Lande na kahombayɛ ndjasha lo Bible?

Bible ekɔ dibuku diamboleka kokanɛ l’andja w’otondo. Lande na? Ɔkɔkɔ ɔmɔtshi ele, nɛ dia tɔ kekɔ wɔdu nshihodia. Tɔ kekɔ l’ɛkɔndɔ w’anto wakasɛnɛ mɛtɛ l’andja ɔnɛ, mɛnyaka diɔtɔnganelo diaki lam’asawɔ ndo lam’asawɔ la Nzambi. Ɛkɔndɔ ɛsɔ toshaka wetshelo w’eshika nɛ dia wakakambe la tɔtɛkɛta ta wɔdu ndo tasembɔ tɔɔ lo dikambo takoka kadimɔma lo nkama y’ɛtɛkɛta ndo takoka mbokɛma le anto oyadi dihole diakɔna diewɔ kana etena kakɔna kasɛnawɔ. Ndo nto, atɔndɔ wa lo Bible hawetaki loowe pondjo.

Kɛnɛ koleki tshɛ ele, Bible bu tsho dibuku diatɛkɛta awui wendana la Nzambi, koko diɔ diekɔ dibuku di’oma le Nzambi. Tɔ tɛkɛtaka dia lokombo laki Nzambi, lonto lande ndo sangwelo diande diahatshikitana diendana la nkɛtɛ ndo l’anto. Bible mɛnyaka nto woho wambɔlɔsha Satana Jehowa l’etena k’otale, woho wayokomiya Jehowa la Satana ndo woho wayondonya akambo wa kɔlɔ. Naka sho mbadiaka Bible aha la nkanyi ya mbidja taamu, kete tayonga la mbetawɔ ndo l’elongamelo.

Bible kekɔ l’awui amɔtshi wahatakoke ntana dihole dikina. Ɛnyɛlɔ, tɔ totɛka mɛtɛ lo kɛnɛ kendana l’awui wayela anɛ:

• Oma lende akatatɔngɔ ndo lande na kasowaso

• Kɛnɛ kakasale Nzambi dia ntshungola anto

• Kɛnɛ kakasale Yeso lo wahɔ aso

• Woho wayonga nkɛtɛ ndo anto lo nshi yayaye

Shi wɛ koka ndjatshungolɛ etena ka mbadia asawo wayela anɛ dia mbeya losango lakɔna lele lo Bible?