Onde wɛ âkohɔ?

Onde wɛ akangɛnangɛna wadielo wa numɛlɔ ya Tshoto y’Etangelo yeke katomba? Naka ngasɔ, kete enda dia kana wɛ kokaka nkadimola ambola wayela anɛ:

Onde wolo waki Samisɔna waki lo divo diande?

Aha divo diaki Samisɔna mbakawoshaka wolo. Lam’ele nde aki Okidiami, divo diande diaki didjidji dia diɔtɔnganelo dia lânde diaki lam’asande la Nzambi. Diɔtɔnganelo sɔ diakalana etena kakohembola Delila dia wadɛnde divo sɔ.—4/15, lɛkɛ 9.

Lo mbɛdika la otema aso wa mɛtɛ mɛtɛ, naa akambo asato wakoka monga la shɛngiya ya dimɛna l’otema aso wa didjidji?

1) Mbo ya ndɛ. Otema aso wa mɛtɛ mɛtɛ wekɔ l’ohomba wa mbo ya ndɛ y’amɛna lushi tshɛ. 2) Osutshesutshelo wa demba. Monga l’ohetoheto l’olimu w’esambishelo kokaka tokimanyiya dia sho monga la lonyuma la dimɛna. 3) Dihole dieso. Sho kokaka nkitshakitsha ekiyanu lo sanganaka kâmɛ l’asekaso ambetawudi wayakiyanya dikambo diaso.—4/15, lɛkɛ 16.

Lande na kahahombe ɔtɛkɛtshi washa sawo di’okundelo nkamba la Osambu 116:15 lo dikambo di’onto lambovɔ?

Divɛsa diakɔ mbutaka ɔnɛ: “Lu ashu a [Jehowa], nyoi k’ekilami andi keko ushinga a wulu.” Dui sɔ nembetshiyaka ɔnɛ Nzambi mbɔsaka la nɛmɔ nyɔi k’ekambi ande wa kɔlamelo tshɛ wate kana oko nde hetawɔ dia vɔ mvɔ. Nde hetawɔki di’ekambi ande shilama oshiki oko olui la nkɛtɛ.—5/15, lɛkɛ 22.

Waa na waki esambisha wa lo tena tshɛ?

La ntondo ka 1931, tshɛkɛta “esambisha wa lo tena tshɛ” yakendanaka la wanɛ welamɛ nshi nyɛ ɔnɛ ambatshi mboka.—5/15, lɛkɛ 31.

Waa na wakenga “waulelu ako tshe” wɔtɛkɛtami lo Danyele 2:44?

Divɛsa nɛ tɛkɛtaka dia waolelo kana mandji yele didjidji dia tenyi dia lohingu lakalembetshiya Danyele.—6/15, lɛkɛ 17.

Etena kakɔna kakakome Diolelo di’ase Amɛrikɛ l’Angleterre lowandji l’esambele laheme andja w’otondo lo ndjela prɔfɛsiya ya lo Bible?

Diolelo sɔ dialɔmbɔla andja w’otondo diakatatɛ etena kakatatɛ Grande-Bretagne la États-Unis d’Amérique nkamba kâmɛ lo yoho ya diambo lam’akalɔmaka Ta dia ntondo di’andja w’otondo.—6/15, lɛkɛ 19.

Kakɔna kakoka onto nsala dia mbewɔ diɔtɔnganelo dia l’ɛdiɛngɛ?

Nde pombaka mbewɔ oseka ɛngɔ tshɛ kakoka ndjokonya dia monga la diɔtɔnganelo la ɛdiɛngɛ. (Etsha 19:19, 20) Onto pombaka mbidja welo w’efula dia ‘ndjasukanya la Nzambi,’ l’eshikikelo ɔnɛ nde kokaka ndo ayokokimanyiya dia tshungɔ oma lo tɔsɛngiya t’ɛdiɛngɛ. (Jak. 4:7, 8)—7/1, lɛkɛ 12.

Lande na kele yoho ya nyɔi kakavu Yeso yakatakanya ase Juda amɔtshi?

Lo ndjela kɛnɛ kakate onto ɔmɔtshi, ase Juda wa lo ntambe ka ntondo wakɔshi yoho yakadiakema Yeso oko dui dia nsɔnyi efula. Vɔ waketawɔka dia woho wavɔ onto mɛnyaka woho w’onto wende. Ɔnkɔnɛ, lo menda woho wa nyɔi kakavu Yeso, ekɔ oko nde aki onto lele bu la nɛmɔ.—7/1, lɛkɛ 13.

Naa atɔndɔ amɔtshi wakoka nkimanyiya onto dia nde ndjonga la ɔngɛnɔngɛnɔ lo nshi yayaye?

Kana yimba lo etombelo wakoka ndjala la tɛdikɔ tayɛ. (Tuk 22:3) Ɔsa yɛdikɔ wɛmɛ. Sɛdingola etombelo wayonga la tɛdikɔ tayɛ lo nshi yayaye. (Tuk. 21:5) Sala la wolo dia nkotsha eyango ayɛ. (Joa. 17:3)—7/1, lɛkɛ 18-19.

Naka ekondjelo kaya wolo, naa atɔndɔ amɔtshi wa lo Bible wakoka nkimanyiya onto dia ndɔshana l’okakatanu ɔsɔ?

Tɛdiki oshinga. (Luka 14:28) Tshikitanya yoho yayɛ ya lɔsɛnɔ. (Tuk. 22:3) Etawɔ nkamba elimu ekina. (Tuk. 29:25) Ngɛnangɛna la kɛnɛ kele la yɛ. (Fil. 4:11, 12)—7/1, lɛkɛ 20-21.