Tetemala la pɛtshahɛtsha ‘elongamelo kayɛ ka panda’!
‘Tɔlɔtɛ . . . elongamelo ka panda oko lofulɛ.’—1 TESALONIKA 5:8.
1. Ngande watokimanya ‘elongamelo ka panda’ dia sho tetemala?
ELONGAMELO ka panda kokaka kimanyiya onto dia tetemala kânga lam’ende l’atei w’ekakatanu woleki tshɛ wolo. Onto lamombɔ lo wato kana lo masuwa ko havwe, latsha tshɛ di’aha dinda kokaka tetemala edja efula naka nde mbeyaka ɔnɛ kem’edja nde ayanga kondja ekimanyielo. Yoho yakɔ yâmɛ, aya nunu di’ɛnɔnyi, elongamelo ka ‘panda ka Jehowa’ kakasukɛ apami ndo wamato wa mbetawɔ lo tena di’efukutanu, koko elongamelo kɛsɔ kombasha sɔnyi ndoko lushi. (Etumbelu 14:13; Osambu 3:8; Romo 5:5; 9:33) Ɔpɔstɔlɔ Paulo akɛdika ‘elongamelo ka panda’ la ‘lofulɛ’ l’ɔlɔtɔ wa ta w’Okristo wa lo nyuma. (1 Tesalonika 5:8; Efeso 6:17) Eelo, woho wayashikikɛso ɔnɛ Nzambi ayotoshimbɛ kokɛka akoka aso w’ekanelo ka yimba ndo tokimanyiyaka dia nama yimba yaso ɔlɔlɔ kânga lam’eso l’atei wa mpokoso, lam’eso lo ndɔshama ndo lam’eso l’atei w’ehemba.
2. Lo toho takɔna tele ‘elongamelo ka panda’ etshina ka wetshelo ka l’ɔtɛmwɛlɔ wa mɛtɛ?
2 Dibuku dielɛwɔ The International Standard Bible Encyclopedia mbutaka ɔnɛ: “Apanganu,” mbut’ate, anto wakadinge Akristo wa lo ntambe ka ntondo “komonga l’elongamelo kendana la lɔsɛnɔ la lo nshi yayaye.” (Efeso 2:12; 1 Tesalonika 4:13) Eelo, ‘elongamelo ka panda,’ ekɔ etshina kɛmɔtshi ka wetshelo wa l’ɔtɛmwɛlɔ wa mɛtɛ. Lo woho akɔna na? Ntondotondo, panda k’ekambi wa Jehowa nemanɛka la lokombo lakinde. Asafɛ, omembi w’esambo akalɔmbɛ ate: “We [Nzambi k]a panda kasu, utukimanyia dia lukumbu laye ntumbwama. Ututshunguli.” (Osambu 79:9; Ezekiyele 20:9) Ndo nto, monga l’eshikikelo ɔnɛ tayokondja ɛtshɔkɔ watolaka Jehowa ekɔ ohomba efula dia monga la diɔtɔnganelo di’ɔlɔlɔ la nde. Paulo akafunde ate: “Untu laha la mbetawo, heyi mbôngenyangenya. Ne dia dieli la one layuya le [Nzambi] mbetawo ati: Ndi eko, la ndi keli ufutshi a wane tshe watûyangaka.” (Heberu 11:6) Lâdiko dia lâsɔ, Paulo akalembetshiya ɔnɛ ɔkɔkɔ wa woke wakaye Yeso la nkɛtɛ ele dia ndjoshimbɛ wanɛ wayatshumoya. Nde akate ate: “Diui dia kolamelu ne, ndu diakuka antu tshe mbetawo, vati: Kristu Jesu akaye la kete dia ndjushimbela antu wa kolo.” (1 Timote 1:15) Ndo ɔpɔstɔlɔ Petero akatɛkɛta dia panda oko ‘ekomelo [kana difuto] dia mbetawɔ kaso.’ (1 Petero 1:9) Mbokɛmaka hwe dia sunganaka sho nongamɛ kondja panda. Ko elɛwɔ panda mɛtɛ na? Ndo kakɔna kalɔmbama di’onto kikondja?
Elɛwɔ panda na?
