Tshapita 103
Ambɔtɔ lo Tɛmpɛlɔ nto
YESO l’ambeki ande oma la mbetsha otsho wa sato la Bɛtaniya, tatɛ lam’akawakome oma la Jeriko. Ɛlɔ, Lushi l’Ɔtɔi, lo ngɔndɔ ka Nisana 10, wonya ambâhotwɛ lo mboka otsha la Jerusalɛma. Yeso amboka ndjala. Lam’ɛnyinde osongo wa fingu wele l’akatshi, nde ambotshɔ lɛkɔ dia tenda kana elowa wa fingu wekɔ lɔkɔ.
Osongo ɔsɔ ambodja akatshi la ntondo k’eleko katowodjaka, nɛ di’eleko ka fingu hatatɛ la ntondo ka Mam’ɛkɔngɔ la Tange, ko l’etena kɛnɛ, tekɔ lo Asase a Ndjoko. Koko, Yeso ambɔfɔnya ɔnɛ lam’ele osongo akɔ ambodja akatshi ntondo, ondo elowa wa fingu wekɔ. Koko, elongamelo kande kambɔtɔ l’ashi. Akatshi wambôkesa. Yeso ɔnɛ adjande osongo akɔ mananu ate: “Untu talekaki elua aye ntu pundju.” La wedi a pindju mbayotoyɛna etombelo lo woho wambodja Yeso osongo ɔsɔ mananu, ndo mbayotoyoshihodia kitshimudia ya mananu kɛsɔ.
Kem’edja, Yeso l’ambeki wambotetemala la lɔkɛndɔ lawɔ ko wambokoma la Jerusalɛma. Nde ambotshɔ lo tɛmpɛlɔ, lâsɔ ko lui kakete l’ɔkɔngɔ a midi, nde aki lɔkɔ dia tokienda. Koko lushi l’ɛlɔ, nde ambotatɛ ntsha dikambo dimɔtshi oko wakandatshe ɛnɔnyi esato la ntondo lam’akandaye lo difɛstɔ di’Elekanelo dia l’ɔnɔnyi 30 T.D. Nde ambotondja wanɛ wasondja ndo wasomba lo tɛmpɛlɔ ndo ambotshola mɛsa w’amengudi wa falanga ndo w’asundji wa tukudumba. Nde hetawɔ dia kânga onto ɔtɔi mɛmba diangɔ ko tenyanya tɛmpɛlɔ.
Nde ambohangwɛ wanɛ wengola falanga la wasondja nyama lo tɛmpɛlɔ ate: “Undi, nkufundama ati: Luudu lami layetama ati: Luudu la dombelo la wedja tshe? Keli nyu nyambulete wuku w’apotodi.” Vɔ wekɔ apɔtɔdi, nɛ dia vɔ mbidjaka diangɔ oshinga wolo, ko wanɛ wele l’ohomba wa nyama ya nambola elambo hawokoke ntshɔ lɛkɛ lokina paka somba l’oshinga wawadjɛwɔ. Diɔ diakɔ diɛna Yeso woho w’okanda ɔsɔ oko ɔhɔtwɛlɔ kana wovi.
Lam’oki ɛlɔmbɛdi a weke, afundji la ɛlɔhɛ wa lo wodja kɛnɛ kosadi Yeso, wamboyanga nto dia mbodiaka. Ɔsɔku mbambowɛnya ɔnɛ vɔ wekɔ la dionga diahatshikitanaki pondjo. Koko, haweye woho wa ndjaka Yeso nɛ dia anto tshɛ wekɔ lo mbomamema dia mpokamɛ awui ande.
