Alapɔlɔ w’oma lo losanganya la l’ɔnɔnyi
Losanganya lakɛnya kâmɛ ndo laki l’eyango w’amɛna
NSANGANYA ya l’ɔnɔnyi yasala Watch Tower Bible and Tract Society of Pennsylvania yokongaka nshi tshɛ amɛna efula. Ngasɔ mbakidiɔ ndo lo losanganya la l’ɔnɔnyi la 127 lakasalema Lushi la samalo, Ngɔndɔ ka dikumi 1, 2011. Anto wakelamɛ oma l’andja w’otondo dia ndjosangana kâmɛ lo Mbalasa ka nsanganya ya weke k’Ɛmɛnyi wa Jehowa ka la Jersey City, New Jersey, la États-Unis.
Gerrit Lösch, ose Olui-walɔmbɔla akayayola anto la wangasanu tshɛ. Nde akatɛ anto wakelamɛ oma lo wedja oko 85 ate sho ngɛnangɛnaka kâmɛ kaso ka l’andja w’otondo. Kâmɛ kɛsɔ ekɔ tshondo y’esambishelo le anto akina ndo tɔ tombolaka Jehowa. Nde akewoya ate kâmɛ kɛsɔ mbele ɔtɛ a dui wa losanganya.
ALAPƆLƆ WA DIMƐNA W’OMA LA MEXIQUE
Etenyi ka ntondo ka losanganya lɔsɔ kakaleke ntɛkɛta dia kâmɛ kele lam’asa ekambi waki Jehowa. Baltasar Perla, akakɔnya anangɛso asato wakamba lo Bɛtɛlɛ ka la Mexique lo kɛnɛ kendana la woho wambosanganyema filialɛ shamalo ya l’Amérique centrale la filialɛ ka Mexique. L’ɔtɛ wa dui sɔ, nkumbo ka Bɛtɛlɛ ka la Mexique kakalolanɛ l’anto w’oye oma l’ahole efula ndo wele la mbekelo yotshikitanyi. Oyelo w’anangɛso ndo akadiyɛso w’oma lo wedja ekina aki kiɔkɔ y’ekeketshelo. Aki oko Nzambi akanya wekamu tshɛ wendana la elelo wa wedja.
Okakatanu ɔmɔtshi wakahombe kandɔma ele, nkimanyiya apandjudi dia vɔ ndjaoka ɔnɛ okongamelo waki Jehowa hawanyisha yimba kânga mbele Bɛtɛlɛ kaya bu lo wodja awɔ. Dia nkotsha dikambo sɔ, yɛdikɔ yakɔsama dia etshumanelo tshɛ monga la adrɛsɛ w’Ɛtɛrnɛtɛ woho wa kânga apandjudi wele lo wedja wele Bɛtɛlɛ bu sawolaka la Bɛtɛlɛ.
AKAMBO AMƆTSHI WAKASALEMA LA JAPON
Ɔnangɛso James Linton, l’oma lo Bɛtɛlɛ ka Japon akalembetshiya etombelo wa kɔlɔ waki la didimu dia nkɛtɛ ndo lɔpɛpɛ la wolo lakapɛpɛ lo wodja ɔsɔ lo Ngɔndɔ ka sato 2011. Nde akate ate Ɛmɛnyi wa Jehowa efula wakavusha wakiwɔ wa ngandji ndo wakashisha diangɔ diawɔ. L’ɔkɔngɔ wa mpokoso kɛsɔ, Ɛmɛnyi wa Jehowa waki l’ahole akina waki kopomana la mpokoso, wakawasha mvudu ndekana 3 100 ndo mituka. Anangɛso akina efula wakayakimɔ la lolango dia nkamba kâmɛ l’ase Kɔmite rejiɔnalɛ ka wokelo dia nɔngɔsɔla mvudu kina y’anangɛso yakalana. Anangɛso ndeka 1 700 wakayakimɔ la lolango dia tokimanyiya wanɛ wakahomɔ mpokoso asɔ. Olui w’anto wakayakimɔ la lolango w’oma l’États-Unis, wakakambe kâmɛ l’anangɛso wendana l’ɔlɔngɔswɛlɔ wa Mbalasa ya Diolelo ndo anangɛso l’akadiyɛso 575 wakayakimɔ la lolango dia nsala olimu ɔsɔ.