3. Naa woho wa panda kakakondja ekambi wa Jehowa wa lo nshi yakete?
3 L’Afundelo wa Hɛbɛru, ‘panda,’ nembetshiyaka mbala efula shimbɛ kana tshungola onto oma lo shɔkɔ kana oma lo dikambo dimɔtshi dia ngala, kana oma lo nyɔi k’omamandji. Oko ɛnyɛlɔ, lo mbelɛ Jehowa ɔnɛ ‘Otshungodi,’ Davidi akate ate: “[Nzambi] eli dive diami dia wuki, . . . la eshamelu kami. We Ushimbedi ami, we katunshimbelaka uma l’akambu wa wulu. Dimi layuhangohangoka nti: [Jehowa] atumbwami! Ku layushimbamela uma le atunyi ami.” (2 Samuele 22:2-4) Davidi akeyaka ɔnɛ Jehowa mpokamɛka etena kawolelɛ ekambi ande wa kɔlamelo dia kondja ekimanyielo.—Osambu 31:22, 23; 145:19.
4. Naa elongamelo kendana la lɔsɛnɔ la lo nshi yayaye kaki l’ekambi wa Jehowa wakasɛnaka la ntondo ka Kristo ndja la nkɛtɛ na?
4 Ndo ekambi wa Jehowa wakasɛnaka la ntondo ka Kristo ndja la nkɛtɛ mbaki l’elongamelo ka lɔsɛnɔ la lo nshi yayaye. (Jobo 14:13-15; Isaya 25:8; Danyele 12:13) Koko, efula k’alaka w’etshungwelo wele l’Afundelo wa Hɛbɛru waki didjidji dia panda ka woke, mbut’ate, kɛnɛ katɔla otsha lo lɔsɛnɔ la pondjo. (Isaya 49:6, 8; Etsha 13:47; 2 Koreto 6:2) Lo nshi ya Yeso, ase Juda efula wakalongamɛka lɔsɛnɔ la pondjo, koko wakatone mbetawɔ Yeso oko sapi k’elongamelo kawɔ. Yeso akatɛ ewandji w’ɛtɛmwɛlɔ wa lo nshi yande ɔnɛ: “Nyu nyatuyangiayangiaka l’afundelu, ne dia nyu nyatukanaka nyati: Leko kesu la lumu la pundju; ndu afundelu ntu [mbutaka dikambo diami].”—Joani 5:39.
5. Elɛwɔ Panda mɛtɛ na?
5 Lo tshimbo ya Yeso, Nzambi akasholɛ anto kɛnɛ kalembetshiya mɛtɛ panda. Tɔ nembetshiyaka tshungɔ oma lo lɔhɔmbɔ la pɛkato, oma l’ɛtɛmwɛlɔ wa kashi, oma l’andja ɔnɛ walɔmbɔma oma le Satana, oma lo wɔma w’onto, ndo oma lo wɔma wa nyɔi. (Joani 17:16; Romo 8:2; Kolosai 1:13; Enyelo 18:2, 4) Lo mɛtɛ, le ekambi waki Nzambi wa kɔlamelo, kondja panda oma le Nzambi, halembetshiya tsho tshungɔ oma lo shɔkɔ l’asui koko nembetshiyaka nto monga la diaaso dia kondja lɔsɛnɔ la pondjo. (Joani 6:40; 17:3) Yeso aketsha ɔnɛ le ‘lemba la tshitshɛ l’ɛkɔkɔ,’ panda nembetshiyaka mbolwama otsha lo lɔsɛnɔ la l’olongo dia tôlɛ kâmɛ la Kristo lo Diolelo. (Luka 12:32) Le anto akina, panda kɛdikɛdi nyomonga la lɔsɛnɔ la kokele ndo la diɔtɔnganelo dia kokele lam’asaso la Nzambi, mbut’ate, woho wa lɔsɛnɔ ndo woho wa diɔtɔnganelo diaki l’Adama l’Eva lam’asawɔ la Nzambi lo ekambɔ k’Ɛdɛna la ntondo ka vɔ ntsha pɛkato. (Etsha 3:21; Efeso 1:10) Sangwelo dia ntondo diaki Nzambi aki di’anto monga la lɔsɛnɔ la pondjo lo paradiso ka ngasɔ. (Etatelu 1:28; Mako 10:30) Ko ngande wakoka anto ndjonga la woho wa lɔsɛnɔ la ngasɔ na?
Tshungo ekɔ etshina ka panda
6, 7. Ɔkɛndɛ akɔna wele la Yeso lo kɛnɛ kendana la panda kaso?
