Ngɔndɔ ka samalo

Jɔbɔ aki la diɔtɔnganelo dia ma ma la Jehowa. Nde aki la nkumbo ka woke, kaki kaamɛ ndo nde aki l’ɔngɔnyi efula. (Jɔbɔ 1:​1-5) Koko Jɔbɔ akashisha suke l’ɛngɔ tshɛ kaki lande lushi ɔtɔi loto. Ntondotondo, nde akashisha nyama yande. (Jɔbɔ 1:​13-17) Ko, anande tshɛ wakandokaka ngandji efula wakavu. Ohokanyiya lɔkɔnyɔ, ɔkɛyi ndo paa kaki la Jɔbɔ nde la wadɛnde lam’akaweye di’anawɔ tshɛ dikumi wambovɔ. Aha la taamu Jɔbɔ akatshatsha ahɔndɔ ande etena kakandalelaka ndo akayakɔsha la nkɛtɛ! (Jɔbɔ 1:​18-20) Ndo nto, Satana akatatsha Jɔbɔ hemɔ ka wolo efula ndo akoshishɛ kɛnɛmɔ kande. (Jɔbɔ 2:​6-8) Koko, Jɔbɔ akalɛmiyamaka efula oma le anto wa lo tshunda diande. Anto wakayaka ndjoyanga alako le nde. (Jɔbɔ 31:18) Kakianɛ anto wowewewɔ. Anango, angɛnyi ande wa ma ma ndo kaanga ekambi ande wakayowotona!—Jɔbɔ 19:​13, 14, 16. w22.06 21 od. 5-6

L’ɔkɔngɔ wa batisimu, sho tshɛ pombaka ndjela dako diakasha ɔpɔstɔlɔ Pɔɔlɔ Akristo wa l’Ɛfɛsɔ. Nde akaakeketsha dia nkoma Akristo “wambotshunda.” (Ɛf. 4:13) Kɛsɔ akalembetshiyaka dia vɔ wakahombe ‘ntetemala mpama lo nyuma.’ Wɛ amboshilaka mboka Jehowa ngandji k’efula. Koko ngandji kawokayɛ koka nyomofula. Lo ngande? Ɔpɔstɔlɔ Pɔɔlɔ shilaka yoho mɔ yofundami lo Filipɛ 1: 9. Pɔɔlɔ akalɔmbɛ dia ngandji k’ase Filipɛ ‘ntetemala mfula.’ Ɔnkɔnɛ, sho kokaka mfudia ngandji kaso. Sho kokaka nsala dui sɔ lo monga la “ewo k’oshika ndo la shɛnɔdi tshɛ.” Lam’ayototalekaka mbeya Jehowa mbayotalekaka mfula ngandji kawokaso ndo mbayototalekaka nshihodia lonto lande ndo yoho yasalande akambo. Sho mongaka la nsaki k’efula ka mbɔngɛnyangɛnya ndo hatokombola pondjo mbonyangiya. Sho salaka la wolo dia nshihodia ele lolango lande ndo woho wakokaso lisala. w22.08 2-3 od. 3-4

Kɛnɛ kofundami lo dibuku sɔ hendana l’anto lo tshɛ kawɔ, koko tɔ mendanaka la so, sho ekambi wa Nzambi wakayakimɔ le nde. Oko weso ekambi wa Nzambi, sho hatambe dia mbishola dia tekɔ lo mbisha lonya l’okotshamelo wa prɔfɛsiya yatanema lo dibuku dia diambo sɔ. Ɔpɔstɔlɔ Joani laki aya osombe akɛnya etena kakahombe kotshama prɔfɛsiya shɔ. Nde akate ate: “Lo wolo wa nyuma dimi kakatanema lo lushi la Nkumadiɔndjɔ.” (Ɛny. 1:10) Etena kakafunde Joani ɛtɛkɛta ɛsɔ oya lo 96 T.D., ko “lushi la Nkumadiɔndjɔ” laki leke etale. (Mat. 25:​14, 19; Luka 19:12) Koko lo ndjela prɔfɛsiya ya lo Bible, lushi lɔsɔ lakatatɛ lo 1914 etena kakonge Yeso Nkumekanga l’olongo. Ntatɛ oma l’ɔnɔnyi ɔsɔ, prɔfɛsiya ya l’Ɛnyɛlɔ, yendana l’ekambi wa Nzambi yakatatɛ kotshama. Eelo, tekɔ lo nsɛna kakianɛ lo “lushi la Nkumadiɔndjɔ”!—Ɛny. 1:3. w22.05 2 od. 2-3

Etena kakiwɔ weke la lɔsɛnɔ, vɔ akɔ 2 wakakashema lo oduwa wa dja yahɛta la mbɔkɔ ya dja. Ɔnkɔnɛ, kaanga mbakayatetemala nɔmbɔla, mandji ya pɔlitikɛ shɔ yele atunyi wa Nzambi yayolanyema pondjo pondjo. Kakɔna kalembetshiya dui sɔ le so? Oko Akristo, sho pombaka monga la kɔlamelo le Nzambi ndo le Diolelo diande. (Jni. 18:36) Sho pombaka ntshikala la lomangemange l’awui wa pɔlitikɛ wa l’andja ɔnɛ. Ekɔ okakatanu efula dia monga la lomangemange la ngasɔ, nɛ dia mandji ya l’andja ɔnɛ tɔlɔmbaka dia sho mbasukɛ oma l’ɛtɛkɛta ndo lo kɛnɛ kasalaso. Wanɛ wakɔ lo tɔsɛngiya tawɔ nongolaka djembetelo ya nyama ka ngala. (Ɛny. 13:​16, 17) Koko, onto tshɛ lalongola djembetelo shɔ hetawɔma le Jehowa ndo ayoshisha lɔsɛnɔ la pondjo. (Ɛny. 14:​9, 10; 20:4) Diakɔ diele, ekɔ ohomba onto tshɛ l’atei aso ntshikala la lomangemange tshɛ lo tshɛ, oyadi woho akɔna wayowɔsɛngiya mandji ya l’andja ɔnɛ dia mbasukɛ! w22.05 10-11 od. 12-13

