“Anto efula wakatatɛ petshami”

NSHI YAMI YAKETE:

Lakodiama la Santiago, kapitalɛ ka Chili, l’ɛtshi ka nkɛtɛ kaki la anɔshi wa didjoyadjoya, dengalenga, ndo akambo wa ngala. Etena kakamakotsha ɛnɔnyi etanu, wakadiake papa. L’ɔkɔngɔ wa laasɔ, mama akadjasɛ la pami kɛmɔtshi kaki kanga ngala. Nde akatɔkɔmɔlaka dimi la mama mbala la mbala. Lakatetemala mbohɔ ɛnɔnyi wa shɔkɔ ɛsɔ.

Shɛngiya yakayonga la lɔkɛwɔ la kɔlɔ laki la pami kakadjasɛka la mama le mi ele, lakayokomaka kanga ngala k’efula. Lakahokamɛka mishiki wa kɔlɔ, lakanɔka wanu lo tshambandeko ndo mbala mɔtshi lakanɔka didjoyadjoya. Lakalɔka ata dimi la anɔshi wa kaandji nɛ dia mbala efula vɔ wakayangaka dia ndjakami. Lo diaaso dimɔtshi, vɔ wakatokana l’elengalenga kɛmɔtshi kakanyanyemaka dia nde ndjakami, koko kaanga mbakamahandɔ, nde akambike lokuwa. Lo diaso dikina nto, olui ɔmɔtshi w’anɔshi wa kaandji wakatombɛ ko wakatshume okoma l’ɔtɛ dia ndjakami.

Lo 1996, lakayolangaka Carolina ndo lo 1998, takayotshukanaka. Lam’ele laki kanga ngala, l’ɔkɔngɔ wa sho mbota ɔnaso la ntondo, lakokaka wɔma ɔnɛ dimi mbeyaka ndjokoma oko pami kakadjasɛka la mama ndo ndjohandjola nkumbo kami. Diakɔ diakamatshu toyanga ekimanyielo lo lopitadi lɔmɔtshi. Wakasakɛ ndo lakanɔka ekanga wakawambisha, koko dui sɔ komonga l’etombelo w’amɛna. Lakatetemala monga yomalomala kaanga lo tokambokambo ta totshitshɛ ndo dimi kondjakimɛka. Dia ntshika mpɛnyahɛnya ase nkumbo kami, lakayoyanga dia ndjadiaka. Diɛsɛ ko, dimi kosala dui sɔ.

Kaanga mbakimi kombetawɔka dia Nzambi ekɔ l’edja k’ɛnɔnyi efula, lakayotatɛ nkombola dia mbeeya. Diakɔ diakamayɔtɔka l’ɔtɛmwɛlɔ ɔmɔtshi. L’etena kɛsɔ, wadɛmi akekaka Bible l’Ɛmɛnyi wa Jehowa. Lakahetshaka Ɛmɛnyi wa Jehowa ndo mbala efula lakawatondjɛka ɛtɛkɛta wa kɔlɔ. Koko mbala tshɛ vɔ wakakaloyaka dui la dilɛmiɛlɔ, dui diakimi konongamɛka.

Lushi lɔmɔtshi Carolina akanɔmbɛ dia dimi mbadia Osambu 83:18 lo Bible kami. Divɛsa diakɔ mbutaka hwe dia Jehowa mbele lokombo laki Nzambi. Lakaambe heyama dia mbeya dia Jehowa mbele lokombo laki Nzambi, dui diakiwɔ kotetshaka l’ɔtɛmwɛlɔ aso. L’etatelo k’ɔnɔnyi 2000, dimi lawɔ lakatatɛ mbeka Bible l’Ɛmɛnyi wa Jehowa.

WOHO WAKATSHIKITANYA BIBLE LƆSƐNƆ LAMI:

Lo ntetemala mbeka Bible, lakakeketshama dia mbeya ɔnɛ Jehowa ekɔ Nzambi ka kɛtshi ndo kadimanyiyana pɛkato. Ɛnyɛlɔ, lo Etumbelu 34:6, 7, Bible mɛnyaka dia Jehowa ekɔ “[Nzambi k]a ketshi ndu ngandji ka mamba, lahuki kele esadi, luludi too la ngandji ka shikaa la kolamelu; Latukaka antu nunu nunu ngandji ka shikaa, latudimanyiaka wengiya, uhedia, la kolo.”

Kaanga mbakidiɔ ngasɔ, aki tshondo y’okakatanu le mi dia nkamba la kɛnɛ kakamekaka. Lakafɔnyaka ɔnɛ hamimɔki kanga ngala pondjo. Mbala tshɛ kakimi kombahemɛka dionga diami dia kɔlɔ, Carolina akakeketshaka la ngandji tshɛ. Nde akamboholaka ate Jehowa ekɔ lo mɛna welo wadjami. Woho wakandasukɛka akakeketsha dia ntetemala nsala la wolo dia ngɛnyangɛnya Jehowa kaanga mbakamayaokaka l’etena kɛmɔtshi dia laya bu l’elongamelo.

Lushi lɔmɔtshi, Alejandro lakambetshaka Bible akanɔmbɛ dia mbadia Ngalatiya 5:22, 23. Avɛsa asɔ mbutaka di’elowa wa nyuma kaki Nzambi ele, “ngandji, ɔngɛnɔngɛnɔ, wɔladi, solo dia lotutsha, lɔsɛngɔ, ɔlɔlɔ, mbetawɔ, memakana ndo ndjakimɛ.” Alejandro akanembetshiya ɔnɛ paka l’ekimanyielo ka nyuma k’ekila kaki Nzambi mbakokami nkɛnɛmɔla waonga asɔ, koko aha la wolo ami hita. Ɛtɛkɛta ande ɛsɔ wakatshikitanya kanyi yami tshɛ lo tshɛ.

L’ɔkɔngɔ diko, lakayɔtɔka lo losanganya la woke l’Ɛmɛnyi wa Jehowa. Woho wakasalema akambo aha l’ofukutanu, pudipudi kaki lo dihole diakɔ, lɔngɛnyi laki lam’asawɔ akambetawoya dia lamboshola ɔtɛmwɛlɔ wa mɛtɛ. (Joani 13:34, 35) Lakabatizama lo Ngɔndɔ ka hende 2001.

WAHƆ WAMBOMOKONDJA:

Jehowa akatshikitanya lɔsɛnɔ lami dia ntshika awui wa ngala ko nkoma onto ladja wɔladi. Lakashihodia dia nde ambotondja oma lo difuku diakimi. Anto efula wakatatɛ petshami, koko dimi kombadja yimba. Ɛlɔ kɛnɛ, lekɔ l’ɔngɛnɔngɛnɔ lo woho wakambɛmi Jehowa lo wɔladi dimi la wadɛmi l’anaso ahende.

Ewotɔ ndo angɛnyi ami wa ntondo hawetawɔ dia dimi mbambotshikitana nganɛ. Etombelo wele la dui sɔ ele, efula l’atei awɔ wekɔ lo mbeka Bible. Lekɔ nto la diɛsɛ dia nkimanyiya anto akina dia mbeya Jehowa. Lekɔ l’ɔngɛnɔngɛnɔ w’efula dia mɛna woho watshikitanya akambo wa mɛtɛ wa lo Bible nsɛnɔ yawɔ.