Jehowa “keema la shɔnɔdi”

Onde watakɛngiyaka ndooko lushi? Onde watakodimaka ɛngɔ kɛmɔtshi kɔlɔmbiyɛ, kana olimu? Onde watakosalɛka akambo la diɔnyɔ l’ɔtɛ wa lokoho layɛ la demba, wa dioho diayɛ kana l’ɔtɛ wa dihole diale la yɛ lo tshunda? Naka wambokosalɛka akambo asɔ, kete eya diaha wɛmɛ oto mbakawasalɛ ngasɔ. Dui di’ɔlɔlɔ ele: Kaanga mambokokanɛ awui wa diɔnyɔ asɔ la nkɛtɛ, vɔ hawosalema l’olongo. Ɔpɔstɔlɔ Petero akate l’eshikikelo tshɛ ate: “Nzambi keema la shɔnɔdi.”​—Adia Etsha 10:34, 35.

Petero akate awui asɔ etena kakinde lo luudu laki Kɔnɛliyɔ laki ose Wodja. Petero aki ose Juda ndo nde akasɛnaka l’etena kakɔsaka ase Juda ase Wedja oko anto wa mindo ndo waki kombetawɔmaka le Akristo. Ko lande na kakatotanemaka Petero lo luudu laki Kɔnɛliyɔ? Lo tshena pe, aki nɛ dia Jehowa Nzambi akalɔngɔsɔla dia dui sɔ salema. Petero akɛnyi ɛnɛlɔ oma le Nzambi lakawotɛ ate: “Tshika mbelɛ diangɔ diele Nzambi ambodiɛdia ɔnɛ diangɔ dia mindo.” Aha la Petero mbeya, lushi ɔtɔi la ntondo ka nde nkoma laka Kɔnɛliyɔ, Kɔnɛliyɔ akɛnyi nde lawɔ ɛnɛlɔ. Lo ɛnɛlɔ kakɔ, ondjelo akɔɔlɔmbɛ dia nde mbelɛ Petero lakande. (Etsha 10:1-15) Etena kakɛnyi Petero dia Jehowa mbakasale dui sɔ, nde kokoka ntshika ntɛkɛta awui akɔ.

Petero akate ate: “Lo mɛtɛ, dimi lambɛna dia Nzambi keema la shɔnɔdi.” (Etsha 10:34) Tshɛkɛta ya lo Grɛkɛ yokadimɔmi ɔnɛ “shɔnɔdi” nembetshiyaka “menda onto l’elongi dia mbosemula.” (The Kingdom Interlinear Translation of the Greek Scriptures) Lo kɛnɛ kendana la tshɛkɛta shɔ, nomb’ewo kɛmɔtshi k’awui wa lo Bible akate ate: “Yɔ mendanaka la shushi yenda onto l’elungi ndo yahembola kilombo, aha lo ndjela woho wakete akambo mɛtɛ, koko lo ndjela woho walangande kana wahetshande onto lalomboshande.” Nzambi hɔshi anto amɔtshi la nɛmɔ dioleki akina l’ɔtɛ wa lokoho lawɔ la demba, wodja awɔ, dihole diele lawɔ lo tshunda kana l’ɔtɛ w’awui akina wɛnama la washo.

Koko, Jehowa mendaka kɛnɛ kele l’otema aso. (1 Samuele 16:7; Tukedi 21:2) Petero akayotaka nto ate: “Lo wedja tshɛ, onto lawoka wɔma ndo lasala akambo w’ɛlɔlɔ mbetawɔmaka le nde.” (Etsha 10:35) Mboka Nzambi wɔma nembetshiyaka mbɔlɛmiya, mbosha kɛnɛmɔ, ndjaɛkɛ le nde ndo mbewɔ nsala dui tshɛ diahɔngɛnyangɛnya. Nsala akambo w’ɛlɔlɔ nembetshiyaka nsala kɛnɛ kele ɔlɔlɔ lo washo wa Nzambi aha la onto totshutshuya. Jehowa ngɛnangɛnaka onto lawoka wɔma wɔsɔhanyemi la dilɛmiɛlɔ wootshutshuya dia nsala kɛnɛ kele ɔlɔlɔ.​—Euhwelu k’Elembe 10:12, 13.

Naka wambokɛngiyaka kana kokanɛ kɔlɔ, kete wɛ ekɔ l’ɔkɔkɔ w’oshika wa nkondja ekeketshelo oma l’ɛtɛkɛta wakate Petero lo dikambo dia Nzambi. Jehowa ekɔ lo nkotola anto w’oma lo wedja tshɛ oya l’ɔtɛmwɛlɔ wa mɛtɛ. (Joani 6:44; Etsha 17:26, 27) Nde pokamɛka ndo kadimolaka alɔmbɛlɔ w’atɛmɔdi ande wa mɛtɛ, oyadi lokoho lawɔ, dioho diawɔ, wodja awɔ kana dihole diele la wɔ lo tshunda. (1 Khumi ya Dikanga 8:41-43) Sho kokaka monga l’eshikikelo ɔnɛ etena kasɛdingola Jehowa anto oma l’olongo, nde mɛnaka dia vɔ tshɛ wekɔ dioho ɔtɔi, mbuta ate dioho di’anto. Shi wɛ pombaka mbeka akambo efula wendana la Nzambi kele bu la shɔnɔdi kɛsɔ?