‘Onde onto oko dimi kokaka nsambisha?’
L’andja w’otondo, tekɔ la bɛnyɛlɔ dia diambo di’anangɛso l’akadiyɛso wasambisha la kɔlamelo kânga mbadiɛnɛwɔ la hemɔ ya wolo. Tɔshi ɛnyɛlɔ ka kadiyɛso Dalia kodjashi l’osomba wa Vilnius kapitalɛ ka Lituanie.
Dalia ekɔ l’ɛnɔnyi 30 l’ɛmɔtshi. Nde akôtɔ la hemɔ ka lo wɔɔngɔ. Hemɔ kɛsɔ kakawɔdja demba ndo mboshimbaka dia ntɛkɛta dimɛna. Ɔnkɔnɛ, paka ase nkumbo kande ato mboka kɛnɛ katande dimɛna. Galina ka nyango lodjashi la nde mbakotsha ehomba ande. Kânga mbele lɔsɛnɔ la Dalia ndola l’ekakatanu ndo l’ekiyanu, nde mɛnaka akambo la sso di’ɔlɔlɔ. Kakɔna kôkimanyiya?
Galina mbutaka ate: “Lo 1999, Apolonija akaye ndjomenda. Dimi la nde tekɔ ana l’ana. Takashihodia ɔnɛ Apolonija akeyaka Bible dimɛna l’ɔtɛ wakinde Ɔmɛnyi wa Jehowa ndo Dalia akatatɛ mbôka ambola efula. Kombeta edja, nde akatatɛ mbeka Bible nde la Dalia. Dimi lakatshɔka lo pai dia tokadimolɛ kɛnɛ kakataka Dalia. Lakɛnyi dia kɛnɛ tshɛ kakandekaka kakôkimanyiyaka mɛtɛ. Kombeta edja, dimi lawɔ lakalɔmbɛ Apolonija dia nde mbetshami Bible.”
L’ɔkɔngɔ wa Dalia nshihodia akambo wa mɛtɛ wa lo Bible, dimbola dimɔtshi diakatatɛ mbotshindja wɔɔngɔ. L’ekomelo a shimu, nde akayombola Apolonija ate: “Onde onto lambɔla demba oko dimi kokaka nsambisha?” (Mat. 28:19, 20) Nde akokadimola la lotutsha tshɛ ate: “Tokake wɔma nɛ dia Jehowa ayokokimanyiya.” Kɛsɔ mɛtɛ mbasalema.
Ko lâsɔ, ngande wasambisha Dalia? Nde sambishaka lo toho efula. Akadiyɛso amɔtshi mbokimanyiyaka dia nde mfunda mikanda wele la nsango ya lo Bible. Ntondotondo, Dalia mbatɛka kɛnɛ kahombawɔ mfunda. Oma lâsɔ ko vɔ ndjofunda tshondo ya mukanda yele la tokanyi tande. Dalia sambishaka nto lo tomanɛ mesajɛ lo telefɔnɛ kande. Ndo l’etena kakoka, ase etshumanelo tshɔka la nde l’ahole walongawɔ nyama ndo l’ɛsɛsɛ watanema anto efula dia tosambisha.
Dalia nde la nyango wakatetemala mpama lo nyuma. Vɔ akɔ ahende wakayakimɔ le Jehowa ndo wakabatizama lo Ngɔndɔ ka dikumi l’ɔtɔi 2004. Lo Ngɔndɔ ka divwa 2008, wakâte olui wasala nsanganya l’ɔtɛkɛta wa polonais l’osomba wa Vilnius. Lam’ele olui ɔsɔ waki l’ohomba w’efula w’apandjudi wa Diolelo, Dalia nde la nyango wakatatɛ nsangana lɛkɔ. Dalia mbutaka ate: “Lakayakiyanyaka l’ɔtɛ wakametshaka ngɔndɔ mɔtshi aha la nsambisha. Koko l’ɔkɔngɔ wa dimi nɔmba Jehowa dia dikambo sɔ, opandjudi ɔmɔtshi akayaka ndjombikola dia sho ntshɔ l’esambishelo.” Ngande wayaoka kadiyɛso ka ngandji kɛsɔ lo kɛnɛ kendana la hemɔ kele la nde? Nde mbutaka ate: “Hemɔ kami kakambɔdia demba, koko aha wɔɔngɔ. Lekɔ l’ɔngɛnɔngɛnɔ w’efula dia nsambisha awui wendana la Jehowa.”