“Omenyi le wedja tshe”
“Nyu nyayuyala emenyi ami . . . edja ndu l’ekumelu ka kete.”—ETSHA 1:8.
1. Etena kakɔna ndo lende akoke ambeki mbala ka ntondo prɔfɛsiya kofundami lo Mateu 24:14?
EFULA l’atei aso mbeyaka dimɛna ɛtɛkɛta waki Yeso wele lo Mateu 24:14 woho ɔnɛ wele wokoka mbata l’ɔtɛ. Ɔsɔ ekɔ mɛtɛ prɔfɛsiya ka diambo! Ohokanyiya woho wakahombe ambeki kanyiya etena kakawoke ɛtɛkɛta ɛsɔ mbala ka ntondo! Aki lo ɔnɔnyi 33 T.D., ambeki wakonge kâmɛ la Yeso lo edja ka ɛnɔnyi oko esato, ndo kakianɛ vɔ wekɔ lo tatshu la nde otsha la Jerusalɛma. Vɔ wakɛnyi ahindo wakandasale ndo wakahokamɛ wetshelo ande. Kânga mbakawangɛnangɛna akambo wa mɛtɛ wa nɛmɔ efula wakawaetsha Yeso, vɔ wakeyaka dimɛna dia aha anto tshɛ mbayɔngɛnangɛna kâmɛ lawɔ. Yeso aki la atunyi waki la wolo ndo la shɛngiya y’efula.
2. Wâle ndo ekakatanu akɔna wakahombe ambeki pomana lawɔ?
2 L’Okongo w’Ewele, Yeso akadjasɛ nde la ambeki anɛi wakôlongamɛka la yambalo etena kakandatɛkɛtaka dia wâle wakahombe mbakomɛ ndo ekakatanu wakawahombe pomana lawɔ. Yema la ntondo, Yeso akawatɛ ɔnɛ nde akahombe ndjakema. (Mateu 16:21) Kakianɛ nde ambâhonolɛ ɔnɛ vɔ lawɔ wayohomana la ɔlɔshamelo wa wolo efula. Nde akate ate: “Vo wayunyukimo lu asui, wayunyudiaka. Nyu nyayuhetshama lu wedja tshe ne dia lukumbu lami.” Aha awui asɔ ato mbakandawatɛ. Nde akawatɛ nto ɔnɛ aprɔfɛta wa kashi wayonganyiya anto efula. Amɔtshi wakahombe takanyema, fungana ndo mpetshana onto la onyande. Koko amɔtshi nto, mbuta ate “antu efula” wayetawɔ dia ngandji kokawɔ Nzambi ndo Ɔtɛkɛta ande mbɔla yɔɔ.—Mateu 24:9-12.
3. Lande na kele ɛtɛkɛta waki Yeso watanema lo Mateu 24:14 wekɔ mɛtɛ ɛtɛkɛta wa diambo?
3 Akikɔ l’ɔkɔngɔ wa nde mbatɛ awui wakɔmɔla otema asɔ mbakayotaka Yeso dikambo diakahombe mambiya ambeki. Nde akate ate: “Lukumu l’ololo lone la diulelu layusambishama lu kete tshe, uku omenyi le wedja tshe. L’okongo diku, ekumelu kayuya.” (Mateu 24:14) Lo mɛtɛ, olimu wakatatɛ Yeso lo Isariyɛlɛ wa “mvuta akambu wa mete” wakahombe tetemala ndo kambema lo nkɛtɛ k’otondo. (Joani 18:37) Ande prɔfɛsiya ka diambo lee! Ohamelo wa olimu akɔ lo “wedja tshe” vamɛ ekɔ tshondo y’okakatanu. Lâsɔ, mbokamba l’atei wa ‘lohetsho l’oma le wedja tshɛ’ akahombe monga mɛtɛ tshondo ya dihindo. Ekotshamelo k’olimu wa woke ɔsɔ wayotombola aha paka lowandji ndo wolo wa Jehowa oto, koko ndo ngandji kande, kɛtshi kande, ndo solo diande dia lotutsha. Ndo nto, olimu ɔsɔ wakahombe mbisha ekambi ande diaaso dia vɔ mɛnya mbetawɔ ndo ndjakimɔ kawɔ.