6 Paka oma lo tshimbo y’olambo wa tshungo waki Kristo mbakoka onto kondja panda ka pondjo. Lande na na? Bible nembetshiyaka ɔnɛ, lam’akatshe Adama pɛkato, nde ‘akayasondja’ ndo akasondja ana tshɛ wakandayohomba mbota, kâmɛ ndo sho, lo pɛkato, ɔnkɔnɛ, tshungo kaki ohomba di’anto monga l’elongamelo k’oshika. (Romo 5:14, 15; 7:14) Elambo wa nyama wakalambolaka anto lo ndjela Ɛlɛmbɛ wa Mɔsɛ akɛnyaka dia Nzambi ayosha anto tshɛ tshungo. (Heberu 10:1-10; 1 Joani 2:2) Olambo waki Yeso mbakahombe ndjokomiya elambo ɛsɔ wa waa nyama. La ntondo ka Yeso mbotɔ, ondjelo wa Jehowa akate ate: ‘Nde ayoshimbela anto ande oma lo pɛkato yawɔ.’—Mateu 1:21; Heberu 2:10.
7 Yeso akotɔ lo dihindo oma le Mariya, womoto l’emuma, ndo oko wakinde Ɔna Nzambi, nde kokita nyɔi k’oma le Adama. Woho wakinde kokita nyɔi k’oma le Adama ndo kɔlamelo yande ya kokele akasha lɔsɛnɔ lande nɛmɔ diaki ohomba dia tshungola anto oma lo pɛkato la nyɔi. (Joani 8:36; 1 Koreto 15:22) Otshikitanyi l’anto akina tshɛ, Yeso takandahombe mvɔ l’ɔtɛ wa pɛkato. Nde akaye la nkɛtɛ l’oyango wa ‘kimɔ anima ande oko tshungo dikambo di’anto efula.’ (Mateu 20:28) Lo ntsha ngasɔ, Yeso ɔnɛ lakolwama ndo lakahema l’okudi aya kakianɛ l’akoka wa mbisha panda le anto tshɛ wakotsha kɛnɛ kalɔmba Nzambi.—Enyelo 12:10.
Kakɔna kalɔmbama dia kondja panda na?
8, 9. (a) Ngande wakakadimola Yeso owandji ɔmɔtshi wa dikɛnda w’ɔngɔnyi lo kɛnɛ kendana la panda? (b) Ngande wakakambe Yeso la diaaso sɔ dia mbisha ambeki ande wetshelo?
8 Lushi lɔmɔtshi, owanddji ɔmɔtshi wa dikɛnda w’ɔngɔnyi w’ose Isariyɛlɛ akambola Yeso ate: “Kayumutsha dia dimi nkita lumu la pundju?” (Mako 10:17) Ondo dimbola diande sɔ akɛnyaka kanyi yaki l’ase Juda wa l’etena kɛsɔ, kanyi y’ɔnɛ Nzambi nɔmbaka anto dia ntsha akambo amɔtshi w’ɛlɔlɔ, ndo lo ntsha akambo akɔ lo yɛdikɔ mɔtshi yakoka, onto kokaka nongamɛ kondja panda oma le Nzambi. Koko, omamemelo wa ngasɔ akakokaka ndja oma lo nsaki yawɔ ya lokaki. Weho w’etsha ɛsɔ kombisha anto elongamelo k’oshika, nɛ dia anto waha kokele hawokoke kitanyiya ɛlɛmbɛ tshɛ waki Nzambi.
9 Dia kadimola pami kɛsɔ, Yeso akawohola tsho ɔnɛ nde pombaka kitanyiya adjango waki Nzambi. Owandji ɔsɔ wa dikɛnda akashikikɛ Yeso esadi eto ɔnɛ nde okâkitanyiyaka oma ko dikɛnda diande. Okadimwelo ande akatshutshuya Yeso dia mbôka ngandji. Yeso akawotɛ ate: “Dikambu otoi mbambutshikala le ye. Utshu, utusundja diango dieli la ye, kusha akanga a weula, ku we ayuyala la diango l’ulungu. Kuyi, kuyundjeli.” Koko, ɔlɔngɔ a pami ɔsɔ, akatshu la lonyangu la mamba, “ne dia ndi aki kanga diango efula.” L’ɔkɔngɔ diko, Yeso akatɛtɛ ambeki ande dia naka onto ayoyakimɔ tshɛ dia kondja lomombo la l’andja ɔnɛ, kete dikambo sɔ mbeyaka monga tshondo ya wekamu dia nde kondja panda. Nde akate nto ate ndoko onto lakoka kondja panda oma lo weolo ande ndamɛ. Koko, Yeso akashikikɛ ate: “Le antu, dikambu ne hadieyama ntshama, keli le [Nzambi] kema osoku. Akambu tshe mbeyaka ntshama le [Nzambi].” (Mako 10:18-27; Luka 18:18-23) Ngande wakoka onto kondja panda na?