Oyango ɔmɔ wakokayɛ ndjadjɛ ele mbeka dia monga la dikoka dimɔ di’ohomba efula. Naka sho mpamia akoka aso, kete tayoleka monga l’akoka wa mɛmba ɛkɛndɛ ekina. Ohokanyiya woho wewɔ l’ohomba w’akambi efula w’olimu dia mbika mvudu ya Bɛtɛlɛ, Mbalasa ya nsanganya ya weke ndo ya Diolelo. Efula k’akambi w’olimu asɔ wakeke dia monga l’akoka wele la wɔ lo nkamba kaamɛ l’anangɛwɔ l’akadiyɛwɔ wele la diewo. Ɛlɔ kɛnɛ, anangɛso l’akadiyɛso wekɔ lo mbeka dia monga l’akoka w’ohomba wakoka mbakimanyiya dia nɔngɔsɔla Mbalasa ya nsanganya ya weke ndo Mbalasa ya Diolelo. Lo toho tɔsɔ ndo tokina, Jehowa Nzambi “Nkumekanga ka pondjo,” ndo Yeso Kristo “Nkumekanga ka . . . nkumi ya dikanga,” wekɔ lo nkotsha awui wa diambo lo tshimbo y’akambi w’olimu wele l’akoka. (1 Tim. 1:17; 6:15) Sho nangaka nkamba olimu wa wolo ndo nkamba l’akoka aso dia ntombola Jehowa, koko aha ndjatombola.—Jni. 8:54. w22.04 24 od. 7; 25 od. 11

Sɔlɔmɔna aki l’ɔngɔnyi wa mamba ndo la mvudu y’amɛna efula. (1 Nku. 10:​7, 14, 15) Yeso lo wedi ande, aki la diangɔ yema tshitshɛ ndo komonga la luudu. (Mat. 8:20) Koko, apami akɔ ahende waki la kanyi yele la wɛdimo lo dikambo dia lomombo la l’emunyi nɛ dia lomba lawɔ lakaye oma lo Kiɔkɔ yaamɛ, mbuta ate oma le Jehowa Nzambi. Sɔlɔmɔna akeyaka dia naka tekɔ la falanga, kete sho koka nkondja diangɔ dimɔ dieso l’ohomba ndo diangɔ dimɔ dialangaso. Koko, kaanga mbakinde ɔngɔnyi efula, Sɔlɔmɔna akashihodia ɔnɛ ekɔ diangɔ efula dioleki falanga ohomba. Ɛnyɛlɔ, nde akafunde ate: “Lokombo l’ɔlɔlɔ [kana “lokumu l’ɔlɔlɔ,” lo ndjela nɔtɛ.] kahomba sɔnama lo dihole dia ɔngɔnyi w’efula.” (Tok. 22:1) Sɔlɔmɔna akɛnyi nto dia anto wele la ngandji ka falanga, hawoleke ngɛnangɛna la kɛnɛ kele la wɔ. (Ond. 5:​10, 12) Ndo nde akatɔhɛmɔla dia hatohombe ndjaɛkɛ tshɛ lo falanga, nɛ dia oyadi falanga ya ngande yele la so, yɔ koka nshishɔ lo kamula ka sso.—Tok. 23:​4, 5. w22.05 21 od. 4-5

Etena kakanaso yimba l’ɛtshɔkɔ aso wa nshi nyɛ, sho keketshaka diɔtɔnganelo diasaso la Jehowa. Ndo nkana yimba l’ɛtshɔkɔ watolaka Jehowa lo nshi yayaye, ayotokimanyiya dia sho ntetemala nama elongamelo ka mbokambɛ pondjo pondjo. Akambo asɔ tshɛ wayotokimanyiya dia sho ntetemala kambɛ Jehowa l’ɔngɛnɔngɛnɔ oma ko kakianɛ. Jehowa “ayemala” lo wedi aso etena kayondolanya andja ɔnɛ wa kɔlɔ. Tekɔ l’eshikikelo dia Jehowa lele “Nzambi ka losembwe” hotshimbatshimba dia ndanya andja wa Satana l’etena kahombama. (Isa. 25:9) Tekɔ lo nkongɛ le Jehowa la solo dia lotutsha tshɛ dia lushi l’etshungwelo lɔsɔ koka. Lam’akatakonge lushi lɔsɔ, nyɛsɔ toyashikikɛ dia ntetemala nkukutɛ diɛsɛ diele laso dia nɔmba, mbadia ndo nkamba l’Ɔtɛkɛta wa Nzambi ndo nkana yimba l’ɛtshɔkɔ aso. Naka sho nsala ngasɔ, kete Jehowa ayotokimanyiya dia mbikikɛ l’ɔngɛnɔngɛnɔ l’ɔtɛmwɛlɔ aso otsha le nde. w22.11 13 od. 18-19

Kaanga mbele Bible hatɛkɛta dia batisimu ka Timɔte, bu wolo nkanyiya ɔngɛnɔngɛnɔ ndo woho wakayaoke Eyunikɛ wa nyango lushi lɔsɔ. (Tok. 23:25) Akatondoya okakatanu wendana la mbetsha ɔnande dia mboka Jehowa nde l’Ɔnande Yeso Kristo ngandji. Timɔte akodiama lo nkumbo kakatɔna l’awui w’ɔtɛmwɛlɔ. She aki ose Ngirika ndo nyango la tshɛnde ka womoto waki ase Juda. (Ets. 16:1) Timɔte aki ondo l’ɛnɔnyi dikumi l’ɛmɔ etena kaketawɔ Eyunikɛ la Lɔyisɛ akambo wa mɛtɛ. Koko, papa kande kokoma Okristo. Ko mboka kakɔna kakahombe Timɔte ndjela? L’ɛnyɛlɔ ka Eyunikɛ, ɛlɔ kɛnɛ ambutshi wa wamato w’Akristo nangaka nkumbo yawɔ. Oleki ɛngɔ kakɔna tshɛ, vɔ nangaka nkimanyiya anawɔ dia monga la diɔtɔnganelo dia dimɛna la Jehowa. Ndo Nzambi kaso mbɔsaka welo wadjawɔ la nɛmɔ di’efula. (Tok. 1:​8, 9) Jehowa ambokimanyiya ambutshi wa wamato efula dia vɔ nkimanyiya anawɔ dia mbetawɔ akambo wa mɛtɛ. w22.04 16 od. 1-3