Olui-walɔmbɔla akaleke mbidja yimba dia nkotsha ehomba wa lo nyuma ndo wa lo yimba w’anangɛso wakahomɔ mpokoso. Dikumanyi ndekana 400 wakatomama dia tembola wanɛ waki l’ohomba w’ekimanyielo. Woho wakayakiyanya Olui-walɔmbɔla lo dikambo sɔ akɛnama etena kakandatome emendji wa zɔnɛ ehende oma lo mbalasa ka woke kalɔmbɔla olimu wa l’andja w’otondo dia tembola ndo tokeketsha wanɛ wakahomɔ mpokoso asɔ. Woho wakayakiyanya Ɛmɛnyi wa Jehowa efula wa l’andja w’otondo lo dikambo sɔ aki kiɔkɔ y’esambelo.
OYINGELO W’ƐMƐNYI WA JEHOWA LAKA LƐƐTA
Ampokami wakahokamɛ la yambalo tshɛ sawo diendana l’ahole wamboyinga Ɛmɛnyi wa Jehowa laka lɛɛta diakasha ɔnangɛso Stephen Hardy l’oma lo Bɛtɛlɛ ka la Grande-Bretagne. Ɛnyɛlɔ la France, emboledi wa lɛkɔ wakalɔmbɛ Ɛmɛnyi wa Jehowa dia mfuta taksɛ yele l’oshinga wa dɔlara miliyɔ 82 naka vɔ nangaka ntetemala nkamba olimu awɔ. Dui sɔ diakakandɔma etena kakayota wanɛ wakamba lo Tuminadi ta l’Erɔpɛ tendana la lotshungɔ lele l’onto lo wahɔ aso ɔnɛ emboledi wa la France wakɔnyɔla yɛdikɔ ya 9 ya Tuminadi tɔsɔ yɛnya dia lɛɛta pombaka nɛmiya lotshungɔ lele l’ase ɔtɛmwɛlɔ. Yɛdikɔ yakawɔshi mɛnyaka dia dui sɔ komendanaka la falanga nɛ dia sho mbadiaka ɔnɛ: “Ntona dia mbetawɔ tshunda dimɔtshi di’ɔtɛmwɛlɔ, nyanga dia mbosekɛ, nkamba l’ɛtɛkɛta wa lɔtɛngɔ otsha le ase ɔtɛmwɛlɔ ekɔ l’atei w’akambo watona yɛdikɔ ya 9 ya lo tuminadi taso.”
Tuminadi ta l’Erɔpɛ tendana la lotshungɔ lele l’onto takatɔswɛlɛ nto lo wodja wa Arménie. Ntatɛ oma ko 1965, Tuminadi ta l’Erɔpɛ tendana la lotshungɔ lele l’onto takɛnya dia vɔ hawokokɛ onto naka lɛɛta ambôtshutshuya la wolo dia nde nkamba olimu w’ɔsɔlayi. Koko, tuminadi takɔ tâmɛ takɛnya nto ɔnɛ: “Tuminadi ta lâdiko ta l’Erɔpɛ kokaka mbelamɛ dia ndjosambola dikambo di’onto lambotona dia nkamba olimu w’ɔsɔlayi naka dui sɔ diaya tshondo y’okakanu wahakoke kandɔma lam’asa onto akɔ la lɛɛta.” Yɛdikɔ yakɔsama la Arménie lo wahɔ w’Ɛmɛnyi wa Jehowa mbakɔsama ndo la Azerbaïdjan ndo la Turquie.
DIKONGELO DIA WOKELO
Ɔnangɛso Guy Pierce l’oma l’Olui-walɔmbɔla akɛnya ɔnɛ anto tshɛ wele lanɛ wayɔngɛnangɛna efula dia mboka ekongelo kambɔsama lo dikambo dia wokelo wa mvudu ya Bɛtɛlɛ l’États-Unis, la New York. Nde akɛnya vidɛo yɛnya kɛnɛ kambosalema la Wallkill, Patterson ndo mvudu yahomba mbikama la Warwick ndo la Tuxedo, New York. Mvudu yakama la Wallkill yayoshila lo 2014 ndo yayonga la toshambrɛ ndekana 300.
