Ɛlɔmbwɛlɔ kaki Satana kambokita mɛtɛ tatala
“Diese huyala le untu a kolo.”—UND. 8:13.
1. Lande na kele elombwelo kayaye k’anto wa kɔlɔ ekɔ losango lakeketsha?
KOTAMBA kolembɔ anto wa kɔlɔ wayolomboshama l’ɔtɛ wa kɛnɛ kakawasale. (Tuk. 5:22; Und. 8:12, 13) Ɔsɔ ayonga mɛtɛ losango lakeketsha djekoleko le anto walanga akambo w’ɔlɔlɔ ndo wanɛ wakadiɛnɛ la wɛngiya ndo wakasoyama oma le anto wa kɔlɔ. Satana Diabolo lele she akambo wa kɔlɔ ayolomboshama nde lawɔ.—Joa. 8:44.
2. Lande na kele akahombama ntshika etena dia nkandola dikambo diakatombe lo Ɛdɛna?
2 Lo Ɛdɛna, Satana lakadunganɛ la lotamanya akatshutshuya anto dia vɔ ntona lowandji laki Jehowa. L’ɔtɛ wa dikambo sɔ, ambutshi aso wa ntondo wakayele lokolo laki Satana lo ntɔmbɔkwɛ lowandji laki Jehowa ndo lo nkoma atshi wa pɛkato lo washo Ande. (Romo 5:12-14) Lo mɛtɛ, Jehowa akeyaka etombelo wayonga l’ɔtɔmbɔkwɛlɔ awɔ. Koko, ditongami tshɛ diele la yimba diakahombe mɛna etombelo waki la dui sɔ. Ɔnkɔnɛ, nde akahombe ntshika etena dia nkandola dikambo sɔ ndo dia mɛnya lo sɛkɛ di’atɔmbɔki asɔ wakate kashi.
3. Ngande wahombaso mbɔsa ewandji w’ana w’anto?
3 Lam’ele anto wakatone lowandji laki Jehowa, vɔ wakayadjɛ mandji yawɔ hita. Ɔpɔstɔlɔ Paulo akafundɛ asekande ambetawudi wa la Rɔma lo mbelɛ mandji y’ana w’anto shɔ ɔnɛ ‘mandji ya lâdiko.’ Lo nshi yaki Paulo, lowandji la la Rɔma lakalɔmbɔlaka Néron ɔnɛ lakalɔmbɔla tatɛ 54-68 T.D. mbaki mandji ya lâdiko shɔ. Paulo akate dia mandji ya lâdiko shɔ ‘yakakitshama l’ahole awɔ wele la elelo oma le Nzambi.’ (Adia Romo 13:1, 2.) Onde dui sɔ mɛnyaka dia Paulo akalange mbuta dia mandji y’anto yekɔ lâdiko di’ɛlɔmbwɛlɔ kaki Nzambi? Kema. Koko, nde akalange tsho mbuta dia edja tshɛ katshika Jehowa dia anto nɔmbɔla, Akristo pombaka nɛmiya ‘yɛdikɔ y’oma le Nzambi’ shɔ ndo mbetawɔ ɛlɔmbwɛlɔ kɛsɔ.
Mboka kakonya lo mpokoso
4. Lembetshiya lande na kayokita ɛlɔmbwɛlɔ k’anto tatala.
4 Koko, lowandji l’ana w’anto lasɛngiyama oma le Satana lambokita mɛtɛ tatala. Lande na? Ɔkɔkɔ ɔmɔtshi ele, lɔ bu la lomba laki Nzambi. Paka Jehowa oto mbele la lomba la kokele. Ɔnkɔnɛ, paka ndamɛ oto mbele tshɔi yakɔ y’ɔnɔmbɔdi ya dimɛna yakokaso mbɛkɛ otema le nde. (Jer. 8:9; Romo 16:27) Otshikitanyi l’anto wayokondjaka wetshelo paka l’atei w’ekakatanu kana l’ɔkɔngɔ wa nsala munga, Jehowa mbeyaka nshi tshɛ yoho yoleki dimɛna ya salaka akambo. Lowandji tshɛ lahayele ɛlɔmbwɛlɔ kakinde layokita tatala. L’ɔtɛ wa dikambo sɔ to aha la nshila eyango wa kɔlɔ wele la nde, yoho yalɔmbɔla Satana lo tshimbo y’anto yakɛnama oma l’etatelo dia yayokita tatala.