Koko keem’edja, Jehowa ayodja l’etema wa mandji ya pɔlitikɛ, kanyi ya vɔ “nkotsha kanyi yande.” Etombelo akɔna wayonga la dui sɔ? Mandji ya pɔlitikɛ shɔ, mbuta ate “nkumi ya dikanga 10,” yayokadimwɛ atshunda w’ɛtɛmwɛlɔ wa kashi ndo yayowalanya. (Ɛny. 17:​1, 2, 12, 16) Ngande weyaso di’ekomelo ka Babilɔna ka Woke kaya suke? Dia nkadimola lo dimbola sɔ, ekɔ ohomba efula sho mbohɔka di’aha osomba w’otondo wa Babilɔna k’edjedja mbakakokamɛka l’ɔkɛdi wa woke wa Efaratɛ. Dibuku di’Ɛnyɛlɔ mbɛdikaka miliyɔ ya wanɛ wasukɛ Babilɔna ka Woke la “ashi” washa ekokelo. (Ɛny. 17:15) Koko diɔ mɛnyaka nto di’ashi asɔ wakahombe ‘monyama,’ lo mɛnya dia tshunda di’ɛtɛmwɛlɔ wa kashi wa l’andja w’otondo diayoshisha anto efula wadisukɛ. (Ɛny. 16:12) Ɛlɔ kɛnɛ, prɔfɛsiya kɛsɔ kekɔ lo kotshama nɛ di’anto efula hawoyoyasha l’awui w’ɔtɛmwɛlɔ wa kashi ndo vɔ woyanga okandwelo w’ekakatanu awɔ l’ahole akina. w22.07 5-6 od. 14-15

Etena kadimanyiyaso anto, sho mɛnyaka dia tekɔ la lowando lo kɛtshi ka Jehowa. Lo wɛɛla ande ɔmɔ, Yeso akɛdika Jehowa la owandji ɔmɔ wakakimwɛ ose olimu ande ɔmɔ dibasa dia woke diakinde kokoka mfuta. Koko, ose olimu ɔsɔ komboka ose olimu waki la dibasa diande dia falanga yema tshitshɛ kɛtshi. (Mat. 18:​23-35) Wetshelo akɔna wakalange Yeso tosha? Naka tekɔ la lowando lo kɛtshi k’efula katoka Jehowa, kete tayotshutshuyama dia dimanyiya anto akina. (Os. 103:9) Ambeta ɛnɔnyi efula wele Tshoto y’Etangelo mɔ yakate lo dikambo sɔ ɔnɛ: “Oyadi mbala ngana yayotodimanyiya asekaso anto, dui sɔ hɛdimaki pondjo la woke woke w’edimanyielo ndo wa kɛtshi katoka Nzambi lo tshimbo ya Kristo.” Wanɛ wadimanyiya anto kɔlɔ yawɔ wayodimanyiyama ndo vɔ lawɔ. Jehowa ekɔ la kɛtshi otsha le wanɛ wokana kɛtshi. (Mat. 5:7) Yeso akɛnya dui sɔ hwe etena kakandetsha ambeki ande woho wa nɔmbaka.—Mat. 6:​14, 15. w22.06 10 od. 8-9

Yeso akaye la nkɛtɛ oko onto. Nde akakɛnɛmɔla lonto la She lo yoho ya kokele. (Jni. 14:9) Lo tshimbo yande mbambotokoma dia mbeya ndo nanga Jehowa Nzambi. Sho kondjaka wahɔ nto oma lo wetshelo wa Yeso ndo oma l’ɛlɔmbwɛlɔ kashande etshumanelo k’Akristo ɛlɔ kɛnɛ. Nde tetshaka dia nsɛna lo yoho yayotokimanyiya dia mbetawɔma le Jehowa. Ndo sho tshɛ koka nkondja wahɔ oma lo nyɔi ka Yeso. Etena kakolɔma Yeso, nde akakimɔ nɛmɔ dia dikila diande oko olambo wa kokele “[wa]tɛdia oma lo pɛkato tshɛ.”(1 Jni. 1:7) Kakianɛ, nde aya Nkumekanga kahavɔki nto pondjo. Keema edja, Yeso ayanga minola oluyi l’ɔtɛ (Eta. 3:15) Ɔsɔ ayonga mɛtɛ dui dia dimɛna efula le anto w’ɛlɔlɔ etena kayoshila diakema Satana! La ntondo ka etena kɛsɔ nkoka, tohekɔkɛ. Nzambi kaso ekɔ Nzambi kasungana mbɛkɛ otema. Nde ayosha “wedja tshɛ wa la nkɛtɛ” etshɔkɔ waheyama mbadia. w22.07 18 od. 13; 19 od. 19