4. Waa na wakawatɛ dia kamba olimu wa sambisha, ndo ekeketshelo kakɔna kakawasha Yeso?
4 Yeso akokiya ambeki ande dimɛna dia vɔ waki la olimu wa woke efula wakawahombe kamba. La ntondo ka nde mbudɛ l’olongo, Yeso akɛnama le wɔ ndo akawatɛ ate: “Nyu nyayulungula wulu lam’ayuya nyuma [k’ekila] le nyu. Nyu nyayuyala emenyi ami lu Jerusalema, lu Judiya tshe la Samariya edja ndu l’ekumelu ka kete.” (Etsha 1:8) Aki mɛtɛ dia anto akina wakahombe sangana lawɔ dia kamba olimu ɔsɔ. Koko, ambeki waki yema tshitshɛ. Aki mɛtɛ ekeketshelo le wɔ dia mbeya ɔnɛ nyuma k’ekila ka wolo wa Nzambi kayowasha wolo wa kamba olimu wakawasha Nzambi!
5. Kakɔna kaki ambeki kombeya lo kɛnɛ kendana l’olimu w’esambishelo?
5 Ambeki wakeye dia vɔ wakalongola didjango dia sambisha lokumu l’ɔlɔlɔ ndo ‘mbetɛ anto wa lo wedja tshɛ ambeki.’ (Mateu 28:19, 20) Koko vɔ kombeya woho wakahombe esambishelo salema, ndo vɔ kombeya etena kakahombe ekomelo ndja, oko wahateye ndo sho. Ɔsɔ ekɔ dikambo diahomba Jehowa ndamɛ shikikɛ. (Mateu 24:36) Etena kayosalema olimu w’esambishelo polo lo yɛdikɔ yayɔngɛnyangɛnya Jehowa, nde ayela ekomelo ka dikongɛ di’akambo dia kɔlɔ nɛ. Paka oma lâsɔ mbayoshihodia Akristo dia olimu w’esambishelo wambokotshama lo ndjela lolango la Jehowa. Ambeki wa ntondo asɔ kokoka shihodia woke woke w’olimu w’esambishelo wakahombe salema lo nshi nyɛ y’ekomelo.
Esambishelo lo ntambe ka ntondo
6. Kakɔna kakatombe lo Pɛntɛkɔsta ka lo 33 T.D., ndo yema tshitshɛ oma lâsɔ?
6 Lo ntambe ka ntondo, olimu w’esambishelo ka Diolelo ndo wa mbetɛ anto ambeki akonge la etombelo wa diambo efula. Lo lushi la Pɛntɛkɔsta ka lo 33 T.D., suke la ambeki 120 wakikɔ lo luudu la lâdiko la Jerusalɛma. Nyuma k’ekila kaki Nzambi kakahotamɛ ndo ɔpɔstɔlɔ Petero akasha dako diakatshutshuya anto dia mbɔsa yɛdikɔ dia nembetshiya kitshimudi ya dihindo sɔ, ndo anto oko 3000 wakakome ambetawudi ndo wakabatizama. Ɔsɔ aki tsho etatelo. Kânga l’atei wa welo wakadjaka ewandji w’ɛtɛmwɛlɔ dia shimba olimu w’esambishelo ka lokumu l’ɔlɔlɔ, ‘Jehowa akatetemala mbakotshiya lushi la lushi ambeki wakahombe shimbamela.’ Yema tshitshɛ, ‘lofulo lawɔ lakakome apami oko nunu tanu.’ L’ɔkɔngɔ wa lâsɔ, “embetawudi, elui w’apami la w’amantu, wakatafulanelaka le Khumadiondjo.”—Etsha 2:1-4, 8, 14, 41, 47; 4:4; 5:14.
7. Lande na kele ekadimwelo k’otema kaki Kɔnɛliyɔ aki dikambo dia diambo?
7 Dikambo dikina dia diambo diakasalema lo ɔnɔnyi wa 36 T.D., dikambo diakɔ ko: ekadimwelo k’otema ndo batismu kaki Kɔnɛliyɔ, laki ose Wodja. Lo nɔmbɔla ɔpɔstɔlɔ Petero otsha le pami kɛsɔ kakokaka Nzambi wɔma, Jehowa akɛnya dia olimu wakadjanga Yeso wa ‘mbetɛ anto wa lo wedja tshɛ ambeki’ kokomɛ paka le ase Juda wakikɔ lo wedja wotshikitanyi. (Etsha 10:44, 45) Kakɔna kakasale wanɛ wakalɔmbɔlaka na? Etena kakashihodia apɔstɔlɔ ndo dikumanyi dia la Judiya ɔnɛ lokumu l’ɔlɔlɔ lambosambishama nto ndo le ase wedja, mbuta ate le wanɛ waki komonga ase Juda, vɔ wakatombola Nzambi. (Etsha 11:1, 18) L’etena kakɔ kâmɛ, olimu w’esambishelo wakatetemala ntɔ elowa l’atei w’ase Juda. Ɛnɔnyi ɛmɔtshi l’ɔkɔngɔ diko, ondo lo 58 T.D., lâdiko dia ase Wedja wakakome ambetawudi mbaki ndo “asi Juda nunu efula waketawo.”—Etsha 21:20.