5, 6. Kakɔna ondo kakatshutshuya Satana dia nde ntɔmbɔkwɛ Jehowa?
5 Onto lele la lomba tonaka ndjasha lo dui diɛnama dia hadiotonga l’etombelo w’ɛlɔlɔ. Naka nde ntshininala dia nsala dui sɔ, kete nde ayoyotshutshuyama dia ndjetawɔ munga kande. Ɔkɔndɔ w’anto ambɛnya mbala efula dia bu dui dia lomba dia ndɔshana la Otungi Kanga-Wolo-Tshɛ. (Adia Tukedi 21:30.) Koko, Satana lakakesama oma l’otako ndo lotamanya akoke Jehowa ɔkɔngɔ. Ɔnkɔnɛ, Diabolo akatshininala lo mboka kakakoke paka mbokonya lo mpokoso.
6 Lotamanya laki Satana lakayɔkɛnɛmɔma oma le owandji ɔmɔtshi wa la Babilɔna wata Bible ɔnɛ nde akate l’otako tshɛ ɔnɛ: “Dimi layumbela utsha l’ulungu, layedia kiti kami ka diulelu ladiku dia toto ta [Nzambi]. Dimi layudjase l’ukungu wa lusanganya, utsha lu kuma ka ngel’a kushi. Dimi layumbela ladiku dia wangi, layuyaete uku Khum’Ulungu.” (Is. 14:13-15) Kɛnɛ kakalange nsala nkumekanga kɛsɔ kakɔtɔ l’ashi ndo ɔlɔndji wa nkumi ya dikanga ya la Babilɔna wakakomɛ. Woho akɔ wâmɛ mbele, Satana l’andja ande wayanga nɛndjama lo pondjo.
Lande na kakatshike Jehowa dia Satana nɔmbɔla?
7, 8. Naa ɛlɔlɔ ɛmɔtshi waya oma lo woho wakatshike Jehowa akambo wa kɔlɔ lo tshanda mɔtshi?
7 Anto amɔtshi mbeyaka ndjambola lande na kaki Jehowa koshimba anto diaha vɔ mbeta lo wedi waki Satana ndo diaha vɔ ndjela tokanyi tande tahɔtɔnɛ la lolango laki Nzambi ta nkongɛ lowandji lakahombe mɛtɛ ndjokita tatala. Oko wende Nzambi Kanga-Wolo-Tshɛ, nde akakoke mɛtɛ nsala dikambo sɔ. (Etum. 6:3) Koko, nde kodisala. Lomba lande lakawɛnya dia naka nde tokotshika anto ndjalɔmbɔla vɔamɛ lo tshanda mɔtshi, dui sɔ diayonga l’etombelo woleki tshɛ ɛlɔlɔ. L’ekomelo, Jehowa ayoyoyindjama oko Omboledi wa losembwe ndo wele la ngandji ndo anto wa kɔlamelo wayokondja wahɔ oma lo yɛdikɔ yakɔshi Nzambi shɔ.
8 Anto mɛtɛ wakakoke mbewɔ pâ otowotona kɛnɛ kakawatɛ Satana dia nsala ndo otowomamema paka lowandji laki Nzambi! Koko, yɛdikɔ yakɔshi Jehowa dia tokotshika anto ndjalɔmbɔla vɔamɛ lo tshanda mɔtshi ambonga l’etombelo. Yɔ yambotshutshuya anto wele l’etema w’ɛlɔlɔ dia vɔ mɛna ohomba wa nkitanyiya Nzambi ndo ndjaɛkɛ le nde. L’edja ka ntambe efula, anto wambohemba weho wa mandji yotshikitanyi, koko ndoko lɔnɛ lambonga l’etombelo w’ɛlɔlɔ. Dui sɔ diambokimanyiya atɛmɔdi waki Nzambi dia vɔ nkeketsha dietawɔ diawɔ di’ɔnɛ lowandji laki Nzambi mboleki tshɛ. Eelo, woho wakatshike Jehowa dia Satana nɔmbɔla ambela anto ekakatanu efula mbidja ndo ekambi waki Nzambi wa kɔlamelo. Koko, woho waketawɔ Jehowa dia tokotshika akambo wa kɔlɔ lo tshanda mɔtshi ekɔ nto la wahɔ le atɛmɔdi wa kɔlamelo asɔ.