10. Akambo akɔna wahombaso kotsha dia kondja panda?
10 Panda ekɔ woshasha w’oma le Nzambi, koko hawokikondja lo wɔndjɔkɔmbɔ. (Romo 6:23) Ekɔ etondo ɛmɔtshi w’akambo wahomba onto kotsha dia nde kondja woshasha ɔsɔ. Yeso akate ate: “Ne dia [Nzambi] akalangi wa la kete utamanya, mbakandawasha On’andi etoi lakanduti, dia untu tshe lawetawo, tavokaki, keli ayali la lumu la pundju.” Ndo ɔpɔstɔlɔ Joani akakotsha ate: “One letawo Ona, eko la lumu la pundju. Keli one lahakitanyia diui dia Ona, henyi lumu la pundju.” (Joani 3:16, 36) Mbokɛmaka dia, Nzambi nɔmbaka di’onto tshɛ lalongamɛ kondja panda ka pondjo pombaka monga la mbetawɔ ndo l’okitanyiya. Onto tshɛ pombaka mbɔsa yɛdikɔ ya mbetawɔ tshungo ndo ndjela wanya wa Yeso.
11. Ngande wakoka onto lele bu kokele mbetawɔma le Jehowa?
11 Lam’ele sho bu kokele, hatotongaka wonya tshɛ suke dia kitanyiya kɛnɛ katɔlɔmbawɔ ndo ekɔ wolo dia sho kitanyiya tshɛ katɔlɔmbawɔ. Diɔ diakɔ diakatosha Jehowa tshungo dia komba pɛkato yaso. Koko, sho la dia tetemala ntsha tshɛ dia sɛna yoho yɔtɔnganɛ la mboka ya Nzambi. Oko wakatɛ Yeso owandji wa dikɛnda w’ɔngɔnyi, sho la dia tetemala nama ɛlɛmbɛ wa Nzambi. Naka tayotsha ngasɔ, kete tayetawɔma le Nzambi ndo tayonga l’ɔngɛnɔngɛnɔ w’efula, nɛ dia ‘ɛlɛmbɛ ande kema wotsho,’ vɔ wekɔ ‘ekeketshelo.’ (1 Joani 5:3; Tukedi 3:1, 8) Koko, kema wɔdu di’onto tetemala la monga l’elongamelo ka panda.
‘Tɔlɔ ta dia wolo dikambo dia mbetawɔ’
12. Ngande wakoka elongamelo ka panda keketsha Okristo dia nde shika ekolo la ntondo k’ehemba wendana l’awui wa mindo?
12 Ombeki Judɛ akalange fundɛ Akristo wa ntondo lo kɛnɛ kendana la ‘panda kaki lawɔ vɔ tshɛ.’ Koko, akambo wa kɔlɔ wakakokanɛ le anto wa l’etena kɛsɔ akôtshutshuya dia nde fundɛ anango asɔ dia vɔ ‘ndɔ ta dia wolo dikambo dia mbetawɔ.’ Eelo, dia kondja panda, hatohombe tsho monga la mbetawɔ, kana kukutɛ mbetawɔ ka mɛtɛ k’Akristo, ndo monga l’okitanyiya etena katatshu akambo tshɛ dimɛna to. Omamemelo aso le Jehowa pombaka monga la wolo efula dia tokimanyiya woho wa shika ekolo la ntondo k’ehemba ndo ka tɔsɛngiya ta mindo. Eelo, awui wa mindo wa dieyanelo ndo wa sɔnyi, diɔnyɔ dia lowandji, diatɔnelo, ndo tamu, aki akambo wakalanyaka timba ndo lɔkɛwɔ l’ɔlɔlɔ la etshumanelo ka lo ntambe ka ntondo. Dia mbakimanyiya woho wa vɔ ndɔshana la tɔsɛngiya tɔsɔ, Judɛ akakɔkɔmiya anyande Akristo dia vɔ mbohɔka nshi tshɛ oyango awɔ, lo mbatɛ ate: ‘Elangimi ami, lo ndjakeketsha nyamɛ lo mbetawɔ kanyu k’ekila koleki, ndo lo nɔmba la nyuma k’ekila, nyoshikimale lo ngandji ka Nzambi, lo konga kɛtshi ka Nkumadiɔndjɔ Yeso Kristo la kanyi ya kondja lɔsɛnɔ la pondjo.’ (Jude 3, 4, 8, 19-21) Elongamelo ka kondja panda akakoke mbakeketsha lo ta diakawalɔka dia tshikala la lɔkɛwɔ la pudipudi.
