Thomas Emlyn​—Aki ɔtɛnganyi kana omamedi w’akambo wa mɛtɛ?

THOMAS EMLYN akinde ndo kakɔna kakotshutshuya dia mamɛ akambo wa mɛtɛ? Wetshelo akɔna wakondjaso oma l’ɛnyɛlɔ kande wakoka tokimanyiya ɛlɔ kɛnɛ?

Dia nkadimola ambola asɔ, tokalole lo awui wakasalema oya l’ekomelo ka ntambe ka 17 ndo l’etatelo ka ntambe ka 18 l’Angleterre ndo l’Irlande. Ɔtɛmwɛlɔ w’ase Angleterre waki la lowandji l’efula l’etena kɛsɔ. Elui efula w’ase Asɔnyi ndo anto akina kombetawɔka wetshelo ndo awui wakasalekamaka l’ɔtɛmwɛlɔ.

AKINDE?

Thomas Emlyn akotɔ l’atei w’anto wa ngasɔ lo Ngɔndɔ ka tanu 27, 1663, l’osomba wa Stamford, Lincolnshire, lo wodja w’Angleterre. Lam’akinde l’ɛnɔnyi 19, nde akasha sawo diande dia ntondo l’ɔtɛmwɛlɔ. L’ɔkɔngɔ diko, nde akayokoma os’ɔtɛmwɛlɔ wa waa Presbytérien l’ɔtɛ wa womoto ɔmɔtshi laki la Londres ndo oma laasɔ nto nde akonɔ otsha l’osomba wa Belfast, Irlande.

Lam’akandakome la Belfast, nde akatonga ɔnɔmbɔdi w’ɔtɛmwɛlɔ ɔmɔtshi. L’edjedja ka wonya, Emlyn akayotatɛ ntshɔ dia tasambishaka l’ahole efula, mbidja ndo Dublin.

LANDE NA KAKAWOFUNDE ƆNƐ NDE EKƆ ƆTƐNGANYI?

L’etena kɛsɔ, Emlyn akekaka Bible la yambalo tshɛ. Wekelo ande akokonya dia manya wetshelo wa Losato l’osanto kaanga mbakandawetawɔka ntondo. Etena kakandayosala eyangelo ndo lo Evanjiliɔ, nde akashikikɛ di’awui akɔ sukɛka eokelo kande k’oyoyo.

Emlyn kombutɛ anto mbala kakɔ ɔtɔi kɛnɛ kakandashola. Koko, anto amɔtshi wa l’ɔtɛmwɛlɔ wa la Dublin wakatatɛ nshihodia ɔnɛ nde hayodimola Losato l’osanto l’asawo ande. Oko wakandeyaka di’anto akina haweetawɔ kɛnɛ kamondotatɛ mbetawɔ, nde akafunde ate: “Hafɔnya dia layotetemala monga lo dihole diami nɛ etena kayomonyotɛ kɛnɛ kamomoshihodia kakianɛ.” Lo Ngɔndɔ ka samalo 1702, asekande ahende wakasawola la nde dia mbeya lande na kahandayodimola Losato l’osanto l’asawo ande. Emlyn akawatɛ dia nde hayetawɔ wetshelo wa Losato l’osanto ndo nde ambotomba oma l’ɔtɛmwɛlɔ.

L’ɔkɔngɔ wa nshi ngana, nde akamɔ oma la Dublin, lo wodja w’Irlande ko akatshu l’Angleterre. Koko l’ɔkɔngɔ wa mingu dikumi, nde akakalola la Dublin dia toshidiya awui amɔtshi l’oyango wa monɔ la Londres lo pondjo. Etena kakinde la Dublin, nde akatondja okanda ɔmɔtshi waki l’ɔtɛ a dui ɔnɛ: Eyangelo wa l’Afundelo wendana la ɔkɔndɔ wa Yeso Kristo (lo Angɛlɛ) l’oyango wa mamɛ tokanyi tande. Lo okanda akɔ nde akasha tolembetelo t’oma l’Afundelo tɛnya lande na kahakoke Yeso mbɔsama oko Nzambi Kaheme laadiko dia tshɛ. Dui sɔ diakomadia ase ɔtɛmwɛlɔ wa la Dublin wakandatɛmɔlaka ntondo. Vɔ wakatatɛ mbɔlɔsha.

Emlyn akandama ndo akatɔlama le nkumekanga ka womoto ka lo Tuminadi ta la Dublin lo Ngɔndɔ ka samalo 14, 1703. Lo dibuku diande diaki l’ɔtɛ a dui ɔnɛ Ɔkɔndɔ wa mɛtɛ wa kɛnɛ kakete (Angɛlɛ), Emlyn akate ɔnɛ lakafundama “l’ɔtɛ wakamafunde ndo wakamatondja dibuku dimɔtshi diɛnya di’anto wakasɔngwɛ ɔnɛ lekɔ ɔtɛnganyi, kanga esehe ndo awui akina. Dibuku diɛnya nto ɔnɛ Yeso Kristo hɛdimi la Nzambi She.” Lo kilombo kɛsɔ vɔ kondjela losembwe kaanga yema. Evɛkɛ esambele wa lo ɔtɛmwɛlɔ wa la Irlande wakadjasɛ lo dihole ɔtɔi vɔ la toshushi lo tuminadi tɔsɔ. Emlyn komonga la lotshungɔ la ntɛkɛta dia ndjaswɛlɛ. Richard Levins, avɔka wa manamana akatɛ Emlyn ate “wayokotapanya oko watapanyawɔ laondo.” L’ekomelo ka kilombo, Richard Pyne prezida ka lo Tuminadi ta la Irlande akatɛ tushushi ɔnɛ naka hanyosambodi kilombo kɛnɛ lo yoho yahombama, kete waa “evɛkɛ wayendana la nyu” ndo mbala mɔtshi vɔ wayɔlɔmba dia mbisha toshushi dilanya dia wolo.