8. Ngande wele lokumu l’ɔlɔlɔ la shɛngiya le anto?
8 Kânga mbele ohamelo wa diambo wakonge lo lofulo l’anto l’atei w’Akristo wa lo ntambe ka ntondo, hatohombe mbohɛ dia lofulo lɔsɔ aki lofulo l’anto wa mɛtɛ mɛtɛ. Losango la lo Bible lakawôke laki la wolo efula. (Heberu 4:12) Lɔ lakatshikitanya lo yoho ya diambo efula nsɛnɔ yaki anto wakalietawɔ. Anto wakatatɛ nsɛna lɔsɛnɔ la pudipudi, wakalɔtɛ lonto l’oyoyo, ndo wakayaokanya la Nzambi. (Efeso 4:22, 23) Kɛsɔ mbasalema ndo ɛlɔ kɛnɛ. Ndo wanɛ tshɛ wetawɔ lokumu l’ɔlɔlɔ wekɔ vɔ tshɛ la elongamelo ka diambo ka nsɛna pondjo pondjo.—Joani 3:16.
Ekambi kâmɛ la Nzambi
9. Diɛsɛ ndo ɔkɛndɛ akɔna wakashihodia Akristo wa ntondo ɔnɛ vɔ waki lawɔ?
9 Akristo wa ntondo kondjashaka lotombo l’ɔtɛ wa kɛnɛ kakasalemaka. Vɔ wakashihodia dia olimu awɔ w’esambishelo wakasukamɛ oma lo ‘wolo wa nyuma k’ekila.’ (Romo 15:13, 19) Jehowa mbaki lo kiɔkɔ y’ohamelo wa lo nyuma waki lo salema. L’etena kakɔ kâmɛ, Akristo asɔ wakeye dia vɔ waki la diɛsɛ ndo la ɔkɛndɛ wa monga “ekambi kame la [Nzambi].” (1 Koreto 3:6-9) Ɔnkɔnɛ, lo ndjela didjango diaki Yeso, vɔ wakayasha la wolo tshɛ l’olimu wakawawasha dia ntsha.—Luka 13:24.
10. Welo akɔna wakadje Akristo amɔtshi wa lo ntambe ka ntondo dia sambisha lo wedja tshɛ?
10 Oko “utumami le asi wedja,” Paulo akande lɔkɛndɔ la nunu dia kilɔmɛtɛlɛ l’okongo ndo l’ashi a wake ndo akâte tshumanelo efula lo prɔvɛnsɛ ka Rɔma ka l’Asiya ndo la Ngirika. (Romo 11:13) Nde akande nto lɔkɛndɔ otsha la Rɔma ndo ondo polo la Espagne. L’etena kakɔ kâmɛ, ɔpɔstɔlɔ Petero lakikɔ la ɔkɛndɛ wa mbewoya “wane wahema ehekeli lukumu l’ololo,” akatshu lo lɛkɛ lokina dia tokamba la Babilɔna, dihole diaki ase Juda efula lo etena kɛsɔ. (Ngalatiya 2:7-9; 1 Petero 5:13) L’atei w’anto akina efula wakakambe olimu wa Nkumadiɔndjɔ mbaki ndo wamato wele oko Turufina la Turufɔsa. Afundelo mbutaka dia womoto okina lakelamɛka Pɛrisi, ɔnɛ nde “akakambi ulimu efula lo dikambu dia Khumadiondjo.”—Romo 16:12.