Ɔtɔmbɔkwɛlɔ wakakimanyiya dia Jehowa tombwama
9, 10. Lembetshiya woho wambotombola ɛlɔmbwɛlɔ kaki Satana Jehowa.
9 Ntshika anto dia vɔ sɛngiyama oma le Satana ndo dia vɔ ndjalɔmbɔla hɛnya dia yoho ya nɔmbɔla yaki Jehowa yekɔ kɔlɔ. Koko, ɔkɔndɔ w’ana w’anto mɛnyaka dia kɛnɛ kakafunde Jeremiya l’ekimanyielo ka nyuma k’ekila lo woho wele anto bu l’akoka wa ndjalɔmbɔla vɔamɛ kekɔ mɛtɛ. (Adia Jeremiya 10:23.) Ndo nto, ɔtɔmbɔkwɛlɔ waki Satana ambosha Jehowa diaaso dia nde mɛnya waonga Ande w’ɛlɔlɔ lo yoho yoleki tshɛ. Lo ngande?
10 Lam’ele sho kokaka mɛna etombelo wa kɔlɔ w’oma l’ɛlɔmbwɛlɔ kaki Satana, waonga wa kokele waki Jehowa mɛnamaka lo yoho yoleki tshɛ. Lo yoho shɔ, nde tombwamaka lo washo w’anto wawoka ngandji. Aha la tâmu, yoho yalɔmbɔla Satana yambokimanyiya mɛtɛ dia ntombola Nzambi. Yɔ yambɛnya dia Jehowa akakandola dikambo diendana la lowandji lande lo yoho yoleki tshɛ dimɛna. Dia mboka dimɛna dui sɔ, tɔsɛdingole lo tshena pe waonga amɔtshi waki Jehowa ndo tende woho wele ɛlɔmbwɛlɔ ka kɔlɔ kaki Satana kambotshutshuya Jehowa dia nde mɛnya waonga asɔ lo toho tokina.
11. Ngande wakɛnama ngandji kaki Jehowa?
11 Ngandji. Afundelo totɛka dia “[Nzambi] eli ngandji.” (1 Joa. 4:8) Woho wakatonge Nzambi onto ekɔ ntondotondo djembetelo ya ngandji kande. Ndo nto, yoho ya diambo yakatatongama mɛnyaka ngandji katoka Nzambi. Lâdiko dia lâsɔ, la ngandji tshɛ Jehowa akasha anto edjaselo ka dimɛna efula kele la diangɔ tshɛ diele la wɔ ohomba dia vɔ ngɛnangɛnaka. (Etat. 1:29-31; 2:8, 9; Osam. 139:14-16) Koko, lam’akɔtɔ akambo wa kɔlɔ lo nkumbo k’anto, Jehowa akayɛnyaka ngandji kande lo toho tokina. Lo ngande? Ɔpɔstɔlɔ Joani akashile ɛtɛkɛta wakate Yeso ɔnɛ: “[Nzambi] akalangi wa la kete utamanya, mbakandawasha On’andi etoi lakanduti, dia untu tshe lawetawo, tavokaki, keli ayali la lumu la pundju.” (Joa. 3:16) Onde ekɔ yoho kina yakakoke Nzambi mɛnya anto ngandji kawaokande ko ndeka woho wakandatome Ɔnande ɛtɔi lakandote la nkɛtɛ dia nde ndjokimɔ tshungo dikambo di’atshi wa pɛkato? (Joa. 15:13) Ɔkɛnɛmwɛlɔ wa mamba wa ngandji ɔsɔ mbishaka nto anto ɛnyɛlɔ ka vɔ ndjela lo mbashaka diaaso dia nkɛnɛmɔla ngandji ka ndjahombia kaki Nzambi lushi la lushi oko wakasale Yeso.—Joa. 17:25, 26.
