Onde Yeso akalake otshi wa pɛkato dia tɔsɛna lande l’olongo?

Dimbola sɔ mimbwamaka nɛ dia, Yeso akalake otshi wa pɛkato wakahanema suke lande l’otamba dia tɔsɛna lande lo paradiso. Nde akawotɛ ate: “Lo mɛtɛ kakotɛmi ɛlɔ nte: Wɛ ayoyala la mi lo Paradiso.” (Luka 23:43) Tolembete dia Yeso kombuta dihole shikaa diakahombe paradiso kɛsɔ ndjala. Onde laasɔ, Yeso akalange mbuta di’otshi wa pɛkato ɔsɔ akahombe mboyela l’olongo?

Ntondotondo, nyɛsɔ tende kana otshi wa pɛkato ɔsɔ akakotshaka kɛnɛ kalɔmbama dia tɔsɛna l’olongo. Anto wahomba tɔsɛna l’olongo batizamaka lo ashi, la nyuma k’ekila ndo komaka ambeki wa Yeso wambotɔ lo nyuma. (Joani 3:3, 5) Dui dikina dialɔmbama, ele vɔ pombaka nkitanyiya ɛlɛmbɛ waki Nzambi wendana la lɔkɛwɔ ndo kɛnɛmɔla waonga wele oko: Losembwe, olowanyi ndo kɛtshi. (1 Kɔrɛtɔ 6:9-11) Vɔ pombaka nto, ntshikala la kɔlamelo le Nzambi ndo le Kristo polo l’ekomelo ka nsɛnɔ yawɔ lanɛ la nkɛtɛ. (Luka 22:28-30; 2 Timɔte 2:12) Paka lo nkotsha awui asɔ, mbakokawɔ mbolwama ndo monga l’akoka wahombama dia tokamba olimu waakongɛ l’olongo, mbuta ate tokamba oko ɛlɔmbɛdi ndo oko nkumi ya dikanga kaamɛ la Kristo dia nɔmbɔla anto wa l’andja w’otondo l’edja k’ɛnɔnyi kinunu.​—Ɛnyɛlɔ 20:6.

Koko, otshi wa pɛkato wakawahanɛ suke la Yeso ɔsɔ, aki ɔtɔmbɔki ndo nde akavu la dionga diande dia kɔlɔ sɔ. (Luka 23:32, 39-41) Ekɔ mɛtɛ dia nde akɛnya dilɛmiɛlɔ etena kakandatɛ Yeso ate: “Kombohɔ lam’ayoyonga lo Diolelo diayɛ.” (Luka 23:42) Koko, nde kobatizama, kombotɔ lo nyuma oko ombeki waki Yeso ndo nde kɔmɛnya dia nde aki onto ɔlɔlɔ ndo lele la kɔlamelo etena kakinde la lɔsɛnɔ. Onde otonga dui dia lomba dia Yeso ndaka woho w’onto wa ngasɔ dia nde tɔsɛna l’olongo kaamɛ l’ambeki ande waki la kɔlamelo le Nzambi polo l’ekomelo?​—Rɔmɔ 2:6, 7.

Tɔshi ɛnyɛlɔ kɛnɛ: Naka onto ɔmɔtshi lakakove falanga ambokɔlɔmba edimanyielo, ekɔ mɛtɛ dia wɛ koka mbodimanyiya. Ko, onde wɛ ayotetemala mbɛkɛ otema le nde ɛnyɛlɔ, lo mbotshikɛ makashinyi ayɛ dia nde kosondjɛka kana mbotshikɛ ɔkɛndɛ wa nkumbo kayɛ? Aha la taamu, paka anto wɛkɛyɛ otema lewɔ mbakokayɛ mbisha ɛkɛndɛ wa ngasɔ. Woho akɔ waamɛ mbele, wanɛ wele la diɛsɛ dia tɔsɛna l’olongo pombaka monga anto wɛkɛwɔ otema lewɔ ndo wayotolama ɛlɛmbɛ wosembwe waki Nzambi etena kayowolɛ laadiko dia nkɛtɛ k’otondo. (Ɛnyɛlɔ 2:10) Mɛnamaka dia kaanga lo minitɛ k’ekomelo ka lɔsɛnɔ la nde, otshi wa pɛkato ɔsɔ kɔkɛnɛmɔla waonga asɔ.

Ko onde laasɔ, Yeso akatɛ otshi wa pɛkato ɔsɔ dia nde ayodɛ la nde l’olongo ko lushi lakɔ laamɛ? Dui sɔ kokoka salema nɛ dia Yeso ndamɛ kombidɛ l’olongo ko lushi lakɔ laamɛ. Koko, nde aki lo “diombo” nshi shato. (Mateo 12:40; Makɔ 10:34) Kaanga l’ɔkɔngɔ wa nde mbolɔ, Yeso akatshikala nshi 40 la nkɛtɛ la ntondo ka nde mbidɛ l’olongo. (Etsha 1:3, 9) Mbokɛmaka di’otshi wa pɛkato ɔsɔ kokoka mbidɛ l’olongo nde la Yeso lushi lɔsɔ.

Ko, lo paradiso kakɔna kakahombe otshi wa pɛkato mbɔtɔ? L’ɔkɔngɔ wa eolwelo kande, nde ayonga lo paradiso ka la nkɛtɛ lɛnɛ ayonga Yeso ɔnɔmbɔdi. (Etsha 24:15; Ɛnyɛlɔ 21:3, 4) Dia wɛ mbeka awui akina wendana la paradiso kɛsɔ ndo kɛnɛ katɔlɔmba Nzambi, wɛ mbeyaka mɛnana l’Ɔmɛnyi wa Jehowa ɔmɔtshi.