ONDE WƐ AKEYAKA?

Lande na kakelamɛka Niniva k’edjedja ɔnɛ “usumba wa dikila”?

Niniva mbaki kapitalɛ ka diolelo di’ase Asuriya. Vɔ waki osomba wa dimɛna efula, waki la mvudu, tɛmpɛlɔ, toshinga ndo wakadingama la mpele dia weke. Nahuma, ɔprɔfɛta w’ose Hɛbɛru akelɛ osomba ɔsɔ ɔnɛ: “Usumba wa dikila.”​—Nahuma 3:1.

Dui sɔ diekɔ mɛtɛ, nɛ dia emindo wakawashola lo luudu laki Senakɛribɛ la la Niniva mɛnyaka dia ase Asuriya waki anto wa ngala efula. Osato ɔmɔtshi wakɛnyaka woho wakawahatolaka ose lokanu ɔmɔtshi lakawakɔsha lo nkɛtɛ lolemi. Efundelo mɛnyaka dia wakakotolaka ase lokanu l’eshinga wakawatungunaka l’ɛhɛmbɛ kana l’ɛlɔmɔ. Ɛlɔhɛ wakawandaka lo lokanu wakaalɔtshaka ɛtɛ w’ewandji awɔ oko tɔshɛnɛtɛ lo nkingo.

Arkeɔlɔgɛ w’ose Asuriya welɛwɔ Archibald Henry Sayce akɛnya kɛnɛ kakasalemaka l’ɔkɔngɔ w’osomba mbɔsama ɔnɛ: “Dimɛta di’ɛtɛ w’anto diaki didjidji di’ɔlɛndjɛlɔ; wakatshumbaka ana w’apami la wa wamato wasɛna kana mbakitsha dia ndjalambola olambo wa lokolo la kɔlɔ, wakahanɛka apami l’etamba, wakakɔmɔlaka, wakawaolaka washo, wakaahembolaka anya la ekolo, wakaahembolaka atui la ɛhɛmbɛ.”

L’oyango akɔna wakadingaka ase Juda lokombo l’ɛtɛ a mvudu yawɔ?

Nzambi akandjangɛ ase Juda ɔnɛ: “Lam’ayuyuhika luudu l’uyuyu, kudingi lukumbu l’utshimba w’ote alo, dia nshimba etshulwelu ka dikila lan’ayuyanga untu omotshi nko uma leko.” (Euhwelu k’Elembe 22:8) Lokombo lakawadingaka l’ɛtɛ a mvudu aki yɛdikɔ y’ekokelo yaki ohomba efula nɛ dia ase Juda wa lo nshi y’edjedja wakasalaka akambo efula lo ɛtɛ a mvudu yawɔ.

Ɛtɛ wa mvudu y’ase Isariyɛlɛ efula yaki la tshoto y’ebamubamu. Tshoto ya luudu yaki dihole dia dimɛna diakakokaka anto ntshɔ toka yanyi, tɔsa hiɛlɛlɛ ndo nsala elimu wa la ngelo. Ndo nto, dihole sɔ diaki dihole dia dimɛna dia ndala lo nshi y’ɔwɔ. (1 Samuele 9:26) Akambi wa dikambɔ wakaanɛka ntɔngɔ yawɔ la ntondo ka ndjitɔ kana manɛ elowa wa fingo.​—Jashua 2:6.

Oyadi wanɛ waki l’ɔtɛmwɛlɔ wa mɛtɛ kana atɛmɔdi wa dikishi, wakatshɔka tɔtɛmɔla lo dihole sɔ. (Nehemiya 8:16-18; Jeremiya 19:13) Ɔpɔstɔlɔ Petero akadɛ l’ɔtɛ a luudu wonya wa midi dia tɔlɔmba. (Etsha 10:9-16) Ndo nto, naka tshoto yakɔ yaki la dɛdi, kete anto wakakokaka ntshɔ lɛkɔ dia tomuya.

Dibuku dielɛwɔ La terre et le Livre (lo Angɛlɛ) mbutaka ɔnɛ mvudu y’ase Isariyɛlɛ yaki la kibandola kakaakimanyiyaka dia mbidɛ lo tshoto ya luudu “l’andja wa luudu.” Diakɔ diele, kanga luudu akakokaka polɔ oma la diko ka tshoto yande aha la mbɔtɔ lo luudu. Kɛsɔ mɛnyaka mɛtɛ k’ɛtɛkɛta waki Yeso wata ɔnɛ: “Onto lele lo tshoto ya luudu atoholɔke dia ndjɔsa diangɔ diele lo luudu lande.”​—Mateo 24:17.