Tekɔ l’ekongelo ka mbika mvudu lo ɛtshi kaso ka nkɛtɛ kele la woke wa mɛtɛlɛ 10000 la Warwick. Ɔnangɛso Pierce akate nto ate: “Kânga mbahateye lolango la Jehowa lo kɛnɛ kendana l’osomba wa Warwick, tekɔ l’ekongelo ka mbika mvudu l’oyango wa nsɛkɔla Mbalasa kalɔmbɔla olimu w’Ɛmɛnyi wa Jehowa wa l’andja w’otondo lɛkɔ.” Tekɔ l’ekongelo ka nkamba nto la ɛtshi kekina ka nkɛtɛ kele la mɛtɛlɛ 2 000 kele lo nɔrdɛ k’osomba wa Warwick katanema lo kilɔmɛtɛlɛ 10 l’oyango wa nkitsha mashinyi wakambaso elimu ndo dihomɔ dia wokelo. Ɔnangɛso Pierce akate ate: “Tekɔ lo nongamɛ dia nshidiya olimu ɔsɔ l’edja k’ɛnɔnyi ɛnɛi. Ɔnkɔnɛ, mvudu yaso ya Bɛtɛlɛ ka la Brooklyn kokaka ndjosondjama.”
Ɔnangɛso Pierce akambola ate: “Onde Olui-walɔmbɔla w’Ɛmɛnyi wa Jehowa wambotshikitanya kanyi yawɔ lo kɛnɛ kendana la woho wamboleka mfɔnu ka woke nsukana?” Ndamɛ akakadimola ate: “Keema. Naka mfɔnu ka woke kamboya la ntondo k’elimu ɛsɔ nshila, kete ɔsɔ ayonga dui dia dimɛna, dia dimɛna efula.”
NYEWƆ NTAMBWE KADIKITA
Ɔnangɛso okina la l’Olui-walɔmbɔla, Stephen Lett akalembetshiya divɛsa dia 1 Petero 5:8 diata ɔnɛ: “Nyuyali ki, nyendaki. Utunyi anyu uhimbanyi atokendakendaka uku tambwe kadikita kayanga walendi.” Ɔnangɛso Lett akate ate waonga efula wele la tambwɛ wakatɛkɛta Petero lanɛ fɔnaka la waonga wele la Satana.
Lam’ele tambwɛ kekɔ la wolo w’efula ndeka anto, hatokoke ndɔ la Satana oma lo wolo aso hita. Tekɔ l’ohomba w’ekimanyielo kaki Jehowa. (Is. 40:31) Lam’ele tambwɛ ekɔ la toho ta mayɛlɛ tandande nyama, sho pombaka mbewɔ tolonga ta lo nyuma tatâmba Satana. Oko watondaka tambwɛ kawe kele bu la yewo kana ɔna lofumbɔ loladi djɔ, mbele ndo Satana bu la kɛtshi ndo nde kombolaka todiaka. Oko wahateyaka nyama kambondama oma le tambwɛ ndoko dui nto, mbatongaka ndo ‘ekomelo ka lonyuma la wanɛ’ wandama oma le Satana, mbuta ate “ekumelu kawo kayuleka etatelu kawo kolo.” (2 Pet. 2:20) Ɔnkɔnɛ, sho pombaka nshika tanga la ntondo ka keso yaki Satana ndo ndjashikikɛ dia nkamba l’atɔndɔ wa lo Bible wekaso.—1 Pet. 5:9.
TƆNGƐNƐNGƐNƐ DIHOLE DIELE LA SO LO LUUDU LA JEHOWA
Ɔnangɛso Samuel Herd l’ose Olui-walɔmbɔla akatatshiya sawo diande lo mbuta ɔnɛ: “Sho tshɛ tekɔ la dihole lo luudu la Jehowa. Akristo tshɛ wekɔ la dihole lo ‘luudu’ laki Nzambi, mbuta ate lo tɛmpɛlɔ kande ka lo nyuma kalembetshiya yedikɔ yakɔsama dia mbɔtɛmɔla l’ɔtɛ wa mbetawɔ kele la so l’olambo wa tshungo waki Yeso. Ɔsɔ ekɔ dihole diahombaso mbɔsa la nɛmɔ di’efula. Lo ɛnyɛlɔ ka Davidi, sho kombolaka dia “mbidjase lu luudu la [Jehowa] lu nshi tshe ya lumu la[so].”—Osam. 27:4.