12. Lo yoho yakɔna yɛnama wolo waki Jehowa?
12 Wolo. Paka ‘Nzambi Kanga-Wolo-Tshɛ,’ mbele la wolo wa ntonga lɔsɛnɔ. (Eny. 11:17; Osam. 36:9) Etena kotɔ onto, nde mongaka oko dikatshi dia wɛma diahatafundama ndoko ɛngɔ. Lo nyɔi kande, dikatshi sɔ ndolaka la tɛdikɔ, ditshelo ndo awui wakokomɛ lo lɔsɛnɔ lande l’otondo wɛnya woho w’onto wakinde. Jehowa kokaka momba awui asɔ lo yimba yande. L’etena kahombama, Jehowa ayokoka mbolola onto ɔsɔ nto la eongelo kande ka lânde. (Joa. 5:28, 29) Kânga mbele Nzambi kokongɛ l’etatelo di’anto mvɔ, nyɔi kambosha Jehowa diaaso dia nde mɛnya dia nde kokaka mbolola anto. Lo mɛtɛ, Jehowa ekɔ ‘Nzambi Kanga-Wolo-Tshɛ.’
13. Ngande wɛnya olambo wa Yeso losembwe la kokele laki Jehowa?
13 Losembwe. Jehowa hataka kashi ndo hasalaka akambo wa kɔlɔ. (Euh. 32:4; Tito 1:2) Nde sukɛka nshi tshɛ ɛlɛmbɛ ande wa lâdiko wendana l’akambo wa mɛtɛ ndo wa losembwe kânga etena kɛnama dia dui sɔ hokondjiya wahɔ. (Romo 8:32) Jehowa mɛtɛ aki la lɔkɔnyɔ l’efula etena kakandɛnyi Ɔnande la ngandji avɔ l’otamba w’asui wate kana oko Yeso aki otshi wa kɔlɔ! Koko, l’ɔtɛ wa ngandji kokande anto wele kema kokele, Jehowa aketawɔ dia ntshika dia dikambo diakawoshaka kandji efula sɔ nsalema dia nde nsukɛ tɔndɔ diande dia kokele diendana la losembwe. (Adia Romo 5:18-21.) Andja wambolola l’akambo wa kɔlɔ ɔnɛ wambosha Jehowa diaaso dia nde mɛnya dia nde mɛtɛ mbele kiɔkɔ ya losembwe.
14, 15. Lo toho takɔna tɔmɔtshi tamboleka mɛnama lomba ndo solo dia lotutsha diaki Jehowa dioleki tshɛ?
14 Lomba. Mbala kakɔ ɔtɔi, l’ɔkɔngɔ wa Adama l’Eva nsala pɛkato, Jehowa akɛnya woho wakandahombe minya etombelo wa kɔlɔ tshɛ wakaye oma l’ɔtɔmbɔkwɛlɔ awɔ. (Etat. 3:15) Dikambo diakandasale aha la tshimbatshimba sɔ ndo woho wakandayɛnyaka yema yema akambo wendana la sangwelo sɔ otsha le ekambi ande mɛnyaka lomba l’efula lele la Jehowa. (Romo 11:33) Ndoko ɛngɔ kakakoke nshimba Nzambi dia nde nkandola akambo dimɛna. L’andja ɔnɛ wambolola tɔɔ l’akambo wa mindo, ata, wele anto bu l’ekanelo k’ɔlɔlɔ, ohindodi, esehe, shɔnɔdi ndo yimba ya dungi pende, Jehowa ambokondja diaaso dia mɛnya ditongami diande elɛwɔ lomba la mɛtɛ. Ombeki Jakɔba akate ate: ‘Lomba l’oma l’olongo lekɔ ntondotondo pudipudi, oma lâsɔ lɔ lekɔ wɔladi, ekanelo k’ɔlɔlɔ, suke dia nkitanyiya, ndola la kɛtshi ndo la elowa w’ɔlɔlɔ, aha la shɔnɔdi, aha la dungi pende.’—Jak. 3:17.