11. Ngande wakatshɔkɔla Jehowa welo w’ambeki?
11 Jehowa akatshɔkɔla efula welo waki Akristo woshilami asɔ ndo akina wakakambe la ohetoheto. Ɛnɔnyi suke la 30 l’ɔkɔngɔ wa Yeso mbuta dia esambishelo kayosalema lo wedja tshɛ, Paulo akafunde dia “lukumu l’ololo lakasambishama l’etungelu tshe [l’ɛse] ulungu.” (Kolosai 1:23) Onde ekomelo kakaye lo etena kɛsɔ? Eelo, lo yoho mɔtshi ekomelo kakaye. Tɔ kakakomɛ dikongɛ di’akambo di’ase Juda lo ɔnɔnyi 70 T.D., etena kakalanya alembe w’ase Rɔma Jerusalɛma kâmɛ la tɛmpɛlɔ kayɔ. Eelo, Jehowa akashikikɛ dia esambishelo k’efula kayohomba salema la ntondo ka nde kumiya dikongɛ di’otondo di’akambo dia kɔlɔ diaki Satana.
Esambishelo kasalema ɛlɔ kɛnɛ
12. Ngande wakoke Ambeki wa Bible wa ntondo didjango dia sambisha?
12 Oya lo ekomelo ka ntambe ka 19, l’ɔkɔngɔ w’ɛtɛmwɛlɔ wa waa apɔsta kokanɛ, ɔtɛmwɛlɔ wa mɛtɛ wakashikikɛma nto. Ambeki wa Bible oko wakeyamaka Ɛmɛnyi wa Jehowa lo nshi shɔ, wakashihodia dimɛna didjango dia mbetɛ anto wa lo nkɛtɛ k’otondo ambeki. (Mateu 28:19, 20) Lo ɔnɔnyi 1914, akikɔ yɛdikɔ y’anto oko 5100 wakakambaka olimu w’esambishelo la ohetoheto, ndo lokumu l’ɔlɔlɔ lakasambishama lo wedja 68. Koko, Ambeki wa ntondo wa Bible asɔ koshihodia dimɛna kitshimudi ya Mateu 24:14. Lo ekomelo ka ntambe ka 19, Bible yaki la lokumu l’ɔlɔlɔ, kana evanjiliɔ, yakakadimwama ndo yakatondjama oma le atshunda wa Bible lo ɛtɛkɛta efula ndo yakakahanyema lo andja w’otondo. Ɔnkɔnɛ, lo edja ka ɛnɔnyi akumi, ambeki wa Bible wakɔsaka dia esambishelo ka lo wedja tshɛ kamboshilaka salema.
13, 14. Eokelo kakɔna ka shikaa ka lolango la Nzambi ndo ka asangwelo ande kakɛnyama lo Tshoto y’Etangelo ya lo ɔnɔnyi 1928?
13 Yema yema, Jehowa akasha ekambi ande eokelo k’oshika ka asangwelo ande. (Tukedi 4:18) Tshoto y’Etangelo ya Ngɔndɔ ka dikumi l’ahende 1, 1928 lo Angɛlɛ yakate ɔnɛ: “Onde sho koka mbuta ɔnɛ okahanyelo wa Bible ambokotsha dikambo diakatama dia sambisha evanjiliɔ wa Diolelo? Ndooko! Lâdiko dia okahanyelo ɔsɔ wa Bible ekɔ ohomba le djui ya tshitshɛ y’ɛmɛnyi waki Nzambi wa la nkɛtɛ dia vɔ tondja ekanda walembetshiya [sangwelo] diaki Nzambi ndo ntshɔ dia tenda anto wakawatshikɛ Bible. Otondonga vɔ kosala ngasɔ, anto totowoshihodia etena kakashikikɛma Diolelo dia Mɛsiya lo nshi yaso nyɛ.”
14 Tshoto y’Etangelo yakɔ shɔ yakate nto ɔnɛ: “Lo ɔnɔnyi 1920, . . . Ambeki wa Bible wakatatɛ nɔngɔsɔla eokelo kawɔ ka prɔfɛsiya kaki Nkumadiɔndjɔ katanema lo Mateu 24:14. Vɔ wakashihodia oma lâsɔ dia ‘evanjiliɔ ɔsɔ’ wakahombe sambishama lo nkɛtɛ k’otondo oko ɔmɛnyi le ase Wedja kana wedja tshɛ, komonga evanjiliɔ wa Diolelo diayoya koko evanjiliɔ wakɛnyaka dia Nkumekanga Mɛsiya akatatɛ mbolɛ nkɛtɛ k’otondo.”
