EKADIMWELO LO AMBOLA W’OMA LO BIBLE

Onde elongamelo kɛmɔtshi kekɔ dikambo dia wanɛ wakavu?

Onto lambovɔ ekɔ oko ɔnɛ loladi djɔ nɛ dia nde heye ndooko dui ndo hakoke nsala ndooko dui. Koko, Otungi wa lɔsɛnɔ ayolola wanɛ wakavu. Dia mɛnya mɛtɛ ka dui sɔ, Yeso akolola anto efula oma lo nyɔi diɛsɛ la wolo wakawosha Nzambi.​—Adia Undaki 9:5; Joani 11:11, 43, 44.

Nzambi akalake di’anto wambovɔ wele lo yimba yande wayolɔma dia ndjɔsɛna l’andja w’oyoyo wa losembwe. Wanɛ wayolɔma wekɔ paka edo polo l’etena kayowaolola Nzambi. Nzambi Kanga-Wolo-Tshɛ ekɔ lo nomɔlomɔ dia mbisha wanɛ wambovɔka lɔsɛnɔ.​—Adia Jobo 14:14, 15.

Ngande wayosalema eolwelo?

Etena kayolola Nzambi anto, vɔ wayoyaeya, wayeya angɛnyi awɔ ndo wayeya ase nkumbo yawɔ. Kaanga mbakoka onto pandjɔhandjɔ lo diombo, Nzambi ekɔ l’akoka wa mbolola onto akɔ laamɛ, koko la demba di’oyoyo.​—Adia 1 Kɔrɛtɔ 15:35, 38.

Mɛnamaka di’anto yema tshitshɛ tsho mbolwama dia tɔsɛna l’olongo. (Ɛnyɛlɔ 20:6) Koko, anto efula wayolwama wayoyɔsɛna lo paradiso ka la nkɛtɛ. Anto asɔ wayotatɛ nsɛna lɔsɛnɔ l’oyoyo ndo monga l’elongamelo ka nsɛna pondjo pondjo.​—Adia Osambu 37:29; Etsha 24:15.