Ɔnangɛso Herd akatɛkɛta akambo wele lo Osambu 92:12-14 ndo akambola ate: “Ngande watokimanyiya Jehowa dia sho mfula?” Ndamɛ akakadimola ate: “Lo tshimbo ya paradiso kaso ka lo nyuma, Nzambi ekɔ lo tosha ɛhɛmwɛlɔ, ekɔ lo tokokɛ ndo ekɔ lo tosha ashi wa lɔsɛnɔ w’akambo wa mɛtɛ. Nyɛsɔ towokake losaka l’ɔtɛ w’akambo asɔ.” Oma lâsɔ, ɔnangɛso Herd akakeketsha ampokami ate: “Nyɛsɔ totshikale lo luudu la Jehowa, aha paka l’edja ka nshi mɔtshi tsho, koko pondjo pondjo.”
AKRISTO NƐMIYAKA ƆTƐKƐTA WAKI NZAMBI
Ɔnangɛso okina la l’Olui-walɔmbɔla, David Splane akalembetshiya lo sawo diande ɔnɛ Akristo wa mɛtɛ nɛmiyaka nshi tshɛ Ɔtɛkɛta waki Nzambi. Lo ntambe ka ntondo, Akristo wakayaɛkɛ lɔkɔ dia nkandola dikambo dia wahemelo w’ohekele. (Etsha 15:16, 17) Koko Akristo amɔtshi wakayɔsɛna lo ntambe ka hende wakalowanyema lo wetshelo wa filozofi y’ase Ngirika, wakayotatɛ ndjaɛkɛ lo diewo diawɔ lo dihole di’Ɔtɛkɛta waki Nzambi. L’ɔkɔngɔ diko, anto akina wakayɔhɛnyaka wetshelo wa lo Bible la tokanyi ta wanɛ wakayataka ɔnɛ wekɔ waa Mɔpɛrɛ ndo ewandji wa la Rɔma waketshaka wetshelo efula wa kashi.
Ɔnangɛso Splane akɛnya ɔnɛ lo wɛɛla ande wendana la kangaka l’eponga, Yeso akɛnya dia Akristo w’akitami wa mɛtɛ wokongaka nshi tshɛ la nkɛtɛ dia mamɛ akambo wa mɛtɛ. (Mat. 13:24-30) Sho hatokoke mbuta l’eshikikelo tshɛ waa na wakiwɔ. Koko sho mbeyaka dia l’edja ka ntambe efula, anto efula wakatone wetshelo wa kashi. L’atei awɔ mbaki ndo evɛkɛ Agobard de Lyons lakasɛnɛ lo ntambe ka 9, Pierre de Bruys, Henry de Lausanne, ndo Valdès (kana Waldo) lakasɛnɛ lo ntambe ka 12, John Wycliffe lakasɛnɛ lo ntambe ka 14, William Tyndale lakasɛnɛ lo ntambe ka 16, Henry Grew ndo George Storrs wakasɛnɛ lo ntambe ka 19. Ɛlɔ kɛnɛ, Ɛmɛnyi wa Jehowa wekɔ lo ntetemala nsukɛ atɔndɔ wa l’Afundelo ndo mbetawɔka ɔnɛ Bible mbele l’akambo wa mɛtɛ. Diakɔ diakasɔnɛ Olui-walɔmbɔla divɛsa dia l’ɔnɔnyi wa 2012 dia Joani 17:17 diata ɔnɛ: ‘Ɔtɛkɛta ayɛ wekɔ mɛtɛ.’