Sho pombaka ntshikitanya kanyi etena kayadjɛso eyango. Lande na? Nɛ dia akambo koka ntshikitana. Tɔshi ɛnyɛlɔ: Ɔpɔstɔlɔ Pɔɔlɔ akakondja ekimanyielo dia nkenga etshumanelo kɛmɔ k’oyoyo l’osomba wa Tɛsalɔnika. Koko andɔshi wakatshutshuya Pɔɔlɔ dia mimɔ oma l’osomba ɔsɔ. (Ets. 17:​1-5, 10) Otondonga Pɔɔlɔ akatshikala lɛkɔ, nde otodja nsɛnɔ y’anango lo waale. Koko Pɔɔlɔ kopekɔ. Nde akayaɔtɔnganyiya l’etshikitanu ɛsɔ. L’ɔkɔngɔ diko, nde akatome Timɔte dia tokotshɛ ambetawudi asɔ w’eyoyo wa la Tɛsalɔnika ehomba awɔ wa lo nyuma. (1 Tɛs. 3:​1, 2) Ande ɔngɛnɔngɛnɔ wakahombe monga l’ase Tɛsalɔnika asɔ l’ɔtɛ wakonge Timɔte suke dia tokamba lɛnɛ tshɛ akiwɔ l’ohomba ande lee! Sho koka nkondja wetshelo oma lo kɛnɛ kakakomɛ Pɔɔlɔ la Tɛsalɔnika. Sho mbeyaka ndjadjɛ oyango wa nkotsha ɔkɛndɛ ɔmɔ w’olimu, koko awui wele la so koka ntshikitana ndo todjɛ wekamu diaha sho nkotsha oyango akɔ. (Ond. 9:11) Naka ngasɔ mbediɔ le yɛ, kete onga suke dia ndjadjɛ oyango okina wakokayɛ nkotsha. w22.04 25-26 od. 14-15

Jehowa tokeketshaka lo tosha elongamelo ka lo nshi yayaye. Tɔsɛdingole tokanyi tɔmɔ ta lo Bible takoka tokeketsha etena kadiɛnɛso l’ehemba. L’Afundelo, Jehowa toshikikɛka dia ndooko ɛngɔ, mbidja ndo ehemba wa wolo wakoka “tokakitola la ngandji kande.” (Rɔmɔ 8:​38, 39) Nde toshikikɛka nto dia “nde ekɔ suke la wanɛ tshɛ wawelɛ” lo dɔmbɛlɔ. (Os. 145:18) Jehowa totɛka dia naka sho ndjaɛkɛ le nde, kete tayokikɛ oseka ohemba tshɛ ndo monga l’ɔngɛnɔngɛnɔ kaanga etena kasowaso. (1 Kɔr. 10:13; Jak. 1:2) Ɔtɛkɛta wa Nzambi toholaka nto di’ehemba aso wekɔ wa lo tshanda mɔ tsho lo mbɛdika la difuto diatolakande dia lɔsɛnɔ la pondjo. (2 Kɔr. 4:​16-18) Jehowa toshaka elongamelo ka shikaa dia nde ayonya kɛnɛ kele lo kiɔkɔ y’ekakatanu aso tshɛ, mbuta ate Satana Diabolo ndo wanɛ wele kɔlɔ oko nde. (Os. 37:10) Onde wɛ ambokimɛ avɛsa amɔ wa lo Bible wakeketsha wakoka kokimanyiya dia ndjokikɛ ehemba wa lo nshi yayaye? w22.08 11 od. 11

Onde wɛ tetemalaka ndjakiyanya lo kɛnɛ kendana l’atɔndɔ wa Jehowa wa losembwe lushi la lushi ndo ɔnɔnyi l’ɔnɔnyi? Jehowa tolakaka dia losembwe laso koka monga “oko asuku wa ndjale.” (Isa. 48:18) Ohɔsa dia wɛ memala l’omamu wa ndjale kɛmɔ ka woke ndo wɛ ekɔ mɛna asuku wambɔmbɔ. Lo dihole dia wɔladi efula dia ngasɔ, onde wɛ koka ndjakiyanya di’asuku asɔ hawotombɔmbɔ nto lushi lɔmɔi? Ndooko! Nɛ dia wɛ mbeyaka dia vɔwayotetemalaka mimbɔmbɔ. Losembwe layɛ koka mbɛdikama l’asuku wa lo ndjale! Lo ngande? Etena kalangayɛ mbɔsa yɛdikɔ mɔ, nkanyiya ntondo kɛnɛ kalanga Jehowa dia wɛ nsala. Ndo oma laasɔ salatɔ. Oyadi yɛdikɔ yalangayɛ mbɔsa yekɔ wolo, Shɔ ka ngandji ayongaka nshi tshɛ suke dia kokimanyiya dia wɛ ntetemala nsɛna lushi la lushi lo ndjela atɔndɔ ande wosembwe.—Isa. 40:​29-31. w22.08 30 od. 15-17

L’ekomelo k’ɛnɔnyi 1000, Satana ayotshungɔma yema. Oma laasɔ, nde ayosala la wolo dia minganyiya anto wa kokele. L’edja k’ohemba w’ekomelo ɔsɔ, anto wa kokele tshɛ wa la nkɛtɛ wayonga la diaaso dia mɛnya hwe lo wedi akɔna wayowonga lo kɛnɛ kɛndana la oyindjamelo wa lokombo la Nzambi ndo la lowandji lande. (Ɛny. 20:​8-10) Kɛnɛ kayowosala l’etena kɛsɔ ayoshikikɛ dia kana nkombo yawɔ koka mfundama pondjo pondjo lo dibuku dia lɔsɛnɔ. Anto amɔ waheyama lofulo, wayɛnya dia vɔ wekɔ oko Adama l’Eva lo ntona Ɛlɔmbwɛlɔ ka Jehowa. Kakɔna kayowakomɛ? Ɛnyɛlɔ 20:15 totɛka ɔnɛ: “Onto tshɛ lele lokombo lande kotanema lo dibuku dia lɔsɛnɔ akakashema lo oduwa wa dja.” Eelo, atɔmbɔki asɔ wayolanyema tshɛ lo tshɛ lo pondjo. Koko anto efula wa kokele wayeta l’ohemba w’ekomelo. w22.09 23-24 od. 15-16

