Wahɔ akɔna wakokayɛ nkondja lo mbeya Nzambi?
Lo asawo wetshi, takashile mɛna awui wakoka tokimanyiya dia nkadimola lo dimbola nɛ: Ele Nzambi? Takatatɛ mɛna lo Bible dia lokombo la Nzambi ele Jehowa ndo dionga diande dioleki woke ele ngandji. Takɛnyi nto kɛnɛ kakasale Nzambi ndo kɛnɛ kayangande nsala lo nshi yayaye lo wahɔ w’anto wakandatonge. Ndo nto, ekɔ awui efula wahombaso mbeka lo dikambo dia Nzambi, koko wɛ mbeyaka ndjambola woho wakokayɛ nkondja wahɔ lo mbeka awui wendana la nde.
Jehowa ndakaka dia “naka wɛ mboyanga, nde ayoyaɛnya le yɛ.” (1 Ɛkɔndɔ 28:9) Ohokanyiya nɛmɔ di’efula diele la woshasha wakokongɛ naka wɛ nyanga Nzambi ndo mbeeya, mbuta ate monga la “lɔngɛnyi la ma ma la Jehowa”! (Osambo 25:14) Wahɔ akɔna wakokayɛ nkondja oma lo lɔngɛnyi lɔsɔ?
Ɔngɛnɔngɛnɔ wa mɛtɛ. Jehowa ekɔ “Nzambi k’ɔngɛnɔngɛnɔ.” (1 Timɔte 1:11) Naka sho ndjasukanya la nde ndo ndjela mboka yande, kete dui sɔ diayotosha ɔngɛnɔngɛnɔ wa mɛtɛ ndo tayokondja wahɔ lo yimba ndo lo demba. (Osambo 33:12) Wɛ ayonga nto nto la lɔsɛnɔ l’ɔngɛnɔngɛnɔ lo mbewɔ yoho ya lɔsɛnɔ ya kɔlɔ, nde koka nto tokimanyiya dia nkɛnɛmɔla mbekelo y’amɛna ndo monga la diɔtɔnganelo dia dimɛna l’anto akina. Wɛ ayetawɔ kɛnɛ kakate omembi w’esambo ɔnɛ: “Nsukana la Nzambi kele ɔlɔlɔ le mi.”—Osambo 73:28.
Nde teyaka l’onto ndo l’onto ndo todjaka yimba. Jehowa ndakaka ekambi ande ɔnɛ: “Dimi layokolakaka ndo layokookaka sso.” (Osambo 32:8) Dui sɔ nembetshiyaka dia Jehowa kokɛka ekambi ande l’onto ndo l’onto ndo mbishaka onto l’onto kɛnɛ kende la tɔ mɛtɛ ohomba. (Osambo 139:1, 2) Naka wɛ monga la diɔtɔnganelo dia dimɛna la Jehowa, kete wɛ ayɛna dia nde ayongaka wonya tshɛ suke la yɛ.
Nshi yayaye y’amɛna efula. Laadiko dia kokimanyiya dia wɛ monga l’ɔngɛnɔngɛnɔ ndo lɔsɛnɔ la dimɛna nshi nyɛ, Jehowa Nzambi ambokosha nto diaaso dia wɛ monga la nshi yayaye y’ɔngɛnɔngɛnɔ. (Isaya 48:17, 18) Bible mbutaka ɔnɛ: “Dia vɔ nkondja lɔsɛnɔ la pondjo, weke dia keya wɛ Nzambi ɔtɔi ka mɛtɛ, la Yeso Kristo lakayatome.” (Joani 17:3) Lo tena dia wolo nɛ, Nzambi ekɔ lo tosha elongamelo kele oko longo la masuwa katokimanyiya dia ‘nshikikala nge ndo aha sukasuka.’—Hɛbɛru 6:19.
Ɔsɔ ekɔ paka ɛkɔkɔ engana eto w’ohomba l’atei w’ɛkɔkɔ efula watotshutshuya dia mbeya Nzambi ndo monga la diɔtɔnganelo dia dimɛna la nde. Tambokɔlɔmba dia wɛ nsawola l’Ɔmɛnyi wa Jehowa ɔmɔtshi kana wɛ mbɔtɔ lo jw.org dia mbeya awui akina efula.