Yeso ambondama

Yeso la apɔstɔlɔ wakete l’Okidi wa Kidirɔna dia mbidɛ lo Dikona di’esongo w’Ɔlivɛ. Laasɔ ko midi k’otsho ambeta ndo ngɔndɔ kaki emuma. Lam’akawakome l’ekambɔ ka Ngɛtɛsɛmanɛ, Yeso akawatɛ ate: “Nyotshikale lanɛ ndo nyɔsɛnake.” Ko Yeso akangana yema l’ekambɔ ndo akakusɛ adwe. La lɔkɔnyɔ l’efula laki la nde, nde akalɔmbɛ Jehowa ate: “Lolango layɛ lasaleme.” Ko Jehowa akatome ondjelo dia ndjokeketsha Yeso. Lam’akakalola Yeso le apɔstɔlɔ, nde akatane asato wa l’atei awɔ woladi. Nde akate ate: ‘Nyemɔ! Ɔnɛ bu etena ka ndala djɔ! Etena kambokoka ka dimi kimɔma l’anya w’atunyi ami.’

Kem’edja Judasɛ akakome, ayalɔmbɔla olui a woke w’anto waki la tokuwa ta ta ndo l’ekalemba. Nde akeyaka dihole diakandakoke ntana Yeso nɛ dia wakatshɔka mbala efula l’ekambɔ kɛsɔ. Judasɛ akatɛ asɔlayi dia nde ayowaɛnya Yeso. Nde akatshu mbala kakɔ ɔtɔi otsha le Yeso ndo akate ate: ‘He mɔyɔ Ombetsha,’ ko akawosha bizɛ. Yeso akate ate: ‘Judasɛ, wɛ ambofunga la bizɛ?’

Yeso akasɛmɛ otsha la ntondo ndo akambola olui w’anto akɔ ate: “Onto akɔna ayanganyu?” Vɔ wakate vate: “Yeso y’ose Nazarɛtɛ.” Ko nde akakadimola ate: “Dimi ɔnɛ,” ko apami akɔ wakakalola ɛkɔngɔkɔngɔ ko wakakɔ la nkɛtɛ. Yeso akambola olui akɔ nto ate: “Onto akɔna ayanganyu?” Vɔ wakakadimola nto vate: “Yeso y’ose Nazarɛtɛ.” Yeso akakadimola ate: ‘Lakanyote dia dimi ɔnɛ. Nyotshike apami anɛ watshu.’

Lam’akashihodia Petero kɛnɛ kaketaka, nde akasɔmɔla lokuwa la ta ndo akahembola toyi dia Malakosɛ okambi ɔmɔtshi w’ɔlɔmbɛdi a laadiko. Koko Yeso akɔshi toyi dia pami kakɔ ko akɔkɔnɔla. Ko nde akatɛ Petero ate: ‘Kaloya lokuwa layɛ la ta. Naka wɛ ndɔ la lokuwa la ta, kete wɛ ayodiakema la lokuwa la ta.’ Asɔlayi wakande Yeso wakokeleka anya ko apɔstɔlɔ wakalawɔ. Oma laasɔ, olui w’anto wakatshu la nde le Anasi owandji w’ɛlɔmbɛdi. Anasi akasandja Yeso ko akotome lo luudu laki Kayifasi Ɔlɔmbɛdi a Laadiko. Ko kakɔna kakakomɛ apɔstɔlɔ?