Anto amɔ wa l’etshumanelo ka lo ntambe ka ntondo wakahikaka di’Akristo w’ase Wedja minya mpota, ondo dia mbewɔ di’anto wa l’andja w’etshumanelo mbaɔnyɔla. (Ngal. 6:12) Ɔpɔstɔlɔ Pɔɔlɔ kombetawɔ kanyi shɔ kaanga yema, koko lo dihole dia nde ntshininala di’anto ndjela kanyi yande, l’okitshakitsha tshɛ nde akalɔmbɛ dako oma le apɔstɔlɔ ndo oma le dikumanyi dia la Jɛrusalɛma. (Ets. 15:2) Etombelo wakonge la dui sɔ ele, lɔkɛwɔ lande lakakimanyiya Akristo asɔ dia ntetemala nama ɔngɛnɔngɛnɔ ndo wɔladi l’atei w’etshumanelo. (Ets. 15:​30, 31) Naka owanu ɔmɔ ambotomba, sho mbidjaka wɔladi lo nyanga ɛlɔmbwɛlɔ oma le wanɛ wakasɔnama oma le Jehowa dia nama etshumanelo. Mbala efula, ɛlɔmbwɛlɔ kohikami lo Bible koka tanema l’ekanda aso kana lo ɛlɔmbwɛlɔ katosha okongamelo. Naka sho mbika washo lo alako asɔ lo dihole dia nsukɛ tokanyi taso hita, kete tayosala dia wɔladi monga l’etshumanelo. w22.08 22 od. 8-9

Lo ntena dimɔ, efula ka l’atei aso mongaka l’ohomba wa ndjaɛkɛ le ɔngɛnyi ɔmɔ wa ma ma. Lo ntena dimɔ, dui sɔ koka monga wolo. Bu dui dia wɔdu dia sho mbutɛ onto ɔmɔ awui wendana la so, ndo sho koka monga la lonyangu l’efula naka tamboyeya l’ɔkɔngɔ dia ɔngɛnyi aso akatɛ anto akina awui wakatawotɛ. Lo wedi okina, sho mongaka la lowando le onto loomba sheke! Dikumanyi dieyama oko anto womba toseke wekɔ oko “dihole di’eshamelo oma lo lɔpɛpɛ, ndo oko dihole di’ekokelo” le anangɛwɔ. (Isa. 32:2) Sho mbeyaka dia sho koka nsawola l’apami asɔ aha l’okakatanu l’eshikikelo ɔnɛ kɛnɛ kayotowatɛ kayolamema sheke. Hatohombe mbasɛngiya dia vɔ totɛ awui wa toseke. Laadiko dia laasɔ, sho mandolaka wadi wa dikumanyi nɛ dia vɔ hawoyange dia mbeya awui akana oma le waomɛwɔ. Lo mɛtɛ, ekɔ tshondo y’ɔtshɔkɔ le ekumanyi kele wadɛnde hatɛ anto akina awui wendana l’anangɛso l’akadiyɛso. w22.09 11 od. 10-11

Sho koka monga l’eshikikelo dia Jehowa ayokokɛ ekambi ande wa kɔlamelo l’etena ka “mfɔnu ka woke.” (Mat. 24:21; Dan. 12:1) Nde ayosala dui sɔ etena kayɔlɔsha osanga wa wedja, weyama oko Ngɔngɔ ka la Mangɔngɔ wanɛ wele la kɔlamelo le Jehowa l’andja w’otondo. Oyadi osanga wa wedja ɔsɔ wayokengama la wedja akɔ tshɛ 193 wakenga Nations unies, vɔ hawotokoka ndɔsha Ɔnɛ-Laheme-Tshɛ ndo alembe ande wa l’olongo! Jehowa ndakaka ɔnɛ: “Dimi mɛtɛ layoyatombola ndo layoyakidia ndo layoyaeyanya lo washo wa wedja efula; ko vɔ wayohomba mbeya dia dimi kele Jehowa.” (Ɛzk. 38:​14-16, 23) Etena kayɔlɔsha Ngɔngɔ ka la Mangɔngɔ, kɛsɔ ayokonya Jehowa dia nde tatshiya ta di’ekomelo di’Aramangɛdɔna diayondolanya “nkumi ya dikanga ya lo nkɛtɛ k’otondo.” (Ɛny. 16:​14, 16; 19:​19-21) Otshikitanyi la wɔ, “paka anto wosembwe mbayodjasɛ la nkɛtɛ, ndo ɔnɛ laha la onongo kayotshikala lɔkɔ.”—Tok. 2:​21, nɔtɛ. w22.10 16-17 od. 16-17

Sho hatokoke mbeya kɛnɛ kele l’etema w’anangɛso l’akadiyɛso; paka “Jehowa mbasɛdingola eyango.” (Tok. 16:2) Nde nangaka weho w’anto tshɛ, woye oma l’ahole wotshikitanyi ndo wele la mbekelo yotshikitanyi. Ndo Jehowa tokeketshaka dia sho ‘ndjihola etema aso hwe.’ (2 Kɔr. 6:13) Sho nyangaka dia mboka ase nkumbo kaso ka lo nyuma tshɛ ngandji, koko aha mbalombosha. Kɛsɔ mɛnyaka dia sho hatokoke nombosha wanɛ wele bu l’atei w’etshumanelo. Onde wɛ ambokanyiyaka owotɔ ayɛ ɔmɔ wele bu ombetawudi, ko wɛ mbuta ɔnɛ: “Onto ɔnɛ hakomaki Ɔmɛnyi wa Jehowa pondjo”? Ndooko, nɛ dia nsala ngasɔ nembetshiyaka ndjadja lo dihole diele bu diaso ndo ndjaɔsa dia sho ndeka anto akina ɔlɔlɔ. Jehowa ekɔ lo ntetemala mbisha ‘anto wa l’ahole tshɛ’ diaaso dia ndjatshumoya. (Ets. 17:30) Mbala tshɛ wɛ pombaka mbohɔka dia wanɛ wayaɔsa dia vɔ ndeka anto akina losembwe bu mɛtɛ anto wa losembwe. Ngandji kokaso ɛlɛmbɛ wa Jehowa wosembwe koka tosha ɔngɛnɔngɛnɔ ndo vɔ koka sambemɛ le anto akina, kɛsɔ koka mbakimanyiya dia ndjasukanya la so ndo la Nzambi kaso. w22.08 31 od. 20-22

