SAWO DIA WEKELO 15
OSAMBO 30 Papa kami, Nzambi kami ndo Ɔngɛnyi ami
“Nsukana la Nzambi kele ɔlɔlɔ” le so!
“Koko le mi, nsukana la Nzambi kele ɔlɔlɔ le mi.”—OS. 73:28.
KƐNƐ KAYOTEKA
Woho wakokaso ndeka ndjasukanya la Jehowa ndo wahɔ wayotokondja lo nsala dikambo sɔ.
1-2. a) Kakɔna kalɔmbama dia monga la lɔngɛnyi la ma ma l’onto ɔmɔtshi? b) Kakɔna kayotɛna lo sawo nɛ?
ONDE wɛ ekɔ l’ɔngɛnyi ɔmɔtshi wa ma ma? Kakɔna kakayasale dia monga ɔngɛnyi ande? Mbeyaka monga ko nyaketsha wenya efula wɛ la nde, wɛ akeye ekakatanu wakahomana la nde ndo akeye kɛnɛ kalangande la kɛnɛ kahandalange. Wɛ akayoshihodiaka dia nde ekɔ la waonga w’amɛna wakokayɛ mbokoya. Diɔ diakɔ diakayetawɔ dia nde monga ɔngɛnyi ayɛ.
2 Dia monga ɔngɛnyi l’onto ɔmɔtshi, nɔmbamaka mbetsha wenya efula la nde ndo mbidja welo. Woho akɔ waamɛ mbele, sho lawɔ nɔmbamaka mbetsha wenya efula la Jehowa Nzambi dia monga angɛnyi ande. Lo sawo nɛ, tayɛna woho wakokaso ndeka ndjasukanya la Jehowa ndo ɛtshɔkɔ wayotokondja lo nsala dikambo sɔ. Ntondotondo, tɔsɛdingole lande na kele ekɔ ohomba sho ndjasukanya la Jehowa Ɔngɛnyi aso woleki dimɛna.
3. Lande na kahombaso kanaka yimba lo ɛtshɔkɔ waya lo monga la lɔngɛnyi la ma ma la Jehowa? Sha ɛnyɛlɔ.
3 Aha la taamu, wɛ mbetawɔka dia ekɔ dimɛna ndjasukanya la Jehowa. Koko nkana yimba lo ɛtshɔkɔ wayotokondja lo nsala dui sɔ, ayotokimanyiya dia ntetemala ndeka ndjasukana la nde. (Os. 63:6-8) Ɛnyɛlɔ, naka sho ndɛka mbo yandɛ y’amɛna, kɔkɔlaka demba, momuyaka yema ndo nɔka ashi efula, kete awui asɔ koka tokimanyiya dia monga la yoonge ya demba ya dimɛna. Lonyangu ko, anto efula hawodje yimba l’akambo asɔ ndo vɔ minyaka yimba lo yoonge yawɔ ya demba. Koko, lo yɛdikɔ yayototalekaka nkana yimba lo wahɔ waya lo nkamba la mbekelo y’amɛna shɔ, mbayototalekaka ndjashikikɛ dia ndjisalaka. Woho akɔ waamɛ mbele, sho koka mbeya ɔnɛ ndjasukanya la Jehowa mboleki dimɛna le so, koko nkana yimba lo ɛtshɔkɔ wayotokondja lo nsala dui sɔ koka totshutshuya dia ntetemala ndjasukanya l’Ɔngɛnyi aso ɔsɔ.—Os. 119:27-30.
4. Kakɔna kakate ofundji wa Osambo 73:28?
4 Adia Osambo 73:28. Ofundji wa Osambo 73 aki ose Lɛwi lakasɔnama dia tembaka lo tɛmpɛlɔ ka Jehowa. Nde akatɛmɔlaka Jehowa la kɔlamelo tshɛ l’edja k’ɛnɔnyi efula. Koko, nde akɛnaka ohomba wa ndjaohola ndo mbohola anto akina ɔnɛ “nsukana la Nzambi” aki dimɛna le nde ndo le wɔ. Wahɔ akɔna wakondjaso lo nsala dikambo sɔ?
“NSUKANA LA NZAMBI” TOSHAKA ƆNGƐNƆNGƐNƆ
5. a) Lande na kele nsukana la Jehowa toshaka ɔngɛnɔngɛnɔ? b) Ngande wakokokɛ ndo wakokimanyiya lomba la Jehowa? (Tokedi 2:6-16).
5 Tayoleka monga l’ɔngɛnɔngɛnɔ naka sho ndeka ndjasukanya la Jehowa. (Os. 65:4) Dui sɔ diekɔ mɛtɛ l’ɔtɛ w’ɛkɔkɔ efula. Wa ntondo, sho kondjaka wahɔ lo nkamba l’alako wa lomba watanema l’Ɔtɛkɛta ande, Bible. Lomba lɔsɔ tokokɛka oma lo tɔsɛngiya ta kɔlɔ ndo tewolaka diaha nsala munga ya weke. (Adia Tokedi 2:6-16.) Diakɔ diata Bible ɔnɛ: “Ɔngɛnɔngɛnɔ le onto latana lomba ndo onto lakondja shɛnɔdi.”—Tok. 3:13.