13. Ngande wakokaso mɛnya ɔnɛ hatoshishisha oyango wa ngandji k’otamanya kaki Nzambi na?
13 Jehowa Nzambi nongamɛka dia wanɛ wayondosha panda monga la lɔkɛwɔ l’ɔlɔlɔ. (1 Koreto 6:9, 10) Koko, ndjela ɛlɛmbɛ waki Nzambi wendana la lɔkɛwɔ l’ɔlɔlɔ, hɛnya dia taya wanɛ walombosha anto akina. Aha sho mbɔsa yɛdikɔ lo kɛnɛ kendana l’ekomelo ka pondjo kaki anyaso anto. Koko, Nzambi mbayotsha dikambo sɔ, oko wakatɛ Paulo ase Ngirika wa l’Atɛna ate: “Ndi akasonola lushi la numbuya wa la kete, uku elumbwelu k’ololo l’anya w’untu lakandasonola,” mbut’ate, Yeso Kristo. (Etsha 17:31; Joani 5:22) Naka tayɔsɛnaka lo monga la mbetawɔ lo tshungo kakakimɔ Yeso, kete hatotoka oyelo wa lushi l’elombwelo wɔma. (Heberu 10:38, 39) Kɛnɛ kele ohomba tɔ kɛnɛ: hatohombe pondjo ‘mbetawɔ ngandji k’otamanya kaki Nzambi [diokanelo diasaso la nde l’ekimanyielo ka tshungo] ko ndjoshisha oyango atɔ,’ lo kotwama la tokanyi kana la lɔkɛwɔ la kɔlɔ. (2 Koreto 6:1) Ndo nto, lo kimanyiya anto akina dia kondja panda, sho mɛnyaka dia hatoshisha oyango wa kɛtshi kaki Nzambi. Ngande wakokaso mbakimanyiya na?
Lo mbaewoya elongamelo ka panda
14, 15. Yeso waa na wakandasha ɔkɛndɛ wa mbewoya lokumu l’ɔlɔlɔ la panda?
14 Lo vusola kɛnɛ kakate omvutshi Yɔɛlɛ, Paulo akafunde ate: ‘Onto tshɛ latɛndɛ lokombo la Jehowa ayoshimbamɛ.’ Ko nde ndjota nto ate: “Keli, ukundi ayuweya [tɛndɛ] one lahawatetawo? Ukundi eyawo mbêtawo, lam’ahawatuki lukumu landi? Ukundi eyawo mbuka, lam’ahawo la usambisha?” Lo avɛsa amɔtshi angana wayela, Paulo ambɛnya ɔnɛ mbetawɔ haye mbala kakɔ ɔtɔi, koko tɔ ‘ndjelaka kɛnɛ kahokamɛ onto,’ mbut’ate, ‘ɔtɛkɛta wendana la Kristo.’—Romo 10:13, 14, 17; Joele 2:32.
15 Akɔna ayɛmbɛ ase wedja ‘ɔtɛkɛta wendana la Kristo’ na? Yeso akasha ambeki ande olimu ɔsɔ, mbut’ate, wanɛ waketshama ‘ɔtɛkɛta’ akɔ. (Mateu 24:14; 28:19, 20; Joani 17:20) Lam’ayakimɔso l’olimu w’esambishelo ka Diolelo ndo wa mbetɛ anto ambeki, sho ntshaka kɛnɛ kakafunde ɔpɔstɔlɔ Paulo lo dikambo di’olimu ɔsɔ, mbala kɛnɛ lo vusola ɛtɛkɛta waki Isaya wata ɔnɛ: ‘Nde amɛna wele ekolo a wanɛ wasambisha lokumu l’ɔlɔlɔ l’akambo w’ɔlɔlɔ lee!’ Oyadi kânga anto efula hawetawɔ lokumu l’ɔlɔlɔ lawaɛmbɛso, ekolo aso mongaka ‘amɛna ato’ la ntondo ka Jehowa.—Romo 10:15; Isaya 52:7.