Sho koka nongamɛ dia tayohomana l’ɔlɔshamelo l’olimu aso w’esambishelo. Ɔlɔshamelo ɔsɔ koka ndeka monga wolo lo nshi yayaye. (Dan. 11:44; 2 Tim. 3:12; Ɛny. 16:21) Koko, sho koka monga l’eshikikelo ɔnɛ Jehowa ayotosha ekimanyielo kele laso ohomba. Lande na? Nɛ dia Jehowa kimanyiyaka nshi tshɛ ekambi ande dia vɔ nkotsha ɛkɛndɛ wakandawasha oyadi ɛkɛndɛ akɔ wekɔ wolo efula. Tɔsɛdingole ɛnyɛlɔ k’omvutshi Ɛzɛkiyɛlɛ ɔnɛ lakasambisha ase Juda waki lo lɔhɔmbɔ la Babilɔna. Weho w’anto akɔna waki l’ɛtshi ka nkɛtɛ kakasambishaka Ɛzɛkiyɛlɛ? Jehowa akate dia vɔ waki akanga “w’ohindodi,” “w’etema wolo,” ndo “atɔmbɔki.” Vɔ waki oko atɛndɛ ndo nkoto ya waale. Diakɔ diakatɛka Jehowa Ɛzɛkiyɛlɛ mbala la mbala ɔnɛ: ‘Tokake wɔma’! (Ɛzk. 2:​3-6.) Ɛzɛkiyɛlɛ aki l’akoka wa nkotsha ɔkɛndɛ ande wa nsambisha nɛ dia 1) Jehowa akotome, 2) nyuma ka Nzambi kakawoshaka wolo waki lande ohomba ndo 3) ɛtɛkɛta waki Nzambi wakakeketsha mbetawɔ kande. w22.11 2 od. 1-2

Jehowa akatotonge nto la nsaki k’efula ka ntetemala nsɛna. Bible mbutaka lo dikambo di’anto dia Nzambi “akadje ndo kanyi ya pondjo l’etema awɔ.” (Ond. 3:11) Ɔsɔ ekɔ ɔkɔkɔ ɔmɔ watokonya dia mbɔsa nyɔi oko otunyi. (1 Kɔr. 15:26) Naka tambondama la hemɔ ka wolo, onde sho kɔmaka anya ndo kongɛka nyɔi? Ndooko. Mbala efula, sho tshɔka le onganga ndo mbɔsaka ekanga dia ndɔshana la hemɔ kakɔ. Eelo, sho salaka tshɛ keso l’akoka wa nsala dia mbewɔ nyɔi. Ndo etena kavɔ lakiso ɔmɔ la ngandji, oyadi onto akɔ ekɔ dikɛnda kana aya osombe, shi sho mongaka la lonyangu l’efula ndo latshikala edja? (Jni. 11:​32, 33) Lo mɛtɛ, Otungi aso wa ngandji totondotosha nsaki ndo dikoka dia nsɛna pondjo pondjo, otondonga nde komonga la sangwelo di’anto sɛnaka pondjo pondjo. w22.12 3 od.5; 4 od. 7

Efula k’asekaso ambetawodi mbeyaka monga la hemɔ kana ndjaoka opoko lo ntena di’ekakatanu sɔ. Sala la wolo dia sawolaka l’anangɛyɛ ndo l’akadiyɛyɛ. Hemɔ kɛmɔ kakokanɛ mbeyaka tɔlɔmba dia mangana l’anto akina oyadi etena keso la asekaso atɛmɔdi. Lo ntena dia ngasɔ, wɛ koka ndjaoka woho wakayaoke ɔpɔstɔlɔ Joani. Nde akalangaka mɛnana l’ɔngɛnyi ande Ngayo okoko l’okoko. (3 Jni. 13, 14) Koko, Joani akeyaka dia lo tshanda mɔ nde kokoka mɛna Ngayo. Ɔnkɔnɛ, Joani akasale kɛnɛ kakandakoke nsala; nde akafundɛ Ngayo mukanda. Naka wɛ bu la diaaso dia membola anangɛyɛ l’akadiyɛyɛ okoko l’okoko, kete wɛ koka mbowaembola lo toho tokina. Etena kalamayɛ diɔtɔnganelo diasayɛ l’asekayɛ Akristo, wɛ ayoleka ndjaoka l’ekokelo ndo lo wɔladi. Sawola la dikumanyi naka wɛ ekɔ l’ekiyanu w’efula ndo etawɔ ekeketshelo kawɔ ka la ngandji tshɛ.—Isa. 32:​1, 2. w22.12 17-18 od. 6-7

Bible mɛnyaka dia l’etena kɛmɔ wakadje ekolo wa Yɛsɔfu lo lowete ndo wakokeleka mɔlɔla lo nkingo. (Os. 105:​17, 18) Lɔsɛnɔ la Yɔsɛfu lakatalekaka ntshɔ otsha lo kɔlɔ. Nde akamɔ oma lɛnɛ akinde ɔhɔmbɔ wakawɛkɛka otema otsha lo lokanu la paa efula. Onde wɛ ambohomanaka l’okakatanu ɔmɔ wakatalekaka ntshɔ otsha lo kɔlɔ oyadi alɔmbɛlɔ ayɛ w’omak’ɛse otema? Dui sɔ koka salema. Jehowa hatohandja oma l’ekakatanu wa l’andja ɔnɛ wa lɔmbwama oma le Satana. (1 Jni. 5:19) Koko, wɛ koka monga l’eshikikelo ɔnɛ: Jehowa mbeyaka dimɛna dimɛna okakatanu wahomana la yɛ ndo nde ndjakiyanyaka lo dikambo diayɛ. (Mat. 10:​29-31; 1 Pe. 5:​6, 7) Ndo nto, nde ndakaka ate: “Dimi hakotshikaki ndo hakokalɛki pondjo.” (Hɛb. 13:5) Jehowa koka kokimanyiya dia mbikikɛ oyadi wɛ amboshisha elongamelo l’ɔtɛ w’okakatanu wele layɛ. w23.01 16 od. 7-8

