Yeso ambɔkɔnɔla onto lushi la Sabato

Afarisɛ wakahetshaka Yeso ndo wakalange nkondja ɔkɔkɔ wa mbowonda. Vɔ wakate dia nde hahombe nkɔnɔla anto waki la hemɔ lushi la Sabato. Lushi la Sabato lɔmɔtshi, Yeso akatane kanga tshungu ɔmɔtshi alɔmbana diangɔ l’otadimbo. Nde akatɛ ambeki ande ate: ‘Nyende woho wayokimanyiya wolo wa Nzambi pami kɛnɛ.’ Yeso akasɔhanya nsɔyi yande la ditshu, ko akamame lo washo wa pami kakɔ. Yeso akawotɛ ate: ‘Tshɔka tosole washo ayɛ l’oduwa wa Silɔama.’ Pami kakɔ akasale dui sɔ, ko mbala ka ntondo lo lɔsɛnɔ lande nde akakoke mɛna.

Anto wakaambe. Vɔ wakate vate: ‘Shi pami kɛnɛ mbakadjasɛka ndo mbakalɔmbanaka diangɔ, kana ekɔ onto ɔmɔtshi lafɔna la nde?’ Pami kakɔ akate ate: ‘Dimi mbakotɔ tshungu!’ Anto wakawombola vate: ‘Ko lande na kayayɛ bu tshungu?’ Lam’akandawatɛ kɛnɛ kakete, vɔ wakɔtɔlɛ le Afarisɛ.

Pami kakɔ akatɛ Afarisɛ ate: ‘Yeso akamami lɔtɛkɛ lo washo ami ndo akambute dia dimi ntshɔ ndo tosola washo. Kɛsɔ mbakamasadi ndo kakianɛ lambokoka mɛna.’ Afarisɛ wakate vate: ‘Naka Yeso kɔnɔlaka lushi la Sabato, kete wolo ande hawoye oma le Nzambi.’ Koko akina wakate vate: ‘Naka wolo ande hawoye oma le Nzambi, nde hakoke monga l’akoka wa nkɔnɔla.’

Afarisɛ wakete ambutshi wa pami kakɔ ndo wakawambola vate: ‘Ngande wokoka ɔnanyu mɛna kakianɛ?’ Ambutshi ande waki la wɔma, nɛ dia Afarisɛ wakate vate, onto tshɛ layonga la mbetawɔ le Yeso, ayotshanyema oma lo shinangɔnga. Ɔnkɔnɛ, vɔ wakate vate: ‘Sho hateye. Nyowombole ndamɛ.’ Afarisɛ wakanyomombola pami kakɔ ambola akina polo lo nde mbuta ate: ‘Dimi lakanyote kɛnɛ tshɛ keyami. Lande na katetemalanyu mbokami ambola?’ Afarisɛ wakomala ndo wakotondja.

Yeso akatshu le pami kakɔ ndo akawombola ate: ‘Onde wɛ ekɔ la mbetawɔ le Mɛsiya?’ Pami kakɔ akate ate: ‘Layonga la mbetawɔ naka dimi mboweya.’ Yeso akate ate: ‘Dimi kele Mɛsiya.’ Nshi kɛsɔ mɛnyaka dia Yeso aki onto ɔlɔlɔ? Nde kɔkɔnɔla tsho pami kɛsɔ, koko akokimanyiya dia nde monga la mbetawɔ.