15 Solo dia lotutsha. Dionga diaki Jehowa dia solo dia lotutsha diakahombe ndjoleka mɛnama ohomba le nde etena kakandahombe nsalɛ anto wele kema kokele, wasala pɛkato ndo munga akambo. Woho waketawɔ Jehowa dia dikambo sɔ nsalema l’edja ka nunu di’ɛnɔnyi mɛnyaka dia nde ekɔ la dionga sɔ lo yoho ya kokele ndo sho pombaka monga la lowando lo dikambo sɔ. Ɔpɔstɔlɔ Petero aki la shadiya ya mfunda ɔnɛ, sho pombaka ‘mbɔsa solo dia lotutsha diaki Nkumɛso oko panda.’—2 Pet. 3:9, 15.
16. Lande na kele woho wele Jehowa suke dia dimanyiya toshaka ɔngɛnɔngɛnɔ w’efula?
16 Suke dia dimanyiya. Sho shɛ tekɔ atshi wa pɛkato ndo sho tshɛ takanaka mbala la mbala. (Jak. 3:2; 1 Joa. 1:8, 9) Ande lowando lahombaso monga lalɔ le Jehowa lo woho wende suke dia todimanyiya ‘lo yoho y’efula’ lee! (Is. 55:7) Tɔsɛdingole nto dui nɛ: Oko wakatotɔ la eongelo k’anto wele kema kokele, sho ngɛnangɛnaka efula etena katodimanyiya Nzambi munga yaso. (Osam. 51:5, 9, 17) Woho wɛnaso waonga waki Jehowa wananda otema asɔ keketshaka ngandji kawokaso ndo totshutshuyaka dia sho mbokoya ɛnyɛlɔ kande lo woho wasalɛso anto akina akambo.—Adia Kolosai 3:13.
Lande na kambolana andja ɔnɛ?
17, 18. Lo toho takɔna tambokita ɛlɔmbwɛlɔ kaki Satana tatala?
17 Andja w’otondo waki Satana, mbuta ate yoho y’ɛlɔmbwɛlɔ kande yambokita tatala mbala ko mbala l’edja ka ntambe efula. Lo 1991, jurunalɛ mɔtshi (The European) yakate ɔnɛ: “Onde andja ɔnɛ wekɔ la hemɔ? Eelo, koko, . . . aha l’ɔtɛ wa dui dimɔ diakasale Nzambi, koko hemɔ katata andja ɔnɛ ndja oma le anto vɔamɛ.” Dui sɔ diekɔ mɛtɛ! Oko wakawatshutshuyama oma le Satana, ambutshi aso wa ntondo wakasɔnɛ ɛlɔmbwɛlɔ k’anto lo dihole dia nɔmbwama oma le Jehowa. Lo nsala ngasɔ, vɔ wakete lo wedi wa lowandji lakahombe nkita tatala. Pâ la shɔkɔ yɛna anto l’andja w’otondo ekɔ djembetelo yɛnya dia ɛlɔmbwɛlɔ k’anto kekɔ kɔlɔ efula.
18 Yoho ya nɔmbɔla yaki Satana tshutshuyaka anto lo lokaki. Koko, lokaki hadjaki ngandji otshumba pondjo, nɛ dia Jehowa nɔmbɔlaka la ngandji. Ɛlɔmbwɛlɔ kaki Satana kambokita tatala dia mbisha anto wɔladi, ɔngɛnɔngɛnɔ ndo lotui tshitshi. Ɛlɔmbwɛlɔ kaki Jehowa kamboyindjama mɛtɛ! Onde tekɔ la tolembetelo ta nshi nyɛ tɛnya dui sɔ? Eelo, oko wayotɔsɛdingola lo sawo diayela.
Kakɔna kamboteka lo kɛnɛ kendana la ɛlɔmbwɛlɔ lo mbadia . . .
• Romo 13:1, 2?
• Tukedi 21:30?
• Kolosai 3:13?
[Esato wa lo lɛkɛ 25]
Ɛlɔmbwɛlɔ kaki Satana helaki anto wahɔ pondjo
[Efundelo wɛnya kanga]
U.S. Army photo
WHO photo kaki P. Almasy
[Osato wa lo lɛkɛ 26]
Jehowa ekɔ la wolo wa mbolola kânga anto wakavu
[Osato wa lo lɛkɛ 27]
Ngandji ndo losembwe laki Jehowa lakɛnama l’olambo wakakimɔ Ɔnande