Etena Kele “Ndoko Lɔpɛpɛ Lele Lɔpɛpɛ la Dimɛna”
“NAKA onto heye otsha lo dibongo diatandatshu, kete ndoko lɔpɛpɛ lele lɔpɛpɛ la dimɛna.” Ɛtɛkɛta ɛsɔ, wakate Lucius Annaeus Seneca, nomb’ewo kɛmɔtshi k’Ose Rɔmɔ ka l’eleko ka ntondo, shikikɛka dikambo dia mɛtɛ diambeyama edja efula: Dia lɔsɛnɔ mbɛlɛ lo mboka kɛmɔtshi, ekɔ ohomba dia ndjâla l’eyango.
Koko, mbala efula, lɔsɛnɔ kema l’oyango. Anto efula ngɛnangɛnaka paka dia mbewɔ ave la ponganɛndji ya lo lɔsɛnɔ la lushi la lushi. Lam’ele vɔ hawɛkami ndoko lɛkɛ, vɔ wamboyala oko asuku w’ashi ‘wasokoyama l’etena kɛmɔtshi la wasutshasutshama la lɔpɛpɛ l’etena kekina.’ (Jakoba 1:6) Le anto wa ngasɔ, “ndoko lɔpɛpɛ lele lɔpɛpɛ la dimɛna.”
Bible ekɔ la diɛnyɛlɔ di’anto waki l’eyango wa shikaa, ɔnkɔnɛ, vɔ wakatotshikɛ ɛnyɛlɔ ka sho ndjela ɛlɔ kɛnɛ. Mɔsɛ “akalungamelaka difutu diayayi.” (Heberu 11:26) Paulo akafunde ate: “Dimi lambolawɛɛ kɛnɛ kayangami, dya dimi nkon[d]ja lofuto.” Nde akakeketsha anyande ambetawudi dia vɔ ndjâla la ‘yimba yakɔ yâmɛ.’—Filipi 3:14, 15, “Dyookaneelo dy’oyooyo.”
Oko woshikikadi asho aso lo alaka wa lo Bible, nyɛsɔ tokoya mbetawɔ k’anto wa ngasɔ waki l’oyango wa shikaa.—Ɛdika la Heberu 13:7.
Kânga l’atei w’andja ɔnɛ wambofukutana, wɛ kokaka monga l’ɔngɛnɔngɛnɔ oma l’ewo k’oshika ka Bible k’endana la Nzambi, la Diolelo diande, ndo la sangwelo diande di’ɔlɔlɔ diakandasangoya dikambo di’anto. Naka wɛ nangaka mbeya awui akina wa lâdiko kana onto ɔmɔtshi ndja dia ndjokêtsha Bible lakayɛ aha la kɔlɔmba falanga, fundɛ Association “Les Témoins de Jéhovah” mukanda lo dihole diɛnayɛ ɔlɔlɔ lo lɛkɛ 2.
[Caption on page 32]
Onde Wɛ Nangaka Onto Ndja dia Ndjokenda Oka?