Lâdiko di’Ase Juda wa l’emunyi, ndo Ase Wedja mboye lo difɛstɔ di’Elekanelo. Vɔ wekɔ ase wedja wamboyɔtɔ l’ɔtɛmwɛlɔ w’Ase Juda. Wonya ɔnɛ, Ase Ngirika amɔtshi, ondo wanɛ wakayɔtɔ l’ɔtɛmwɛlɔ w’Ase Juda, wambosukana oya le Filipɛ ko wambowombola dia vɔ mɛnana la Yeso. Ko Filipɛ ambotshɔ le Andɛlɛ, ondo dia towombola dia mbeya kana ohomanelo wa ngasɔ wayonga ɔlɔlɔ. Ondo l’etena kɛnɛ, Yeso êke lo tɛmpɛlɔ, lɛnɛ akoka Ase Ngirika mbɛ̂na.
Yeso mbeyaka ɔnɛ ambotshikalɛ paka nshi ngana tsho ya nde mvɔ, diɔ diakɔ diambondoka wɛɛla ɔmɔtshi wa dimɛna efula dia nembetshiya dikambo diakɔ, wɛɛla akɔ v’ɔnɛ: “Unya ambukuka dia On’a untu ntumbwama. Mete, mete, kanyutelami nti: Naka lotongo l’upunga haloko lu kete, la haluvu, lo layuyala lame. Keli naka lo lambuvo, lo layoto tongo efula.”
Lɔtɔngɔ ɔtɔi l’oponga kema la nɛmɔ efula. Ko kakɔna katoloyalaka naka lɔ lambonɛma lo nkɛtɛ ndo “lambuvo,” mbuta ate laya kema lɔtɔngɔ nto na? Lɔ tatɛka nkamɔ, ko ndjokoma lɔlɛngɛsɛ lele la nsɛkɛ efula y’eponga. Woho akɔ wâmɛ mbele Yeso, ndamɛ mbele onto la kokele. Ko naka nde mvɔ la kɔlamelo le Nzambi, kete nde aya ehomɔ kasha akanga wa kɔlamelo lɔsɛnɔ la pondjo, wanɛ wele la yimba ya ndjasɛka oko nyɛ yele lande. Diɔ diakɔ diata Yeso ate: “One lalanga lumu landi, ambulushisha. One latuna lumu landi la kete nye, ayululama utsha lu lumu la pundju.”
Mbokɛmaka hwe dia, Yeso hakanyiya dikambo diande ndamɛ oto, nɛ dia nde amboyolembetshiya ate: “Naka untu ambunkambela ulimu, ndi andjeli. Ukambi ami ayuyala lene ayumuyala. Naka untu ayunkambela ulimu, Papa ayôlemia.” Ande difuto dia dimɛna efula lo ndjela Yeso ndo mbokambɛ lee! Ɔsɔ ekɔ difuto dia nongola nɛmɔ oma le She dia ndjâla kâmɛ la Kristo lo Diolelo.
Lam’akanyiyande asui a wolo la nyɔi ka kandji kele suke la mbokomɛ, Yeso ambota nto ate: “Kakiane, [anima, NW] ami ambudidima. Kayumuta na? Papa, unshimbeli uma lu unya one.” Otondoyala nde kokaka mbewɔ kɛnɛ kôkongɛ lee! Koko, nde hahombe mbewɔ dikambo sɔ, nɛ dia nde ate: “Keli dimi lakayi lu unya one dia dikambu ne.” Yeso mbetawɔka tɛdikɔ takɔshi Nzambi, ndo yɛdikɔ ya nyɔi kande k’olambo. Mateu 21:12, 13, 18, 19; Mako 11:12-18; Luka 19:45-48; Joani 12:20-27.
▪ Bonde kafɔnya Yeso ate kana layototana elowa wa fingu, eleko kawɔ katakoke l’etena kɛnɛ?
▪ Lande na kelɛ Yeso wanɛ wasondja lo tɛmpɛlɔ ɔnɛ “apɔtɔdi”?
▪ Lo yoho yakɔna yele Yeso oko lɔsɛkɛ l’oponga lavɔ?
▪ Ngande wamboyala asolo wa Yeso lam’akanyiyande asui la nyɔi kôkongɛ?