“Onde wɛ koka tonda foto kɛmɔtshi?”
L’ɔkɔngɔ wa lushi la hende la Losanganya la distrikɛ, ɔnangɛso Josué lakamba lo Bɛtɛlɛ ka lo wodja wa Mexique akatetetaka l’osomba wa Querétaro. Javier nde la Maru ka wadɛnde wakatshu dia tɛngɔla l’osomba wa Querétaro ndo wakalɔmbɛ Josué dia nde mbanda foto kɛmɔtshi. Lam’ele Josué nde l’angɛnyi ande akina w’Ɛmɛnyi wa Jehowa wakalɔtɛ dimɛna ndo wakadje totshapa tawɔ, atshukanyi asɔ wakawambola dia kana vɔ wekɔ lo ndjaye oma lo fɛtɛ kɛmɔtshi ka woshelo w’apɔlɔmɛ kana oma lo diaaso dimɔtshi dia lânde. Josué akawatɛ di’oma lo Losanganya la distrikɛ mbayawaye ndo akâlɔmbɛ dia vɔ ndjɔtɔ Lushi la lomingu.
Atshukanyi asɔ wakengenga dia ntshɔ nɛ dia vɔ komonga l’ahɔndɔ w’amɛna wa ndɔta lo diaaso sɔ. Ɔnkɔnɛ, Josué akawatɛ lokombo lande ndo akawasha numɛlɔ ka telefɔnɛ ka Bɛtɛlɛ.
Ngɔndɔ nyɛi l’ɔkɔngɔ, Josué akâmbe etena kakotelefɔnɛ atshukanyi asɔ ɔnɛ vɔ wakɔtɔ lo losanganya lɔsɔ ndo wekɔ lo nyanga Ɔmɛnyi wa Jehowa ɔmɔtshi dia tekaka la wɔ Bible l’osomba wa Mexico lɛnɛ akawadjasɛka l’etena kɛsɔ. Kombeta edja, atshukanyi asɔ wakatatɛ mbeka Bible ndo mbɔtɔ lo nsanganya. Ngɔndɔ dikumi l’ɔkɔngɔ, vɔ wakakome apandjudi. Kânga mbakawayonɔka l’osomba wa Toronto lo wodja wa Canada, vɔ wakatetemala mpama lo nyuma ndo wakatobatizamaka.
L’ɔkɔngɔ diko, Javier akayotomɛ Josué mukanda dia mbotɛ kɛnɛ kakâtshutshuya dia vɔ mbetawɔ akambo wa mɛtɛ. Nde akofundɛ ɔnɛ: “La ntondo ka sho mbɔtɔ lo Losanganya la distrikɛ dimi la wadɛmi, takayangaka woho wakokaso nkotsha ehomba aso wa lo nyuma. Etena kakatɛnyi woho wakanyalɔtɛ dimɛna, takate shate weho akɔ tshɛ nyakayayaka oma lo losanganya la lânde. Etena kakiso lo losanganya lɔsɔ, takanandema l’ɔtɛ wa ngandji kakatɛnya ɔnɛ lakadjasɛ suke la so lo tokimanyiya dia sho mbishola avɛsa lo Bible ndo l’ɔtɛ wa loshilambo laki l’anto waki lo losanganya lɔsɔ. Kombeyama ndo ɔnɛ angɛndangɛnda mbakiso.”
Ande woho wakakotshama ɛtɛkɛta ɛnɛ wa Sɔlɔmɔna nkumekanga ka lomba le Josué lee! Nde akafunde ate: “Uneki wuhu aye la pindju. Tushaki lunya laye mumuya la dikolo, ne dia we heyi kana kene kana keku kayuluwana, kana vo ahendi wayula ololo.” (Und. 11:6) Shi ndo wɛ lawɔ kokaka monɛ woho ayɛ lo nkamba la diaaso tshɛ diayoyokondja dia mbelɛ anto lo Losanganya la distrikɛ layaye kana lo sawo dia lo sɛkɛ? Jehowa kokaka nkamba layɛ dia nkutola wanɛ wele la ndjala ndo la mposa k’akambo wa mɛtɛ oko wakidiɔ le Javier nde la Maru.—Is. 55:1.
[Osato wa lo lɛkɛ 32]
Oma lo lɔmɔsɔ otsha lo l’omi: Alejandro Voeguelin, Maru Pineda, Alejandro Pineda, Javier Pineda, ndo Josué Ramírez lo Bɛtɛlɛ ka la Mexique