Etshama oma l’ɔtɛkɛta wa Nzambi

Lande na kabatizama Akristo?

Sawo nɛ diekɔ la ambola wele ondo wɛ amboyaokaka ndo mɛnyaka lɛnɛ akokayɛ ntana ekadimwelo lo Bible kayɛ. Ɛmɛnyi wa Jehowa wayonga suke dia nkɛtshanya la yɛ ekadimwelo ɛsɔ.

1. Alembetshiya batismu k’Akristo?

Batismu ekɔ yoho ya nɔmba Nzambi dia monga la diɔtɔnganelo dia dimɛna la nde. Ɔnkɔnɛ, Okristo pombaka batizama, aha etena kekende ɔna dikɛnda koko etena kayande opalanga wambokoka mbeka akambo wendana la Nzambi ndo monga ombeki wa Yeso. (Etsha 8:12; 1 Petero 3:21) Sho komaka ambeki wa Yeso etena kekaso ndo kasalaso akambo watodjangɛnde.—Adia Mateu 28:19, 20.

Lo nshi y’apɔstɔlɔ wa Yeso, anto efula wakɔsaka yɛdikɔ aha la ntshimbatshimba dia mbeka akambo wendana la Nzambi ndo la Yeso. Ɛnyɛlɔ, etena kakeye pami kɛmɔtshi dia nyɔi ka Yeso kambodihwɛ anto mboka k’otsha lo panda, nde akakome ombeki wa Yeso aha la ntshimbatshimba. Ɛlɔ kɛnɛ, anto efula wele l’etema w’ɛlɔlɔ wakasɔnɛ dia monga ambeki wa Yeso.—Adia Etsha 8:26-31, 35-38.

2. Lande na kakabatizama Yeso?

Yeso aki l’ɛnɔnyi oko 30 etena kakobatiza Joani Obatizanyi l’ashi l’ɔkɛdi wa Jɔrɔdana. Batismu ka Yeso kakɛnya yɛdikɔ yakandɔshi ya nsala lolango la Nzambi. (Heberu 10:7) Dui sɔ diakendanaka nto la woho wakandahombe nkimɔ lɔsɛnɔ lande oko olambo dia ntshungola anto oma lo pɛkato. Kânga la ntondo ka nde ndja lanɛ la nkɛtɛ, mbala tshɛ Yeso akalangaka ndo akakitanyiyaka Jehowa She.—Adia Mako 1:9-11; Joani 8:29; 17:5.

3. Lande na kahomba Okristo batizama?

Akambo wele laso tshikitana la waki la Yeso, mbuta ate takotɔ oko atshi wa pɛkato. Koko, nyɔi k’olambo kaki Yeso kakatokimanyiya dia sho monga la diɔtɔnganelo dia dimɛna la Nzambi. (Romo 5:10, 12; 12:1, 2) Etena kɛnɛ taya l’akoka wa monga anto ande oko ase nkumbo kande. (2 Koreto 6:18) Ngande wongaso la diɛsɛ sɔ? Lo nsala dɔmbɛlɔ dia lo woshɛshɛ, sho ndjakimɔka le Jehowa lo ntshika dɔkɔlɔkɔ dia salaka lolango lande lo lɔsɛnɔ laso l’otondo. L’ɔkɔngɔ wa sho ndjakimɔ, sho mɛnyaka ndjakimɔ kɛsɔ lo sɛkɛ lo batizama.—Adia Mateu 16:24; 1 Petero 4:2.

4. Ngande wakokayɛ ndjalɔngɔsɔla dikambo dia batismu?

Ɛmɛnyi wa Jehowa mbekaka Bible l’onto tshɛ lalanga ndjasukanya la Nzambi. Wekelo wa Bible ndo wɔtwɛlɔ wa lo nsanganya y’Akristo ayokeketsha ngandji kokayɛ Nzambi ndo mbetawɔ kele layɛ le nde. Dui sɔ diayokokimanyiya nto dia wɛ monga la waonga ndo la mbekelo y’amɛna. Nkɛnɛmɔla ngandji, mbetawɔ ndo waonga akina wangɛnyangɛnya Nzambi ayokokimanyiya dia wɛ nsɛna lo yoho yɔtɔnɛ la dɔkɔlɔkɔ diayɛ dia nkambɛ Jehowa pondjo pondjo.—Adia Joani 17:3; Heberu 10:24, 25.

Dia mbeya awui akina, enda tshapita 18 ya dibuku nɛ, Bible etshatɔ mɛtɛ? diakatondjama oma le Ɛmɛnyi wa Jehowa.