ONDE WƐ AAKOHƆ?
Onde wɛ akangɛnangɛna wadielo wa numɛlɔ ya Tshoto y’Etangelo yeke katomba? Naka ngasɔ, kete enda kana wɛ kokaka nkadimola lo ambola wayela anɛ:
Nkamba la Bible lo yoho ya kɔlɔ kɛdikɛdi na, ndo ngande wakoka Akristo mbewɔ tshelo shɔ?
Nkamba la Bible lo yoho ya kɔlɔ kɛdikɛdi mbifola Bible lo lɛkɛ lakɔna tshɛ la kanyi y’ɔnɛ divɛsa tshɛ dia ntondo diayotɛna diayotokimanyiya l’okakatanu wele la so. Koko Akristo wa mɛtɛ hawombe nsala ngasɔ. Lo dihole dia vɔ nsala ngasɔ, vɔ mbekaka Bible dia nkondja ewo ndo ɛlɔmbwɛlɔ kaki Nzambi.—12/15, lɛkɛ 3.
“Andja” wayeta kɛdikɛdi na?
“Andja” wayeta kɛdikɛdi anto tshɛ wa l’andja ɔnɛ wahasɛnɛ lo yoho yɔtɔnɛ la lolango laki Nzambi. (1 Jni. 2:17) Nkɛtɛ ndo anto wele la kɔlamelo mbayotshikala.—1/1, lɛkɛ 5-7.
Kaanga mbakandavu, ngande watetemala Abɛlɛ teetsha? (Hɛb. 11:4)
Nde aki la mbetawɔ ka wolo. Sho kokaka mbeka awui efula oma le nde ndo mbokoya mbetawɔ kande. Ɛnyɛlɔ kande kekɔ lo ntetemala teetsha.—1/1, lɛkɛ 12.
Lo awui akɔna amɔtshi wakokaso ndjalama diaha sho ndjanganya la Nzambi?
Awui amɔtshi vɔ anɛ: Olimu wahombaso nkamba, tɔkɛnyɔ ndo ɔkɔkwɛlɔ wa demba, diɔtɔnganelo l’ose nkumbo lambotshanyema, woho wayashaso l’akambo wa tshulatshula dia nshi nyɛ, esakelo, falanga ndo ndeka ndjaɔsa la nɛmɔ amboleka.—1/15, lɛkɛ 12-21.
Wetshelo akɔna wakokaso nkondja oma l’okitshakitsha waki la Mɔsɛ?
Lo dihole dia nde mbetawɔ di’ɛkɛndɛ waki la nde mbokonya dia monga l’otako, Mɔsɛ akayaɛkɛ le Nzambi, koko aha lende ndamɛ. Woho akɔ waamɛ mbele, lo dihole dia sho ndjadiya kana monga l’otako l’ɔtɛ wa wolo, lowandji, akoka wele la so, sho pombaka ndjaɛkɛ le Jehowa. (Tuk. 3:5, 6)—2/1, lɛkɛ 5.
Lende ayɔsɛna wanɛ wayolwama?
Djui y’anto—144 000—wayotɔsɛna l’olongo. Anto akina wayolwama la dikoka dia nsɛna pondjo pondjo lanɛ la nkɛtɛ.—3/1, lɛkɛ 6.
Ɛtɛkɛta w’ɔnɛ ase Isariyɛlɛ ‘kombahenya etema awɔ ohekele’ alembetshiyawɔ? (Jer. 9:26)
Vɔ waki atɔmbɔki ndo etema waki lonyu. Eyango ndo tokanyi tawɔ kɔngɛnyangɛnyaka Nzambi. (Jer. 5:23, 24)—3/15, lɛkɛ 9-10.
Lo woho akɔna waki Yeso ɛnyɛlɔ k’onto laki la lɔsɛnɔ lele l’oyango?
Nde aki l’oyango lo lɔsɛnɔ, mbuta ate wa nsala lolango laki Nzambi. Nde akookaka She ndo anto akina ngandji k’efula. Ndo nto, Yeso akeyaka dia nde aketawɔmaka ndo akalangemaka le She. Awui asɔ mbakakimanyiya Yeso dia lɔsɛnɔ lande monga l’oyango.—4/1, lɛkɛ 4-5.
Ngande wokengami etenyi k’okongamelo waki Nzambi ka la nkɛtɛ?
Tɔ kekɔ la Olui-walɔmbɔla, kɔmite ya filialɛ, emendji weteta, elui wa dikumanyi, tshumanelo, ndo Ɛmɛnyi wa Jehowa ekina.—4/15, lɛkɛ 29.
Lande na kataso ɔnɛ Nzambi bu kanga esehe lo woho wakandela dombwelo diande la nkɛtɛ?
Jehowa hangɛnangɛna nyɔi k’onto a kɔlɔ; ndo nde nyangaka efula etena kalangande mbalanya. (Ezek. 33:11) Kɛnɛ kakandasale lo nshi y’edjedja mɛnyaka dia nde pɛmɔlaka anto la ngandji tshɛ la ntondo ka nde ndjela elombwelo kande. Dui sɔ koka tosha elongamelo k’ɔnɛ tayoyoka lo nshi yayaye.—5/1, lɛkɛ 5-6.
Onde ase Isariyɛlɛ wakadiakaka anto wa kɔlɔ lo mbaahanɛ l’etamba?
Keema. Wedja ekina wakasalaka dui sɔ, koko aha ase Isariyɛlɛ. Atshi wa kɔlɔ wakadiakemaka ntondo, ɛnyɛlɔ lo mbokama ave. (Lew. 20:2, 27) Oma laasɔ, ko vɔ ndjohanɛ odio ande l’otamba dia mbewola anto akina.—5/15, lɛkɛ 13.
Lande na kele ekɔ dui dia wolo di’andja ɔnɛ monga lo wɔladi?
Kaanga mbambosala anto efula akambo wa weke, vɔ bu l’akoka wa ndjalɔmbɔla. (Jer. 10:23) Edja tshɛ kaakalɔmbɔla Satana andja ɔnɛ, anto hawongaki pondjo lo wɔladi. (1 Jni. 5:19)—6/1, lɛkɛ 16.