16, 17. Naa eyango ehende wele l’olimu aso w’esambishelo?
16 Lam’akambaso olimu ɔsɔ, sho kotshaka eyango ehende w’ohomba. Ntondotondo, lokumu l’ɔlɔlɔ pombaka sambishama dia lokombo la Nzambi tombwama ndo wanɛ walanga kondja panda mbeya lɛnɛ ahombawɔ mbɛlɛ. Paulo akeye ohomba w’olimu ɔsɔ. Nde akate ate: “Ne dia [Jehowa] akatosengola okone ati: Dimi lambukukitsha usasi w’asi wedja, dia we ndjala panda le antu, edja ndu la kuma ka kete.” Omalɔkɔ, oko weso ambeki wa Kristo, sho tshɛ pombaka mbewoya anto losango la panda.—Etsha 13:47; Isaya 49:6.
17 Dui dia hende, esambishelo ka lokumu l’ɔlɔlɔ ekɔ lo mpika etshina k’elombwelo kaki Nzambi kosembwe. Lo kɛnɛ kendana l’elombwelo kɛsɔ, Yeso akate ate: “Lam’ayuya On’a untu lu lutumbu landi, la andjelo tshe kame la ndi, ndi ayudjase lu kiti ka diulelu ka lutumbu landi. Wedja tshe wayusangana la ntundu kandi, ku ndi ayuwatanya uku atatanyaka ulami ekoko la mbudi.” Kânga mbayosalema elombwelo la okakitwanelo ɔsɔ ‘lam’ayoya Ɔn’onto lo lotombo lande,’ ɛlɔ kɛnɛ, olimu w’esambishelo ekɔ lo mbisha anto diaaso dia vɔ mbetawɔ anango Kristo wa lo nyuma ndo mbasukɛ nɛ dia panda kawɔ ka pondjo nemanɛka la dikambo sɔ.—Mateu 25:31-46.
Totetemale ‘ndjashikikɛ tshɛ lo elongamelo’
18. Ngande wakokaso tetemala pɛtshahɛtsha ‘elongamelo kaso ka panda’?
18 Woho wayakimɔso la waasaso tshɛ l’olimu w’esambishelo ekɔ yoho mɔtshi yatokimanyiya dia sho tetemala pɛtshahɛtsha elongamelo kaso. Paulo akafunde ate: “Shu nangaka nyu tshe untu l’untu ntetemala dia ndjala la ukalanganu one lu akambu tshe w’elungamelu edja ndu l’ekumelu.” (Heberu 6:11) Ɔnkɔnɛ, nyɛsɔ sho tshɛ tɔlɔtɛ ‘lofulɛ l’elongamelo ka panda,’ lo mbohɔka ɔnɛ “[Nzambi] kuntosonola dia ntusuya la kele, keli dia ntusha panda le Khumesu Jesu Kristu.” (1 Tesalonika 5:8, 9) Nyɛsɔ ndo sho lawɔ tɔshi dako diaki Petero nɛ la nɛmɔ, diɔ mbutaka ɔnɛ: “Okone nyolongosole timba tanyu, nyuyali ki. Nyushikike elungamelu kanyu lu ngandji ka mamba kayuwunyusha.” (1 Petero 1:13) Wanɛ tshɛ watsha ngasɔ wayɛna nganɛ wayokotshama ‘elongamelo kawɔ ka panda’ tshɛ lo tshɛ!
19. Kakɔna kayotɛna lo sawo diayela?
19 L’etena kakatakongɛ kɛnɛ, ngande wahombaso mbɔsa yema y’etena kambotshikalɛ andja ɔnɛ na? Ngande wakokaso kamba l’etena kɛsɔ dia ndjakondjɛ panda ndo kikondjɛ anto akina na? Wembola ɛsɔ mbayotɔsɛdingola lo sawo diayela.
Onde wɛ kokaka nembetshiya?
• Bonde kahombaso tetemala pɛtshahɛtsha ‘elongamelo kaso ka panda’?
• Panda kɛdikɛdi na?
• Ahombaso ntsha dia kondja woshasha wa panda?
• Lo ndjela sangwelo diaki Nzambi, kakɔna kakotsha olimu aso w’esambishelo?
[Esato wa lo lɛkɛ 24]
Panda halembetshiya tsho tshungɔ oma l’elanyelo