15. Ngande wakahame olimu w’esambishelo tatɛ lo ɛnɔnyi 1920?
15 “Djui ya tshitshɛ y’ɛmɛnyi” yaki lo ɛnɔnyi 1920 shɔ kotshikala paka djui ya tshitshɛ tsho. Lo ɛnɔnyi akumi wakayele, “limba la wuki” la “ekoko ekina” wakayeyamaka ndo wakatatɛ la sanganyema. (Enyelo 7:9; Joani 10:16) Ɛlɔ kɛnɛ, ekɔ apandjudi 6 613 829 wasambisha lokumu l’ɔlɔlɔ lo wedja 235 wa la nkɛtɛ. Ande ekotshamelo ka diambo ka prɔfɛsiya kɛsɔ lee! “Lukumu l’ololo lone la diulelu” latasambishamaka lo yɛdikɔ ya ngasɔ. Ekambi wa kɔlamelo waki Jehowa watongaka efula ka ngasɔ lanɛ la nkɛtɛ.
16. Kakɔna kakasalema lo ɔnɔnyi w’olimu wetshi? (Enda lo alapɔlɔ w’olimu w’Ɛmɛnyi wa Jehowa wa l’andja w’otondo lo lɛkɛ 23-26.)
16 Vɔ tshɛ kâmɛ, olui a woke ɔsɔ w’Ɛmɛnyi wakakambe olimu efula lo ɔnɔnyi w’olimu 2005. Vɔ waketsha ndekana miliyara ɔtɔi ka wenya dia sambisha lokumu l’ɔlɔlɔ lo wedja 235. Miliyɔ ya waendelo w’eyoyo yakasalema, ndo wakalɔmbɔla miliyɔ ya wekelo wa Bible. Olimu ɔsɔ wakakambema oma le Ɛmɛnyi wa Jehowa, waketawɔ la lolango dia kamba la wenya ndo la ekundji awɔ dia sambisha anto akina Ɔtɛkɛta wa Nzambi. (Mateu 10:8) Oma lo wolo wa nyuma kande k’ekila, Jehowa ekɔ lo tetemala mbisha ekambi ande wolo wa vɔ kotsha lolango lande.—Zekariya 4:6.
Tosale la wolo dia sambisha
17. Ngande wakadimola ekambi wa Jehowa lo kɛnɛ kendana l’ɛtɛkɛta waki Yeso wa sambisha lokumu l’ɔlɔlɔ?
17 Kânga mbambeta suke la ɛnɔnyi 2000 tatɛ lam’akatɛkɛta Yeso dia lokumu l’ɔlɔlɔ layosambishama, ohetoheto wele l’ekambi wa Nzambi l’olimu ɔsɔ atakitakita. Sho mbeyaka dia oma lo woho watetemalaso dia ntsha akambo w’ɔlɔlɔ, sho kɛnɛmɔlaka waonga wa Nzambi wele oko ngandji, kɛtshi, ndo solo dia lotutsha. Oko nde, sho hatokombola dia kânga onto ndanyema koko sho kombolaka di’anto kadimola etema ndo ndjaokanya nto la Jehowa. (2 Koreto 5:18-20; 2 Petero 3:9) Oma l’ekimanyielo ka nyuma k’ekila kaki Nzambi, Ɛmɛnyi wa Jehowa wekɔ lo tetemala mbewoya lokumu l’ɔlɔlɔ la ohetoheto polo lo tokoma ta nkɛtɛ. (Romo 12:11) Etombelo wele la dui sɔ ele, anto wa l’ahole tshɛ wekɔ lo mbetawɔ akambo wa mɛtɛ ndo wekɔ lo ndjela ɛlɔmbwɛlɔ ka Jehowa koludi la ngandji. Tɔsɛdingole bɛnyɛlɔ dimɔtshi.
18, 19. Akambo akɔna amɔtshi wakete wakokayɛ mbuta w’anto amɔtshi waketawɔ lokumu l’ɔlɔlɔ?
18 Charles aki okambi wa dikambɔ lo owɛstɛ wa wodja wa Kenya. Lo ɔnɔnyi 1998 nde akasondja kilɔ ndekana 8 000 ya fɔka ndo wakawosha dipɔlɔmɛ dia Okambi wa fɔka woleki tshɛ. L’etena kakɔ kâmɛ, nde akatatɛ mbeka Bible. Kombeta edja nde akashihodia dia onto layasha l’olimu wa monɛ fɔka ekɔ lo mɔnyɔla didjango diaki Yeso dia nanga onyande. (Mateu 22:39) L’ɔkɔngɔ wa nde shihodia dia ‘okambi wa fɔka woleki tshɛ’ aki mɛtɛ ‘ondjakanyi woleki tshɛ,’ Charles akalanya fɔka yande lo mbitɛ asidɛ. Nde akahame polo ndo lo ndjakimɔ ndo batizama ndo kakianɛ nde ekɔ ombatshi mboka wa pondjo ndo okambi wakimanyiya.