Afundelo toshikikɛka dia Nzambi kaso hatotokasha etena kasalaso munga. Ase Isariyɛlɛ wakasalɛ Jehowa pɛkato mbala ko mbala, koko lam’akawayatshumoyaka l’otema ɔtɔi, Nzambi akaadimanyiyaka. Akristo wa lo ntambe ka ntondo vɔ lawɔ wakeyaka dia Nzambi akaalangaka efula. Lo tshimbo ya nyuma k’ekila, ɔpɔstɔlɔ Pɔɔlɔ akakeketsha asekande ambetawudi dia vɔ ‘dimanyiya ndo nsamba’ pami kɛmɔ kakasale pɛkato ka woke ndo kakayatshumoya. (2 Kɔr. 2:​6, 7; 1 Kɔr. 5:​1-5) Mbokɛmaka hwe dia Jehowa hakasha atɛmɔdi ande paka l’ɔtɛ wambowosala munga! Koko, la ngandji tshɛ nde mbakimanyiyaka, mbangolaka ndo nde mbalɔmbaka dia vɔ monga angɛnyi ande nto. Nde ndakaka dia nsala woho akɔ waamɛ l’atshi wa pɛkato wayatshumoya ɛlɔ kɛnɛ. (Jak. 4:​8-10) Bible tosholɛka lomba, losembwe ndo ngandji kaki Nzambi. Dibuku nɛ mɛnyaka dia Jehowa nangaka dia sho mbeeya. Nde nangaka sho nkoma angɛnyi ande. w23.02 7 od. 16-17

Tekɔ l’ɛkɔkɔ w’eshika wɛnya lande na kangɛnangɛnaso woho wɛnaso akambo wa l’andja ɔnɛ wakotsha prɔfɛsiya ya lo Bible. Ɛnyɛlɔ, Yeso akasha listɛ l’akambo amɔ shikaa watokimanyiya dia mbeya di’ekomelo ka dikongɛ di’akambo dia Satana kaya suke. (Mat. 24:​3-14) Ɔpɔstɔlɔ Petero akatokeketsha dia sho mbidja yimba l’okotshamelo wa prɔfɛsiya dia mbetawɔ kaso ntetemala monga nge. (2 Pe. 1:​20, 21) Nde kombolaka tokimanyiya dia sho monga la wɛdimo etena kasɛdingolaso prɔfɛsiya ya lo Bible. Nde tokeketshaka dia ‘nama lo yimba woongelo wa lushi la Jehowa.’ (2 Pe. 3:​11-13) Lande na? Aha nɛ dia tekɔ lo nanga mbeya “lushi kana wonya” wayela Jehowa Aramangɛdɔna, koko nɛ dia tekɔ lo nanga nkamba l’etena kambototshikalɛ dia monga la “etsha wa lɔkɛwɔ l’ekila ndo [la] ditshelo diɛnya omamemelo le Nzambi.” (Mat. 24:36; Luka 12:40) Sho nangaka nama lɔkɛwɔ l’ɔlɔlɔ ndo ndjashikikɛ dia welo wadjaso l’olimu wa Jehowa mɛnyaka ngandji k’efula kawokaso. Dia ndeka mbika washo lo dui sɔ, sho pombaka ndjalama. w23.02 16 od. 4, 6

Koko, ekɔ akambo amɔ wahomba “ɛkɔkɔ ekina” nsala dia ndjɔsɛna lo paradiso. Sho tekɔ la waaso efula ɛlɔ kɛnɛ dia mɛnya woho wayaokaso lo dikambo dia Yeso. Ɛnyɛlɔ, sho mɛnyaka ngandji kaso otsha le nde lo woho wasalɛso anango w’akitami akambo. Yeso akate dia nde ayolombosha ɛkɔkɔ lo ndjela woho wasalɛwɔ anango akambo. (Mat. 25:​31-40) Sho koka mbasukɛ l’olimu wa nsambisha ndo wa mbetɛ anto ambeki. (Mat. 28:​18-20) Hatohombe nkonga paka lam’ayotɔsɛna lo paradiso ko sho ndjonga woho w’onto wakombola Jehowa dia sho monga lɛkɔ. Ntatɛ oma ko kakianɛ sho koka nsala la wolo dia monga la losembwe l’ɛtɛkɛta aso, l’etsha aso ndo monga la wɛdimu lo mbekelo yaso. Ndo sho koka monga la kɔlamelo le Jehowa, le olonganyi aso ndo le asekaso Akristo. Lam’ayototalekaka nsɛna lo ndjela atɔndɔ waki Nzambi l’andja ɔnɛ wa kɔlɔ, mbayotalekaka dui sɔ monga wɔdu le so lo nsɛna lo ndjela atɔndɔ akɔ lo paradiso. Sho kokaka nto pamia akoka aso ndo awui wɛnya dia tekɔ lo ndjalɔngɔsɔla dia tɔsɛna lɛkɔ. w22.12 11-12 od. 14-16

