ASAWO WƆTƆNƐ L’ƆTƐ A DUI WA LO LOHOSO
Etena kavɔ lakiso ɔmɔtshi la ngandji
“Ama bebe, Nzambi mbeyaka dimɛna efula. . . . Tshika . . . ndela . . . .”
Ɛtɛkɛta ɛnɛ wakakome polo l’atui wa womoto ɔmɔtshi lelamɛ bebe. Nde aki l’otanda waki papa kande, ɔnɛ lakavu lo aksida wa mutuka.
Bebe aki ma ma nde la she. Onto ɔmɔtshi laki ɔngɛnyi wa dimɛna wa nkumbo kɛsɔ mbakate ɛtɛkɛta ɛsɔ, koko ɛtɛkɛta ɛsɔ wakayangiya Bebe lo dihole dia mbookeketsha. Nde akatetemala mbutɛ Bebe ate: “Nyɔi ka shɔ komonga dui dia dimɛna efula.” Ɛnɔnyi efula l’ɔkɔngɔ, etena kakayɔkɔndɔlaka Bebe ɔkɔndɔ akɔ lo dibuku dimɔtshi, akɛnama hwe dia nde akatetemala monga la lonyangu.
Oko wakadiakomɛ Bebe, koka mbɔsa etena k’otale efula dia kandji kele l’onto nshila, djekoleko naka nde akavusha ɔmɔtshi lokande ngandji efula. Lo Bible, nyɔi mbelamɛka ɔnɛ “otunyi w’ekomelo.” (1 Kɔrɛtɔ 15:26) Nyɔi ndjaaka ndo pembolaka lɔsɛnɔ laso ndo ndooko kɛnɛ kakoka nshimba nyɔi, mbala efula etena kele hatoyalongɔsɔdi, tɔ tɔkɔsɔlaka wanɛ wɔsaso la nɛmɔ. Ndooko onto la l’atei aso lohandwe oma lo paa keela nyɔi. Diakɔ diele, keema dui dia diambo dia sho monga la ɔkɛyi etena kavushaso lakiso ɔmɔtshi la ngandji ndo mbeya etombelo wendana la nyɔi.
Ondo wɛ koka ndjambola wate: ‘Dia ɔkɛyi ndjoshila, edja ka ngande kakoka mbeta? Ngande wakoka onto ndɔshana la ɔkɛyi? Ngande wakokami nkeketsha anto wambovusha? Onde ekɔ elongamelo kɛmɔtshi lo dikambo dia wakiso wa ngandji wanɛ wakavu?’