Wembola oma le ambadi

Polo lo yɛdikɔ yakɔna yendana Akristo ɛlɔ kɛnɛ l’ɛlɛmbɛ wa diwala dia lam’asa wanɛ wotɔ wakadjama l’Ɛlɛmbɛ wa Mɔsɛ na?

Ɛlɛmbɛ wakasha Jehowa wodja w’Isariyɛlɛ kɔtɛkɛtaka oseka kiambokambo tshɛ lo kɛnɛ kendana l’awui wa diwala. Koko, vɔ wakasekɛka weho ɛmɔtshi w’awala. Ɛnyɛlɔ, l’​Akambu w’Asi Lewi 18:6-20, sho tanaka dia dieyanelo diakasekɛma lam’asa ‘wanɛ wotɔ.’ Divɛsa sɔ mɛnyaka weho w’anto akɔna wotɔ waki kopombaka mbeyana lam’asawɔ. Lo mɛtɛ, Akristo kema l’ɛse k’Ɛlɛmbɛ wa Mɔsɛ kana kema l’ɔkɛndɛ wa ndjela kɛnɛ kadjangawɔ lɔkɔ. (Efeso 2:15; Kolosai 2:14) Kânga mbediɔ ɔsɔku, dui sɔ hadiɛnya di’Akristo koka minya yimba lo dikambo sɔ etena kasɔnawɔ onto la tshuka. Ekɔ awui efula wɛnya bonde kahawahombe sala ngasɔ.

Ntondotondo, ekɔ ɛlɛmbɛ ɛmɔtshi wakadje anto wasekɛ diwala dia lam’asa wanɛ wotɔ, ndo Akristo nɔmbamaka dia kitanyiya ɛlɛmbɛ wa lo wodja wodjashiwɔ. (Mateu 22:21; Romo 13:1) Lo mɛtɛ, ɛlɛmbɛ ɛsɔ tshikitanaka lo dihole la dihole. Ɛlɛmbɛ efula wa nshi nyɛ wa woho ɔsɔ mbidjaka yimba ntondo lo dikambo dia diwutshi. Dikambo dimɔtshi dieyama efula ele, diwala dia lam’asa wanɛ wotɔ koka konya di’ana mbotɔ la dikɔmɔ kana mongaka tohemɔ hemɔ toto. L’ɔkɔkɔ ɔsɔ ndo oma lo woho ‘wakitanyiyawɔ emboledi,’ Akristo nɔmbamaka dia kitanyiya ɛlɛmbɛ wa tshuki wa lo ngelo kawɔ.

Oma lâsɔ, dui dikina ele mbeya kakɔna ketawɔma ndo kahetawɔma lo tshunda diasɛnawɔ. Suke la dihole tshɛ diekɔ l’ɛlɛmbɛ ndo la mbekelo yasekɛ diwala dia lam’asa wanɛ wosangi dikila, ndo mbala efula diwala sɔ mbɔsamaka oko dui dia kɔlɔ efula ndo diahakoke salema. Kânga mbele awui wasekɛma shikaa mbeyaka tshikitana lo dihole la dihole, dibuku dimɔtshi (The Encyclopædia Britannica) mbutaka ɔnɛ: “Lo mbuta mɛtɛ, dieyanelo dia lam’asa wanɛ wotɔ, djekoleko owotɔ wa suke hadiokoke salema kânga yema ndo ekɔ dikambo dia kɔlɔ efula.” Lâsɔ, oyadi kânga l’akambo akina wahendana la dieyanelo dia lam’asa wanɛ wotɔ, Akristo hawohombe mbɔsa dia mbekelo tshɛ ya lo ngelo kewɔ yekɔ kɔlɔ kana mɔnyɔla awui amɔtshi wakasekɛma lo tshunda di’aha anto ndjɔtɛkɛta kɔlɔ lo dikambo di’etshumanelo k’Akristo ndo dia lokombo la Nzambi.​—2 Koreto 6:3.

Tatɔnyɔlake kɛnɛ katotɛ nkum’otema kakatosha Nzambi. Anto tshɛ wakotɔ la dikoka dia mbeya tshikitanya ɔlɔlɔ la kɔlɔ, kɔlɔ la ɔlɔlɔ. (Romo 2:15) Nkum’otema kawɔ mbatɛka kɛnɛ kele ɔlɔlɔ kana kasungana ndo kɛnɛ kele kɔlɔ kana kahasungana, naka tɔ katalana kana katakumi lonyu oma lo ditshelo dia kɔlɔ. Jehowa akatɛkɛta dia dikambo sɔ lam’akandasha ase Isariyɛlɛ ɛlɛmbɛ ande lo kɛnɛ kendana la diwala dia lam’asa wanɛ wotɔ. Sho mbadiaka ɔnɛ: “Tanyutshaki uku atuwutshaka lu kete ya Edjibitu, lene akanyadjashi, ndu tanyutshaki uku atuwutshaka lu kete ya Kanana, lene atamanyotole. Tanyuyelaki elembe awo.” (Akambu w’Asi Lewi 18:3) Akristo mbɔsaka nkum’otema kawɔ kambekiyama oma lo Bible la nɛmɔ ndo hawetawɔ tɔ ndanyema la kɛnɛ kɔsa wedja ɔnɛ kekɔ ɔlɔlɔ kana kɔlɔ.​—Efeso 4:17-19.

Lâsɔ, kakɔna kakokaso mbuta l’ekomelo na? Kânga mbele Akristo bu l’ɛse k’Ɛlɛmbɛ wa Mɔsɛ, nkum’otema kawɔ mbatɛka hwe dia diwala dia lam’asa ewotɔ wa suke, ɛnyɛlɔ lam’asa ombutshi wa pami l’ɔnande la womoto, kana ombutshi wa womoto nde l’ɔnande la pami, kadiyɔ nde l’ɔnango hetawɔma kânga yema lo tshunda di’Akristo.a Lam’atafule nkumbo, Akristo mbeyaka dia ekɔ ɛlɛmbɛ la wadjango walɔmba lɛɛta lo dikambo dia diwala ndo ekɔ ɛlɛmbɛ wetawɔma l’atshunda w’anto. Pombaka mbidja ɛlɛmbɛ ɛsɔ yimba dia sho kitanyiya didjango nɛ dia l’Afundelo diata ɔnɛ: “Diwala dialemiami le antu tshe.”​—Heberu 13:4.

[Nɔtɛ ka l’ɛse ka dikatshi]