Onde wɛ akeyaka?

Lande na kaki Yeso la shadiya dia mbelɛ amundji w’okanda wakasondjaka nyama lo tɛmpɛlɔ ka la Jɛrusalɛma ɔnɛ “apɔtwanyi”?

LO EVANJILIƆ wa Mateo sho mbadiaka ɔnɛ: “Yeso akɔtɔ lo tɛmpɛlɔ ndo akatshanya wanɛ tshɛ wakasondjaka ndo wanɛ wakasombaka lo tɛmpɛlɔ ndo akasokola mɛsa w’amengodi wa falanga la ekala wa wanɛ wakasondjaka benga. Ndo nde akawatɛ ate: ‘Akafundama ɔnɛ: “Luudu lami layelamɛ luudu la dɔmbɛlɔ,” koko nyu nyambolietɛ wooko w’apɔtwanyi.’”​—Mat. 21:12, 13.

Ɔkɔndɔ mɛnyaka dia amundji w’okanda wa la Jɛrusalɛma wakasalɛka kidiya yawɔ akambo lo yoho ya kɔlɔ lo mbidja diangɔ oshinga wolo efula. Ɛnyɛlɔ, tena tshɛ benga diaki oshinga wɔdu dia ase wola sombaka dia tokimɔ olambo. Koko, afundji amɔtshi w’edjedja w’ase Juda mbutaka ɔnɛ akayonga etena kɛmɔtshi ka lo ntambe ka ntondo kele paka onto futama denar dia paonyi ko nde nsomba benga pende. Onto akahombaka nkamba olimu l’edja ka nshi oko 25 dia ndjokondja lofulo la falanga lɔsɔ. Mbokɛmaka dia benga diakayonga oshinga wolo efula woho wele ose wola kokokaka disomba nto. (Lɛw. 1:14; 5:7; 12:6-8) Rabbi Simeon ben Gamaliel akomala efula l’ɔtɛ wa dui sɔ, ko nde akayokitshakitsha lofulo l’elambo wakalɔmbamaka ase Juda dia nkimɔ. Kombeta edja, oshinga wa benga pende wakakitakita lo etenyi ɔtɔi ka lokama ka denar dia paonyi.

Oko wambotodiɛna, amundji w’okanda wa lo tɛmpɛlɔ waki la lokaki ndo wakakondjaka wahɔ oma le kidiya yawɔ. Diakɔ diele, Yeso aki la shadiya dia mbaelɛ ɔnɛ “apɔtwanyi.”