Sho nangaka Yeso oko Nkumekanga kaso nɛ dia nde kele Ɔnɔmbɔdi w’oshika. Jehowa ndamɛ mbaketsha Ɔnande ndo mbakɔsɔnɛ dia nde mbolɛ. (Isa. 50:​4, 5) Kanyiya nto dikambo dia ngandji ka ndjahondja kakɛnya Yeso. (Jni. 13:1) Oko wende Nkumekanga kayɛ, Yeso sunganaka dia wɛ mbooka ngandji tshɛ lo tshɛ. Nde akate dia wanɛ wawoka mɛtɛ ngandji, mbuta ate wanɛ welɛnde angɛnyi ande mɛnyaka ngandji kawɔ lo nkitanyiya wadjango ande. (Jni. 14:15; 15:​14, 15) Ande diɛsɛ dia monga ɔngɛnyi w’Ɔnaki Jehowa lee! Wɛ mbeyaka dia Yeso ekɔ l’okitshakitsha ndo mbokoyaka She lo yoho ya kokele. Wɛ akeke dia nde akalesha wanɛ waki la ndjala, akakeketsha wanɛ wakakɔmɔ ndo akakɔnɔla wanɛ waki la hemɔ. (Mat. 14:​14-21) Wɛ ekɔ lo mɛna woho walɔmbɔlande etshumanelo kande ɛlɔ kɛnɛ. (Mat. 23:10) Ndo wɛ mbeyaka di’oko wende Nkumekanga ka Diolelo dia Nzambi, nde ayotosalɛ awui efula wa diambo lo nshi yayaye. Ngande wakokayɛ mɛnya dia wɛ mbookaka ngandji? Ele lo ndjela ɛnyɛlɔ kande. Wɛ koka ntatɛ nsala dui sɔ lo ndjakimɔ wɛmɛ le Jehowa ndo lo batizama. w23.03 4 od. 8, 10

Jehowa kondodia tsho olongo koko akalodia ndo nkɛtɛ la ndjale la weho wa ditongami dia diambo diakokaso nkondja wetshelo oma lɔkɔ. (Os. 104:​24, 25) Ndo ohokana yimba la woho wakatotonge Nzambi. Nde akatosalɛ awui asɔ dia sho ngɛnangɛnaka lo mendaka diangɔ di’amɛna diakandatonge. Nde akatosha nto akoka wa mɛna, wa mboka, wa minanda, wa ndɛta, ndo wa mboka solo, awoke watokimanyiya dia ngɛnangɛna la weho wa diangɔ diotshikitanyi diakandatonge. Bible mɛnyaka ɔkɔkɔ okina w’ohomba wahombaso sɛdingolaka etongelo. Tɔ tetshaka waonga wa Jehowa. (Rɔmɔ 1:20.) Ɛnyɛlɔ, naka sho menda diangɔ diakatonge Jehowa, kete tayɛna dia diɔ diakatongama lo yoho ya diambo. Onde diɔ hadiɔkɛnɛmɔla lomba la Nzambi? Ndo ohokana yimba la mbo ya ndɛ yotshikitanyi yakokaso ngɛnangɛna la yɔ. Dui sɔ mɛnyaka hwe ngandji k’efula kokande anto. Etena kasɛdingolaso waonga wa Jehowa oma lo diangɔ diakandatonge, sho ndekaka mboweya ndo dui sɔ totshutshuyaka dia sho ndeka ndjasukanya la nde. w23.03 16 od. 4-5

Oko wataleke ntshɔ andja ɔnɛ otsha lo kɔlɔ, wɛkamu aso l’akambo wa mɛtɛ wayɔtɔ l’ohemba. Anto amɔ mbeyaka mpemba totshutshuya dia sho monga la taamu ɔnɛ Bible bu mɛtɛ kana lo woho wakasɔnɛ Jehowa ɔhɔmbɔ wa kɔlamelo ndo kɛsɔ dia nɔmbɔlaka atɛmɔdi ande ɛlɔ kɛnɛ. Koko naka sho mbetawɔ di’Ɔtɛkɛta wa Nzambi mongaka nshi tshɛ mɛtɛ, kete tayonga l’akoka wa nshika tanga l’ɛlɔshamelo wendana la mbetawɔ kaso. Tayɔsa “yɛdikɔ ya kitanyiyaka wadjango [wa Jehowa] tena tshɛ, polo l’ekomelo.” (Os. 119:112) Sho ‘hatotoka nsɔnyi’ mbewoya anto akina awui wendana l’akambo wa mɛtɛ ndo mbaakeketsha dia nsɛna lo yoho yɔtɔnɛ l’akambo akɔ. (Os. 119:46) Ndo tayonga l’akoka wa mbikikɛ ekakatanu woleki wolo, mbidja ndo ɛhɛnyɔhɛnyɔ, “la solo dia lotutsha ndo l’ɔngɛnɔngɛnɔ.” (Kɔl. 1:11; Os. 119:​143, 157) Akambo wa mɛtɛ toshaka eshikikelo, toshaka oyango wa pondjo ndo ɛlɔmbwɛlɔ ka hwe. Vɔ toshaka elongamelo ka nshi yayaye y’amɛna l’ɛlɔmbwɛlɔ ka Diolelo diaki Nzambi. w23.01 7 od. 16-17

L’otsho wa la ntondo ka nyɔi kande, Yeso akalɔmbɛ edja efula dikambo di’ambeki ande, alɔmba She dia “mbakokɛ oma le kanga kɔlɔ.” (Jni. 17:15) Ande ngandji kaki la Yeso lee! Nde aki suke la diɛnɛ l’ohemba ande hita wa wolo koko nde akayakiyanya dikambo dia wahɔ w’apɔstɔlɔ ande. Lo mbokoya Yeso, hatohombe mbidjaka yimba paka l’ehomba aso hita. Koko, tɔlɔmbake mbala la mbala dikambo di’anangɛso l’akadiyɛso. Nɔmba dikambo di’anangɛso l’akadiyɛso keema wetshelo wa wenya. Ɔtɛkɛta wa Nzambi totɛka ɔnɛ: “Ɔsɛngɔsɛngɔ w’onto ɔlɔlɔ wekɔ la shɛngiya ya wolo.” (Jak. 5:16) Asekaso atɛmɔdi wekɔ l’ohomba wa alɔmbɛlɔ aso nɛ dia wekɔ lo mpomana l’ehemba efula. w22.07 23-24 od. 13-15