ASAWO WƆTƆNƐ L’ƆTƐ A DUI WA LO LOHOSO | DIOLELO DIAKI NZAMBI—AKOKADIƆ NEMBETSHIYA LE YƐ?

Diolelo diaki nzambi Ayodiolembetshiya le YƐ?

Ondo wɛ akɛnyi lo asawo wetshi dia Diolelo diaki Nzambi nembetshiyaka akambo efula le Ɛmɛnyi wa Jehowa. Ondo wɛ akambiyama lo menda ɛtshɔkɔ ɛmɔtshi wa lo nshi yayaye wayela Diolelo diaki Nzambi wakawɛnya lɔkɔ. L’etena kakɔ kaamɛ, ondo wɛ koka ndjambola dia kana alaka asɔ wayokotshama.

Ayonga dui dia lomba naka wɛ monga la yewo diaha mbetawɔ oseka dui tshɛ diokayɛ. (Tukedi 14:15) Lo toho tɔmɔtshi, yewo yayɛ koka mbɛdikama la nyɛ yaki la ase Bɛrɔya.a wa lo nshi y’edjedja. Mbala ka ntondo kakawaasambisha lokumu l’ɔlɔlɔ la Diolelo, ase Bɛrɔya waketawɔ kɛnɛ kakawoke, koko aha tsho l’ɔtɛ wakawakombolaka di’awui asɔ monga mɛtɛ. Lo mɛtɛ, vɔ wakasɛdingola Afundelo la yaambalo tshɛ “dia nshikikɛ kana akambo akɔ waki mɛtɛ.” (Etsha 17:11) L’ɛtɛkɛta ekina, ase Bɛrɔya wakɛdika lokumu l’ɔlɔlɔ lakawoke la kɛnɛ kata Afundelo. Oma laasɔ, vɔ wakayoshikikɛ dia lokumu l’ɔlɔlɔ lɔsɔ laki mɛtɛ oma l’Ɔtɛkɛta wa Nzambi.

Ɛmɛnyi wa Jehowa kɔlɔmbaka la waangasanu tshɛ dia nsala woho akɔ waamɛ. Lo tshimbo y’ekongelo kaso ka mbeka l’anto Bible ofele, sho koshaka diaaso dia mbɛdika kɛnɛ ketawɔ Ɛmɛnyi wa Jehowa lo dikambo dia Diolelo diaki Nzambi la kɛnɛ ketsha Bible.

Laadiko dia mbeya awui akina wendana la Diolelo diaki Nzambi, wekelo ayɛ wa Bible koka kokimanyiya dia nkondja ekadimwelo lo ambola amɔtshi woleki ohomba lo lɔsɛnɔ.

Oma lende akataye?
Oyango akɔna wele la lɔsɛnɔ?
ande na katshika Nzambi sui?
Ngande wayalaso etena kavɔso?
nde nkɛtɛ kayolanyema?
Kakɔna kalɔmbama dia monga la lɔsɛnɔ l’ɔngɛnɔngɛnɔ lo nkumbo?

Kɛnɛ koleki tshɛ ele, wekelo wa Bible ayokokimanyiya dia “[ndj]asukanya la Nzambi.” (Jakɔba 4:8) Etena katayaleke ndjasukanya la Nzambi, mbayoyoleka nshihodia woho wakoka Diolelo diaki Nzambi nembetshiya akambo w’amɛna wayodiokela, aha tsho l’etena kɛnɛ koko ndo pondjo pondjo. Yeso ndamɛ akate lo dɔmbɛlɔ dimɔtshi diakandalɔmbɛ She ate: “Dia vɔ nkondja lɔsɛnɔ la pondjo, vɔ pombaka keya wɛ Nzambi ɔtɔi ka mɛtɛ, la Yeso Kristo lakayatome.”—Joani 17:3.

JehovahƐmɛnyi wa Jehowa kokaka nkamba la okanda ɔnɛ dia mbeka la yɛ Bible.

Dia nɔmba wekelo wa Bible ofele, mbola Ɔmɛnyi wa Jehowa tshɛ wayɛnana la yɛ kana lodia lo dihole dialodiawɔ lo www.jw.org. (Ɔtɔ lam’ofundjiwɔ LƆMBA DI’ONTO NDJOKETSHA BIBLE OFELE lo lɛkɛ latomba ntondo)

a Bɛrɔya aki osomba ɔmɔtshi wa la Makɛdɔniya k’edjedja.

Kɛnɛ kalembetshiya Diolelo diaki Nzambi le nde

Atete edja, Folake yimato yele l’ɛnɔnyi dikumi akalɔmbama la kalasa dia nsala devɔara diaki l’ɔtɛ a dui ɔnɛ: “Kɛnɛ kalekami nanga l’andja ɔnɛ.” Folake akasɔnɛ dia mfunda lande na kalangande mbutɛ anto akina awui wendana la Diolelo diaki Nzambi.

Folake akalembetshiya ate: “Diolelo diaki Nzambi diekɔ lowandji la mɛtɛ. Koko diɔ hadiɛnama, oyadi onto kɔlɔtaka akalashi, nde hakoke diɛna.”

Folake akatetemala mfunda awui wendana la ɛtshɔkɔ wayela Diolelo wakongɛnde l’asolo walomɔlomɔ. Etena kakandashilaka ekakatanu ɛmɔtshi wayokandola Diolelo, nde akafunde ate: “Dimi mongaka la lonyangu etena kɛnami anto wele bu l’ahole wa mbidjasɛ watemema l’etadimbo” ndo “ana w’akɛnda wavɔ la ndjala l’ahole wotshikitanyi wa l’andja w’otondo.” Nde akakotsha ate: “Dimi mongaka l’ɔngɛnɔngɛnɔ etena kadiami ɛtɛkɛta wa lo Isaya 65:21.” Lo kɛnɛ kendana l’anto wayɔsɛna l’ɛlɔmbwɛlɔ ka Diolelo diaki Nzambi, divɛsa sɔ ndakaka ɔnɛ: “Vo wayuhika mvudu, wayudjaseka loko; wayune dikambo di’elua, wayolekaka elua w’uma loko.”

Folake akate nto dia nde ekɔ lo nkongɛ l’asolo walomɔlomɔ etena kayonya Nzambi hemɔ tshɛ lo tshimbo ya Diolelo diande. Lo devɔara diakɔ, nde akashile ɛtɛkɛta wa lo Ɛnyɛlɔ 21:4 lɛnɛ atawɔ ɔnɛ Nzambi “ayokitola asɔyi tshɛ oma lo washo awɔ, ndo nyɔi hatoyala nto, delo hadiotoyala nto, kaanga ndjawi kaanga kandji hatoyala nto.” Nde akakomiya lo kalolɛ ɛtɛkɛta ande wa lo mbɔtwɛlɔ ɔnɛ mbutɛ anto akina awui wendana la Jehowa ndo la Diolelo diande mbalekande nanga l’andja ɔnɛ. Mbokɛmaka hwe dia, Diolelo diaki Nzambi diekɔ la dihole dia laande lo lɔsɛnɔ laki yimato shɔ.