Onde Wɛ Amboshimbamela?

LUSHI lɔmɔtshi, lam’akatetetaka Johnny lo dihole diatanɛka anto diangɔ dia sondja, lâsɔ ko nde ele l’ɛnɔnyi dikumi, pami kɛmɔtshi akawemadja ko akawombola ate: “Dikɛnda, wɛ ambetawɔ Yeso Kristo oko Nkumɛyɛ la Oshimbedi ayɛ?” Ɔsɔ aki oko dimbola di’ekanda sɔdu le Johnny, nɛ dia nde oketawɔka Yeso nshi tshɛ. Diɔ diakɔ diakandôkadimola ate: “Eelo, dimi mbetawɔka.” Ko pami kɛsɔ akahangɔhangɔ ate: “Nyotombole Nkumadiɔndjɔ! Anima okina wamboshimbamela lo dikambo dia Kristo!”

Onde ngasɔ oto mbakondja onto panda? Onde Johnny ‘akashimbamela’ tatɛ oma l’etena kakandate ɛtɛkɛta ɛsɔ, oyadi kɛnɛ tshɛ kakandayosala nshi kina lo lɔsɛnɔ lande? Efula k’anto wahashɛ akambo wele l’etema awɔ wayokadimola vate: eelo. Tokatshikatshi tɔmɔtshi ta l’ɛtɛmwɛlɔ mbutaka di’onto funda datɛ ‘diakandashimbamela’ ɔnɛ kele atodiohɛke.

Owandji ɔmɔtshi w’ɔtɛmwɛlɔ akafunde ate: “L’etena kata onto l’onyɔ oto ate lambetawɔ Kristo . . . lɔsɛnɔ lande la lo nshi yayaye lamboshila kongɛma pondjo pondjo.” Nde akate ate Bible mbutaka ɔnɛ panda k’onto nemanɛka tsho la ‘woho wakandate mbala kâmɛ l’onyɔ oto ate: lekɔ la mbetawɔ, koko aha lo tetemala mɛnya mbetawɔ kakɔ.’ Ofundji okina wa l’ɔtɛmwɛlɔ ɔmɔtshi akafunde ate: “Dikambo sɔ diekɔ olimu wamboshidiyama. Wɛ amboshilaka kondja panda . . . ‘Ta diayɛ diambokomɛ.’ ‘Pɛkato yayɛ yambodimanyiyama.’ ” Koko, kânga anto wayashikikɛ ɔnɛ dikambo sɔ diekɔ mɛtɛ mbeyaka mɛna okakatanu ɔmɔtshi lanɛ. Mɛnamaka hwe dia, anto efula wakawatɛ ɔnɛ nyu ‘nyamboshimbamela’ kema la lɔsɛnɔ lɔtɔnganɛ la Bible. Anto efula mbutaka ɔnɛ ondo mɛtɛ vɔ ‘kombetawɔ’ Kristo.

Ko lâsɔ, “mbetawɔ” Yeso kɛdikɛdi na mɛtɛ? Onde woho wakayate l’onyɔ tsho mbala kɛmɔtshi wate lekɔ la mbetawɔ, ko kana ekɔ yoho ya lɔsɛnɔ yatatetemala tsho? Onde sho pombaka monga la mbetawɔ ka wolo efula katotshutshuya dia sho kiɛnya l’etsha? Onde sho kokaka mbetawɔ ɛlɔlɔ w’oma l’olambo wa Yeso aha la kondja ɔkɛndɛ wa tetemala mboyela?

Anto efula nangaka kondja ɛtshɔkɔ koko aha ɔkɛndɛ wa ndjela Yeso ndo kitanyiya awui ande. Mɛtɛ, tshɛkɛta “kitanyiya” mbatshindjaka timba mbala efula. Koko Yeso akate ate: ‘Oye, ondjele.’ (Luka 18:​18-23) Ndo Bible mbutaka ɔnɛ: ‘Wanɛ wahakitanyiya lokumu l’ɔlɔlɔ l’endana la Nkumɛso Yeso . . . wayolongola dilanya di’elanyelo ka pondjo.’​—⁠2 Tesalonika 1:​8, 9; Mateu 10:38; 16:⁠24.

Bible mbutaka akambo efula wonyiya wembola wa weke w’endana la kɛnɛ kaketshama anto lo dikambo dia panda. Naka wɛ nangaka mbeya kɛnɛ kata Bible mɛtɛ lo dikambo sɔ, kete wɛ kokaka kondja tokanyi t’eshika lo Tshoto y’Etangelo ya Yâta Afusa 1, 1995 (lo Falase), lɛkɛ 4-9. Fola Bible kayɛ, ala avɛsa woshilami dia wɛ mɛna kɛnɛ kakalakanya Yeso nde l’apɔstɔlɔ ande lo dikambo sɔ.