ETSHIKITANU WENDANA LA KALASA Y’OLOWANYELO
Ɔnangɛso la l’Olui-walɔmbɔla, Anthony Morris, akewoya ɔnɛ etshikitanu wambosalema lo dikambo dia waa misiɔnɛrɛ ndo ambatshi mboka wa lânde. Nde akate ɔnɛ oma lo Ngɔndɔ ka divwa 2012, Kalasa ka Bible k’atshukanyi w’Akristo kayotatɛ lo wedja ɛmɔtshi. Oyango wa ntondo wa Kalasa ka Ngiliyadɛ ambotshikitana. Ntatɛ oma lo Ngɔndɔ ka dikumi, wanɛ tshɛ wayolowanyemaka lo Kalasa ka Ngiliyadɛ pombaka monga wanɛ wakamba olimu wa lo tena tshɛ, ɛnyɛlɔ waa misiɔnɛrɛ wahatɔtɔ kalasa kakɔ, ambatshi mboka wa lânde, emendji weteta kana ase nkumbo ya Bɛtɛlɛ. Wanɛ wayokotshaka lo Kalasa ka Ngiliyadɛ wayotomamaka lo waa Bɛtɛlɛ, l’etshimbedi kana l’ɛtshi kɛmɔtshi ka nkɛtɛ dia tokeketsha ekambi waki Nzambi dia vɔ ndeka nkamba olimu w’esambishelo.
Ambatshi mboka wa lânde wayotomamaka lo bɛtshi dia nkɛtɛ di’etale diahatasambishama. Ntatɛ lo Ngɔndɔ ka ntondo 1, 2012, anangɛso amɔtshi wayokotshɛka lo Kalasa ka Bible k’anangɛso w’enyemba ndo wanɛ wayokotshɛka lo Kalasa ka Bible k’atshukanyi w’Akristo wayotomamaka oko ambatshi mboka wa lânde lo tshanda mɔtshi ndo wayowatomaka dia vɔ tosambisha lo bɛtshi dia nkɛtɛ di’etale. Vɔ wayoyalaka ambatshi mboka wa lânde ɔnɔnyi ɔtɔi kana esato. Oma lâsɔ, wanɛ wayokamba dimɛna wayotomama l’ahole amɔtshi shikaa dia vɔ tokamba oko ambatshi mboka wa lânde.
Losanganya la l’ɔnɔnyi 2011 laki mɛtɛ etena k’ɔngɛnɔngɛnɔ. Sho nongamɛka dia Jehowa ayɔtshɔkɔla tɛdikɔ t’eyoyo tambɔsama dia sho ndeka nkamba olimu aso w’esambishelo ndo ndeka monga kâmɛ lo nkumbo kaso k’onto l’ɔnango ka l’andja w’otondo dia mbotombola.
[Kiombo/Esato wa lo lɛkɛ 18, 19]
TAKAWAEYE DIMƐNA
Ekongelo kɛsɔ kaki nto l’ɛkɔnya wakawakɔnya wadi waki edo w’ase olui-walɔmbɔla, mbuta ate wadi waki edo atanu lo divwa weke la lɔsɛnɔ. Kadiyɛso Marina Sydlik, Edith Suiter, Melita Jaracz, Melba Barry, ndo Sydney Barber, vɔ tshɛ wakate woho wakaweke akambo wa mɛtɛ ndo wakawayokoma lo nkamba olimu wa lo tena tshɛ. Vɔ tshɛ onto l’onto akate akambo w’amɛna wakakeketsha ampokami, wendana la waomɛwɔ ndo ɛtshɔkɔ wambowokondja vɔ tshɛ. L’ekomelo k’ɛkɔnya ɛsɔ, ampokami wakembe osambo 86 wele l’ɔtɛ a dui ɔnɛ: “Akadiyɛso w’Akristo wekɔ wamato wa kɔlamelo.”
[Esato]
(La diko) Daniel la Marina Sydlik; Grant la Edith Suiter; Theodore la Melita Jaracz
(L’ɛse) Lloyd la Melba Barry; Carey la Sydney Barber
[Kartɛ ka lo lɛkɛ 16]
(Dia mbeya awui tshɛ enda l’okanda)
Filialɛ shamalo yakavu di’olimu wa lo wedja ɛsɔ ntatɛ nɔmbwama oma le filialɛ ka Mexique
MEXIQUE
GUATÉMALA
HONDURAS
SALVADOR
NICARAGUA
COSTA RICA
PANAMA
[Osato wa lo lɛkɛ 17]
Ngango mbayonga Mbalasa ka la Warwick, New York, kalɔmbɔla olimu w’Ɛmɛnyi wa Jehowa wa l’andja w’otondo