19 Aha la tâmu Jehowa ekɔ lo sutshasutsha wedja oma l’olimu w’esambishelo wasalema l’andja w’otondo, ndo diangɔ di’oshinga a wolo, mbuta ate anto wekɔ lo ndja. (Hangai 2:7) Pedro ladjasɛ lo wodja wa Portugal, akɔtɔ lo seminɛrɛ lam’akinde la ɛnɔnyi 13. Oyango ande aki wa ndjala misiɔnɛrɛ ndo mbetsha anto Bible. Koko, l’ɔkɔngɔ wa tshanda mɔtshi, nde akamɔ oma lo seminɛrɛ nɛ dia lo kalasa wakatɛkɛtaka dia Bible paka lo pai. Ɛnɔnyi esamalo l’ɔkɔngɔ diko nde akatatɛ mbeka psychologie lo kalasa y’adidi ya la Lisbonne. Nde akadjasɛka la kosha nyango la womoto, laki Ɔmɛnyi wa Jehowa, lakokeketsha dia nde mbeka Bible. L’etena kɛsɔ, Pedro komonga la eshikikelo ɔnɛ Nzambi ekɔ, ndo nde kɔmbɔsa yɛdikɔ ya mbeka Bible kana bu. Nde akatɛ ombetsha ande wa psychologie kɛnɛ kendana la woho wakinde kokokaka mbɔsa tɛdikɔ. Ombetsha akawotɛ dia lo ndjela wetshelo wa psychologie onto lahakoke mbɔsa tɛdikɔ ekɔ onto lele suke dia ndjalanya. L’etena kɛsɔ, Pedro akɔsɛ yɛdikɔ ya mbeka Bible. Nde akabatizama atete edja ndo kakianɛ nde ekɔ lo mbeka l’anto Bible.
20. Lande na kakokaso ngɛnangɛna dia esambishelo ka lo wedja kambosalema lo yɛdikɔ y’efula ngasɔ?
20 Sho hateye polo lo yɛdikɔ yakɔna yele esambishelo ayoshama lo wedja, kana hateye lushi ndo wonya wayoya ekomelo. Sho mbeyaka tsho ɔnɛ tɔ kayoya esadi. Sho ngɛnangɛnaka nɛ dia esambishelo ka lokumu l’ɔlɔlɔ lo yɛdikɔ y’efula ya ngasɔ ekɔ djembetelo mɔtshi l’atei wa tolembetelo tɛnya ɔnɛ etena kambosukana ka Diolelo dia Nzambi pɛna waolelo w’ana w’anto. (Danyele 2:44) Ɔnɔnyi tshɛ weta, miliyɔ y’anto wekɔ lo kondja diaaso dia mbetawɔ lokumu l’ɔlɔlɔ, ndo dui sɔ ngɛnyangɛnyaka Jehowa Nzambi kaso. Tɔshi yɛdikɔ ya tshikala la kɔlamelo kâmɛ la anangɛso wa l’andja w’otondo dia tetemala ndjasha efula l’olimu wa sambisha lo wedja tshɛ. Lo ntsha ngasɔ, tayoyashimbɛ shoamɛ ndo anto watohokamɛ.—1 Timote 4:16.
Onde wɛ âkohɔ?
• Lande na kele Mateu 24:14 ekɔ prɔfɛsiya ka diambo?
• Welo akɔna wakadje Akristo wa lo ntambe ka ntondo dia sambisha, ndo etombelo akɔna wakayala?
• Ngande wakayokomaka Ambeki wa Bible lo shihodia ohomba wa sambisha lo wedja tshɛ?
• Lo sɛdingola alapɔlɔ w’olimu w’ekambi waki Jehowa w’ɔnɔnyi wetshi, kakɔna kakâmbiya?
[Tablo ka lo lɛkɛ 23-26]
ALAPƆLƆ W’OLIMU W’ƐMƐNYI WA JEHOWA WA L’ANDJA W’OTONDO 2005
(Enda okanda)
[Kartɛ/Esato wa lo lɛkɛ 21]
Paulo akande lɔkɛndɔ la nunu dia kilɔmɛtɛlɛ l’ashi a wake ndo l’okongo dia sambisha lokumu l’ɔlɔlɔ
[Osato wa lo lɛkɛ 20]
Jehowa akalɔmbɔla Petero dia nde tosambisha Kɔnɛliyɔ nde la nkumbo kande