Tatokambake la Bible lo yoho ya kɔlɔ
“ƆTƐKƐTA wa Nzambi wekɔ la lɔsɛnɔ ndo la wolo.” (Hɛb. 4:12) Oma l’ɛtɛkɛta ɛsɔ, ɔpɔstɔlɔ Pɔɔlɔ akɛnya wolo wa munanda etema ndo ntshikitanya nsɛnɔ wele la Ɔtɛkɛta wa Nzambi.
Etena kakatatɛ waa apɔsta mfula l’ɔkɔngɔ wa nyɔi k’apɔstɔlɔ, anto efula wakayotatɛ monga la kanyi ya kɔlɔ lo kɛnɛ kendana la wolo wele la Bible. (2 Pet. 2:1-3) Ewandji w’ɛtɛmwɛlɔ efula wakayotatɛ mbetsha ɔnɛ Bible kekɔ la wolo wa maji wa nshimbɛ anto. Prɔfɛsɛrɛ Harry Gamble akate woho wakayokomaka Akristo lo nkamba la Bible lo awui wa maji. Nde akafunde dia lo ntambe ka sato Origène le père akate ɔnɛ: “Mboka tsho awui wele lo Bible kokaka nkimanyiya onto lo yoho mɔtshi. Naka awui wa lo Bible wakamba la wɔ lo maji wekɔ la wolo wa nkimanyiya onto, kete hoke Afundelo wakafundama oma lo wolo wa Nzambi?” Jean Chrysostome lakasɛnɛ oya l’ekomelo ka ntambe ka nɛi, akafunde ate: “Satana hasukanaki pondjo nsuke la luudu lele la Bible.” Nde akate nto di’anto amɔtshi pakɛka diangɔ dimɔtshi diele la avɛsa wa lo Bible lo kingo yawɔ, wafɔnya dia wayoyashimbɛ oma lo kɔlɔ. Prɔfɛsɛrɛ Gamble akayotaka nto ɔnɛ Augustine laki ombewi wa teoloji w’aseka Mupɛ “akate dia ekɔ dimɛna nkitsha Bible kele l’Evanjiliɔ wa Joani l’ɔtɛ a mbeto naka onto ekɔ lo ntata.” Mbokɛmaka di’anto wakayotatɛ nkamba la Bible lo yoho ya kɔlɔ. Onde ndo wɛ mbahomba ndalaka la Bible l’ɔtɛ a mbeto kana mongaka la tɔ wonya tshɛ dia tɔ kokokɛ oma lo waale ɛmɔtshi?
Anto efula kambaka la Bible lo yoho nkina ya kɔlɔ. Naa yoho yakɔ? Vɔ fɔnyaka ɔnɛ naka onto mbifola Bible, kete ɛtɛkɛta wa lo divɛsa wayondɛna ntondo wayowosha ɛlɔmbwɛlɔ kende l’ohomba. Ɛnyɛlɔ, lo ndjela prɔfɛsɛrɛ Gamble, etena kakoke Augustine dui di’ɔna ɔmɔtshi lo luudu l’osukanyi ande diata ɔnɛ: “Ɔsa kele adia, ɔsa kele adia,” Augustine akafɔnya ɔnɛ ɔsɔ ekɔ didjango di’oma le Nzambi diamondowotɛ dia mbifola Bible ndo mbadia divɛsa dia ntondo diayondɛna.
Onde wɛ mbeyaka anto amɔtshi wakakambe la Bible lo yoho shɔ dia nkandola ekakatanu wa lo lɔsɛnɔ, lo nɔmba Nzambi, ko oma laasɔ vɔ mbifola Bible la kanyi y’ɔnɛ divɛsa dia ntondo diayowɛna diayowakimanyiya dia nkandola ekakatanu awɔ? Mbeyaka monga mɛtɛ ko anto asɔ wekɔ l’eyango w’amɛna, koko ɔsɔ bu yoho ya dimɛna yahomba Akristo nyanga ɛlɛmbwɛlɔ k’oma l’Afundelo.
Yeso akashikikɛ ambeki ande dia nde ayowatomɛ “okimanyedi, nyuma k’ekila.” Nde akakotsha ate tɔ “kayonyetsha akambo tshɛ ndo kayonyohola akambo tshɛ wakamanyotɛ.” (Jni. 14:26) Mbokɛmaka dia sho kondjaka ekimanyielo oma lo Bible lo nkamba la kɛnɛ kakateke oma lɔkɔ, koko aha lo mbifola tsho divɛsa dimɔtshi ko pe.
Ɛlɔ kɛnɛ, anto wokambaka la Bible lo awui wa maji, walongamɛ dia tɔ mbakokɛ oma lo waale, dia nkandola ekakatanu wele la wɔ kana dia mbeya awui wa lo nshi yayaye. Koko Bible mbutaka di’ekɔ kɔlɔ nsala awui wa maji. (Lɛw. 19:26; Eoh. 18:9-12; Etsha 19:19) Kaanga mbele “Ɔtɛkɛta wa Nzambi wekɔ la lɔsɛnɔ ndo la wolo,” sho pombaka monga la yewo lo woho wakambaso la wɔ. Monga l’ewo ka mɛtɛ k’oma lo Bible ndo aha nkamba la tɔ lo awui wa dikanyiyakanyiya, ndowanyaka nsɛnɔ y’anto. Ewo kɛsɔ kambokimanyiya anto efula dia monga la lɔkɛwɔ la pudipudi, mbewɔ yoho ya lɔsɛnɔ lakoka mbadja lo waale, kambokeketsha nsɛnɔ ya nkumbo efula ndo kambokimanyiya anto efula dia ndowanya diɔtɔnganelo diele lam’asawɔ la ɔnɛ lele Kiɔkɔ ya Bible.
[Osato wa lo lɛkɛ 3]