Ɛkɔndɔ W’apandjudi a Diolelo
Lokumu l’Ɔlɔlɔ la Diolelo Layosambishama
L’EDJA ka deko efula, otunyi a woke waki Nzambi, Satana Diabolo, ekɔ lo kamba olimu la mandji ya pɔlitikɛ ndo l’ɛtɛmwɛlɔ wa kashi la lokeso tshɛ lo weolo wadjande dia sekɛ odianganelo wa Lokristo la mɛtɛ. Koko, toho tɔsɔ takakite tatala. Yeso akatatshi dia “lukumu l’ololo . . . la diulelu layusambishama [aha ɔnɛ: “ondo layosambishama” kana ɔnɛ: “lotokoka sambishama”] lu kete tshe, uku omenyi le wedja tshe.”—Mateu 24:14.
Satana akakɔ tatala l’eyango ande, ndo dikambo sɔ diakɛnama hwe la Ngirika. Lo wodja ɔsɔ, Ɔtɛmwɛlɔ w’Ɔrtɔdɔksɛ wa Ngirika wakahembe sekɛ Ɛmɛnyi wa Jehowa di’aha vɔ sambisha lokumu l’ɔlɔlɔ la Diolelo. Koko, oko wɛnyamidiɔ l’ɔkɔndɔ ɔnɛ wayela, l’edjedja ka wonya, kânga mbakayala wekamu akɔna tshɛ, mɛtɛ ya l’atei a Bible yakakome le anto wele l’etema w’ɛlɔlɔ.
Ambeta oko yɛdikɔ y’ɛnɔnyi 30, osasɛrdɔsɛ ɔmɔtshi wa l’ɔtɛmwɛlɔ w’Ɔrtɔdɔksɛ wa Ngirika aketawɔ lokumu l’ɔlɔlɔ ndo akɛnya saki kande ka ndjâla Ɔmɛnyi wa Jehowa. Koko, ewotɔ ande wakatone dikambo sɔ la wolo awɔ tshɛ ndo wakotshutshuya dia pembola lɔngɛnyi lasande l’Ɛmɛnyi wa Jehowa. Dia nde ngɛnyangɛnya nkumbo kande, nde akatetemala l’olimu ande w’osasɛrdɔsɛ; koko, nde akeyaka nshi tshɛ ɔnɛ Ɛmɛnyi wa Jehowa wakokimanyiya dia nde mbeya mɛtɛ ndo ɔnɛ nde akakitshike l’ɔtɛ wa nama dihole di’ɔnɛnɛ l’atei w’ɔtɛmwɛlɔ wa kashi.
Kânga mbakidiɔ ɔsɔku, lo tena dimɔtshi, nde akatɛkɛtaka akambo w’ɔlɔlɔ lo lokombo l’Ɛmɛnyi wa Jehowa l’etena kakinde la diaaso. Tena efula, nde akalake kânga anto ɔnɛ naka vɔ nangaka mbeya mɛtɛ ya l’atei a Bible, vɔ pombaka mbeka kâmɛ l’Ɛmɛnyi wa Jehowa. L’ɔkɔngɔ w’ɛnɔnyi efula, anto amɔtshi wakayoyelaka dako diande.
Atayala edja, osasɛrdɔsɛ akɔ akandama la hemɔ wolo efula ndo nde akeye ɔnɛ nde aya suke la mvɔ. Lam’akinde la lopitadi, nde akelɛ an’ande, ko vɔ tshɛ wakatshumana l’ɔtɛ a tange kande.a Ko nde akâlembetshiya ɔnɛ naka nde ambovɔ, ondo vɔ wayokoka mɛnana lande nto. Nde akawatɛ kɛnɛ k’endana la wetshelo w’oma lo Bible dia Jehowa ayolola anto dia vɔ ndjɔsɛna lo paradiso lanɛ la kɛtɛ, koko naka vɔ wakalange mɛtɛ mɛna ekotshamelo k’akambo asɔ, vɔ wakahombe mbeka mɛtɛ oma lo Bible ndo ndjâkakitola oma l’ɔtɛmwɛlɔ wa kashi. Nde akâsɛngasɛnga dia vɔ sangana kâmɛ l’Ɛmɛnyi wa Jehowa dia vɔ mbeka woho wa ndjâla Akristo w’eshika.
La Ngirika, oko lo wedja ekina 230, Ɛmɛnyi wa Jehowa wekɔ lo mbɛkama lo wolo wa nyuma k’ekila kaki Nzambi. Oma l’osukɔ wa nyuma k’ekila mbakoka Ɛmɛnyi wa Jehowa mbidja lokolo l’okotshamelo wa pɔlɔfɛsi ka Yeso kata ɔnɛ: “Nyayulungula wulu lam’ayuya [nyuma k’ekila, NW] le nyu. Nyu nyayuyala emenyi ami la Jerusalema, lu Judiya tshe la Samariya edja ndu l’ekumelu ka kete.”—Etsha 1:8.
[Footnote]
a Ɔtɛmwɛlɔ w’Ɔrtɔdɔksɛ wa Ngirika mbishaka asasɛrdɔsɛ awɔ dikimɔ dia vɔ tshukana.
Kem’edja l’ɔkɔngɔ w’akambo asɔ, osasɛrdɔsɛ akɔ akavu. Koko, dako di’okakitwanelo diakandasha an’ande diakayoyala l’etombelo w’ɛlɔlɔ. Ɔn’ande la omoto, lo ndjela k’ewotɔ ande efula, akahetshaka Ɛmɛnyi wa Jehowa l’elimu awɔ woho w’anyanya. Koko, nde kokoka mbohɛ dako di’oma ka tshina di’otema diakawasha She lam’akinde suke la mvɔ, ɔnkɔnɛ, nde kotshimbatshimba dia mbɔtɔnɛ l’Ɛmɛnyi wa Jehowa ko akayotatɛka la mbeka Bible. Atayala edja, ndamɛ aya Ɔmɛnyi, lam’akandalambola lɔsɛnɔ lande le Jehowa Nzambi dia mbokambɛ olimu ndo lam’akandɛnya ndjâkimɔ kande lo batizama l’ashi.