“Laki la dionga dia kɔlɔ efula”

NSHI YAMI YAKETE:

Lakole lo ngielongelo ya wola yosukanyi la dibongo dia l’osomba wa Turku. Papa aki manyi lo tɔkɛnyɔ takɔmwanawɔ akɔfi ndo dimi la koshɛmi ka pami takayoyashaka tshɛ lɔkɔ. Lakalɔka ata mbala efula la kalasa. Lam’akimi l’ɛnɔnyi dikumi l’ɛmɔtshi, lakayɔtɔka l’olui wa dengalenga wakeyamaka efula ndo lakayoleka ndjasha l’awui wa ngala. Lakayoyashaka nto lo mishiki wa ngala ndo laki l’oyango wa nkoma opomi wa mishiki wa lokumu.

Lakasombe dihomɔ dia mishiki, lakakenge olui w’amembi ndo kombeta edja, lakayokomaka ɔnɔmbɔdi w’olui akɔ. Lakayashaka l’akambo wa kɔlɔ lo yoho ya tshambandeko. Lam’ele olui aso waki la dengalenga efula lɔkɔ ndo la yimba y’ɔtɔmbɔkwɛlɔ, takayotatɛka mbeyama efula. Takayotatɛka memba la ntondo ka nyemba nyemba y’anto, ndo takatondja wa bandɛ efula, koko bandɛ k’ekomelo kakaleke ngɛnyangɛnya anto. Oya l’ekomelo k’ɛnɔnyi wa 1980, takatshu otsha l’États-Unis di’olui aso nyomoleka mbeyama. Takasale kɔsɛrɛ mɔtshi la New York ndo la Los Angeles, takatongaka la diɔtɔnganelo l’amembi akina wa mishiki la ntondo ka sho nkalola oya la Finlande.

Kaanga mbakamangɛnangɛnaka olimu ami, lakakombolaka dia ndeka monga la lɔsɛnɔ l’ɔngɛnɔngɛnɔ. Dimi kɔngɛnangɛnaka yimba ya shɛmanedi yaki l’amembi wa mishiki ndo lakayotatɛ ndjakiyanya lo kɛnɛ kendana la yoho yami ya lɔsɛnɔ. Lakayaɔsaka ɔnɛ laki otshi wa pɛkato ndo lakokaka wɔma wa ndjotshumbama lo dja ya ifɛrnɔ. Lakayotatɛka ndjasha efula l’awui w’ɔtɛmwɛlɔ, ndo lakalɔmbɛ efula le Nzambi dia nde kimanyiyami kaanga mbakamafɔnyaka dia nde hadimanyiyaki pondjo.

WOHO WAKATSHIKITANYA BIBLE LƆSƐNƆ LAMI:

Dia ndjakotshɛ ehomba ami, lakayotatɛka nkamba djemulemu mɔtshi lo pɔstɛ. Lushi lɔmɔtshi lakayosholaka dia osekami ɔmɔtshi la l’olimu aki Ɔmɛnyi wa Jehowa. Lakɔpɔpɛ ambola. Koko, ekadimwelo ande wa lomba wotombi oma l’Afundelo wakamambiya efula, ndo laketawɔ dia sho mbeka Bible. L’ɔkɔngɔ wa dimi ntatɛ mbeka Bible l’edja ka mingu ngana, olui aso w’amembi wakakondja diɛsɛ dia ntshɔ totondja albumu ɔmɔtshi w’esambo l’États-Unis. Lakate dia halokoke pandja diɛsɛ sɔ.

Lakatɛ Ɔmɛnyi wa Jehowa wakekaka la mi Bible ɔnɛ lekɔ lo nkombola tasadi albumu ɔsɔ ko l’ɔkɔngɔ diko, dimi ndjɔtɔnganyiya yoho yami ya lɔsɛnɔ l’atɔndɔ wa lo Bible. Nde kombuta ndooko dui, koko akanɔmbɛ dia mbadia ɛtɛkɛta wa Yeso wele lo Mateo 6:24. Divɛsa diakɔ mbutaka ɔnɛ: “Ndooko onto lakoka kambɛ ewandji ehende olimu.” Lakanandema efula etena kakamashihodia kitshimudi y’ɛtɛkɛta wa Yeso ɛsɔ. Koko l’ɔkɔngɔ wa nshi ngana, Ɔmɛnyi wa Jehowa wakekaka la mi Bible akayambaka heyama etena kakamawotɛ ɔnɛ lambomɔ oma l’olui w’amembi dia monga ombeki wa Yeso.

Bible kaki oko talatala le mi, nɛ dia tɔ kakakimanyiya dia mbeya munga yami. (Jakɔba 1:22-25) Lakayoshihodiaka dia laki la dionga dia kɔlɔ efula nɛ dia laki kanga otako ndo laki l’eyango wa lokaki. Lakatondjaka ɛtɛkɛta wa kɔlɔ, lakalɔka ata, lakanɔka mfɔka ndo laki ombidjɔki a wanu. Laki la lonyangu l’efula etena kakamayoshihodia ɔnɛ yoho yami ya lɔsɛnɔ kɔmbɔtɔnɛka l’atɔndɔ wa lo Bible. Kaanga mbaki dui sɔ wolo, laki suke dia nsala etshikitanu wahombama.​—Ɛfɛsɔ 4:22-24.

L’etatelo lakayaɛndjaka onongo l’ɔtɛ wa lɔkɛwɔ la kɔlɔ laki la mi ntondo. Koko, Ɔmɛnyi wa Jehowa wakekaka la mi Bible akakimanyiya efula. Nde akamɛnya kɛnɛ kata Bible lo Isaya 1:18: “Kuyanga kolo yanyu yeli tilili, yo yayuyala wema uku pembe.” Divɛsa nɛ ndo avɛsa akina wa lo Bible, wakambetawoya dia Shɛso lele l’olongo ekɔ kanga kɛtshi ndo nde ekɔ suke dia dimanyiya wanɛ wayatshumoya oma lo pɛkato yawɔ.

Etena kakamayeya Jehowa ndo kakamatatɛ mbooka ngandji, lakayonga la nsaki ka ndjakimɔ le nde. (Osambu 40:8) Lakayobatizama lo 1992 lo losanganya la wedja efula l’Ɛmɛnyi wa Jehowa lakasalema la Saint-Pétersbourg, lo wodja wa Russie.

WAHƆ WAMOMOKONDJA:

Lakakondja angɛnyi efula l’atei w’atɛmɔdi wa Jehowa. Ntatɛ l’etena kɛsɔ ndo nshi nyɛ, tekɔ lo nkɛnya mishiki w’amɛna ndo tekɔ lo ngɛnangɛna la woshasha w’oma le Nzambi ɔsɔ. (Jakɔba 1:17) Woshasha wa laande wakamakondja, ele woho wakatatshukana la Kristina kokami ngandji heyama. Dimi la nde salaka akambo efula kaamɛ, oyadi l’etena k’ɔngɛnɔngɛnɔ kana ka paa ndo dimi mboodiholɛka otema.

Otondongaka dimi kokoma Ɔmɛnyi wa Jehowa, tshike dimi bu la lɔsɛnɔ ɛlɔ kɛnɛ. Ntondo lakadiɛnɛka l’ekakatanu, koko kakianɛ, laya la lɔsɛnɔ l’ɔngɛnɔngɛnɔ ndo awui tshɛ waya l’ɔnɔngɔ.