahilɔ shaka y’olui. Ko ase timba waki Farawɔ wakakasha ndo vɔ lawɔ alanga awɔ la kɛtɛ ko wakahilɔ elui. Koko ohênda! Olui w’Arɔna wekɔ lo mɛna elui w’ase timba. Ndo mbala kɛnɛ Farawɔ konanga tshika Ase Isariyɛlɛ dia vɔ ntshɔ. Omalɔkɔ, etena kakakoke ka Jehowa nembetshiya Farawɔ ênde. Onde wɛ mbeyaka kɛnɛ kakandasale? Nde akêla asui dikumi l’Edjibito.

L’ɔkɔngɔ w’efula ka l’atei w’asui asɔ, Farawɔ akelɛka Mɔsɛ ndo akawotɛka ate: ‘Nyonya sui ko Dimi layokimɔ Isariyɛlɛ dia vɔ ntshɔ.’ Koko etena kakashilaka sui, Farawɔ akakeketshaka otema nto. Nde konanga kimɔ wodja dia vɔ ntshɔ. Koko, l’ɔkɔngɔ wa sui dia dikumi, Farawɔ akatshike Ase Isariyɛlɛ dia vɔ ntshɔ.

Onde wɛ mbeyaka sui la sui lo wakɔ 10 tshɛ? Fola dikatshi kele towaweye tshɛ.

Etumbelu 4:​27-31; 5:​1-23; 6:​1-13, 26-30; 7:​1-13.