Etena kakɛnyi owandji wa waa avɔka dia Emlyn hayingi, nde akawotɛ dia nde nɔmba dia nyomolombola nto. Emlyn akatone. Wakawodje kibawo ndo wakoofundɛ lokanu la ɔnɔnyi w’otondo. Lam’ele nde komonga l’akoka wa mfuta kibawo kakɔ, nde akatshikala lo lokanu ɛnɔnyi ehende polo ndo lam’akayotshɔ ɔngɛnyi ande ɔmɔtshi dia tɔtɛkɛtɛ le ewandji wa lɛɛta dia mbokitshɛkitshɛ kibawo. Emlyn akatondjama oma lo lokanu lo Ngɔndɔ k’esambele 21, 1705. Sɔnyi kakandashama kakokonya dia mbuta ɛtɛkɛta wa l’etatelo ka sawo diaso ɔnɛ: “Lekɔ lo soyama l’ɔtɛ wa kɛnɛ ketawɔmi ɔnɛ kekɔ akambo wa mɛtɛ wendana la Nzambi ndo dia lotombo lande.”

Emlyn akonɔ la Londres lɛnɛ akandatokambaka kaamɛ la William Whiston nomb’ewo kekina k’awui wa lo Bible kakahetshama l’ɔtɛ wakandatondja dibuku dimɔtshi diaki l’awui wa mɛtɛ wa lo Bible. Wiston akalɛmiyaka Emlyn ndo akawɔshi oko “‘Okristo wa ntondo wa lo ‘lokristo l’edjedja wakɛnya mbetawɔ kande kaanga mbakandasoyama dikambo diatɔ.’”

LANDE NA KAKANDATONE WETSHELO WA LOSATO L’OSANTO?

L’ɛnyɛlɔ ka William Whiston ndo Isaac Newton laki nomb’ewo kekina k’awui wa lo Bible kakalɛmiyamaka, Emlyn akashihodia dia Bible hasukɛ wetshelo wa Losato l’osanto wɔtɛkɛtami ndo lo dietawɔ dia Athanase. Nde akalembetshiya ɔnɛ: “L’ɔkɔngɔ wa dimi nkana yimba efula ndo mbeka Afundelo w’ekila, . . . lamboshola ɔkɔkɔ w’oshika . . . wa ntshikitanya nkanyi yami lo dikambo dia wetshelo wa Losato l’osanto wakametawɔka ntondo.” Nde akakomiya ɔnɛ: “Nzambi lele She Yeso Kristo mbele Onto laamɛ Laheme laadiko dia tshɛ.”

Kakɔna kakakonya Emlyn dia mbuta ngasɔ? Nde akashola avɛsa efula wɛnya otshikitanu wele lam’asa Yeso nde la She. Avɛsa amɔtshi l’atei awɔ vwanɛ l’ɛse (kɛnɛ kakate Emlyn lo dikambo dia avɛsa akɔ ndashema):

• Joani 17:3: “Bible mbutaka dia Yeso ekɔ nzambi, koko ndooko dihole diatatɔ ɔnɛ nde ekɔ Nzambi Kanga-Wolo-Tshɛ.” Paka She mbelamɛ “Nzambi ɔtɔi ka mɛtɛ.”

• Joani 5:30: “Ɔna hasale lolango lande hita, koko nde salaka paka lolango la She.”

• Joani 5:26: “She mbakawosha lɔsɛnɔ.”

• Ɛfɛsɔ 1:3: “Mbala efula Yeso Kristo mbelamɛka Ɔna Nzambi, ndo ndooko dihole diofundami lo dikambo dia Nzambi ɔnɛ She Nzambi, kaanga mbelamɛnde ɔnɛ She Nkumɛso Yeso.”

L’ɔkɔngɔ wa Emlyn nsɛdingola tolembetelo tshɛ, nde akayota l’eshikikelo tshɛ ate: “Ndooko divɛsa dia l’Afundelo w’ekila diɛnya dia Papa, Ɔna ndo nyuma k’ekila wekɔ onto ɔtɔi.”

WETSHELO AKƆNA WAKONDJASO?

Ɛlɔ kɛnɛ, anto efula mbokaka wɔma dia mamɛ kɛnɛ ketsha Afundelo. Koko Emlyn aketawɔ mamɛ akambo wa mɛtɛ. Nde akoke dimbola nɛ: “Naka onto hamɛ akambo wa mɛtɛ woleki ohomba wambondeya hwe ndo wambondoshikikɛ oma l’Afundelo w’ekila, naa ohomba wa nde mbadia ndo nsala eyangelo nto lɔkɔ?” Emlyn kombetawɔ dinyadinya akambo wa mɛtɛ.

Ɛnyɛlɔ kakatotshikɛ Emlyn nde la anto akina koka totshutshuya dia nsɛdingola kana sho mongaka suke dia mamɛ akambo wa mɛtɛ etena kalɔshamaso. Sho lawɔ koka ndjambola ɔnɛ: ‘Kakɔna koleki ohomba, onde monga la kɛnɛmɔ ndo anto ntɛkɛta dimɛna lo dikambo diaso kana mamɛ akambo wa mɛtɛ w’oma l’Ɔtɛkɛta wa Nzambi?’