6. Kakɔna kakakonya omembi w’esambo dia nshisha ɔngɛnɔngɛnɔ ande?
6 Lo mɛtɛ, kaanga angɛnyi wa Jehowa mongaka l’ekiyanu lo tena dimɔtshi. Ofundji wa Osambo 73 akashisha ɔngɛnɔngɛnɔ ande etena kakandatatɛ monga la tokanyi ta kɔlɔ. Nde akayotatɛka nkana yimba lo woho wele anto wa kɔlɔ wekɔ lo mpomɔ lokolo l’ɔlɔ kaanga mbele hawokitanyiya Nzambi, ndo kɛsɔ kakayowokiyaka nkɛlɛ. Nde akayotatɛka nkombola monga la kɛnɛ kaki la wɔ. Nde akatatɛ nkanyiya woho wakakondjaka akanga wa ngala ndo w’etako kɛnɛ tshɛ kaki la wɔ ohomba ndo lo woho wakiwɔ la yoonge ya dimɛna ndo wakiwɔ kosowaka. (Os. 73:3-7, 12) Omembi w’esambo akayotatɛka ndjakiyanya dia kana welo wakandadjaka dia kambɛ Jehowa waki ohomba. Nde aki la lɔkɔnyɔ l’efula ndo akate ate: “Lo mɛtɛ, olamalama kakamalame otema ami pudipudi ndo kakamasole anya ami lo monga aha la onongo.”—Os. 73:13.
7. Kakɔna kahombaso nsala etena kamɛnamaso la lɔkɔnyɔ? (Enda ndo osato.)
7 Kaanga mbaki omembi w’esambo l’ekiyanu, nde akasale dui dimɔtshi dia ntshikitanya ekanelo kande ka yimba. Nde ‘akɔtɔ lo tɛmpɛlɔ k’ekila ka diambo kaki Nzambi’ lɛnɛ akatotshikitanyaka Jehowa ekanelo kande ka yimba. (Os. 73:17-19) Jehowa, Ɔngɛnyi aso woleki dimɛna, mbeyaka etena keso l’ekiyanu. Naka sho mbɔlɔmba dia tɔlɔmbɔla ndo mbetawɔ ekeketshelo katoshande lo tshimbo y’Ɔtɛkɛta ande Bible ndo y’etshumanelo, kete tayonga la wolo wa mbikikɛ ekiyanu aso. Oyadi kaanga tambɔmɛnama l’ekiyanu w’efula, Jehowa ayotosamba ndo ayotɔladia.—Os. 94:19.a
Ose Lɛwi lɔtɛkɛtami lo Osambo 73 emadi la ntondo ka “tɛmpɛlɔ k’ekila ka diambo kaki Nzambi” (Enda odingɔ 7)
“NSUKANA LA NZAMBI” TOSHAKA ƆNGƐNƆNGƐNƆ OMA KO KAKIANƐ NDO ELONGAMELO LO NSHI YAYAYE
8. Lo toho takɔna tokina tele nsukana la Nzambi mboleki dimɛna le so?
8 Nsukana la Nzambi ekɔ dimɛna le so lo toho tohende t’ohomba. Yoho ya ntondo, tɔ toshaka ɔngɛnɔngɛnɔ lo lɔsɛnɔ oma ko kakianɛ. Yoho ya hende, tɔ toshaka elongamelo ka nge lo dikambo dia nshi yayaye. (Jɛr. 29:11) Nyɛsɔ tɔsɛdingole ɛtshɔkɔ ɛsɔ.
9. Lande na kele ndjasukanya la Jehowa toshaka ɔngɛnɔngɛnɔ?
9 Etena kayasukanyaso la Jehowa, sho mongaka la lɔsɛnɔ la dimɛna. Anto efula mbutaka dia Nzambi bu, ɔnkɔnɛ vɔ haweye lande na kele anto la nkɛtɛ, ndo vɔ mbetawɔka dia lo nshi yayaye anto hawotonga nto. Koko diɛsɛ la wekelo aso w’Ɔtɛkɛta wa Nzambi, tamboyashikikɛ dia Nzambi “ndjalaka ofutshi wa wanɛ wooyanga l’otema ɔtɔi.” (Hɛb. 11:6) Kaanga ɛlɔ kɛnɛ, tekɔ la lɔsɛnɔ l’ɔngɛnɔngɛnɔ nɛ dia takɔshi yɛdikɔ ya nsala kɛnɛ kakokaso nsala dia kambɛ Jehowa, Shɛso lele l’olongo.—Eoh. 10:12, 13.
10. Kakɔna kalaka Jehowa anto wayaɛkɛ le nde? (Osambo 37:29)
10 Anto efula bu l’elongamelo ka shikaa dikambo dia nshi yayaye, diakɔ diakambawɔ elimu, diakokɛwɔ nkumbo ndo diayalɔngɔsɔlawɔ dikambo di’etena kahawatonga nto l’akoka wa nkamba elimu. Vɔ haweye kɛnɛ kakalake Nzambi lo dikambo dia nshi yayaye. Lo wedi okina, ekambi wa Jehowa mendɛka oma le nde dia mbakokɛ. (Os. 25:3-5; 1 Tim. 6:17) Sho ndjaɛkɛka le Nzambi ɔnɛ lakatayasukanya la nde ndo tekɔ l’elongamelo dia nde ayokotsha kɛnɛ kakandatolake. Elongamelo kaso kendana la nshi yayaye mendanaka ndo la woho wayototɔtɛmɔlaka Nzambi pondjo pondjo lo Paradiso.—Adia Osambo 37:29.
11. Shɛngiya yakɔna yele la ndjasukanya la Nzambi le so, ndo ngande wayaokande lo dikambo sɔ?
11 Ndjasukanya la Nzambi ekɔ dimɛna le so lo toho tokina efula. Ɛnyɛlɔ, Jehowa ndakaka dia dimanyiya atshi wa pɛkato wayatshumoya wele suke la nde. (Isa. 1:18) Etombelo wele la dui sɔ ele, hatoyaɛndja onongo wa pɛkato yakatasale lo nshi yakete. (Os. 32:1-5) Ndo tekɔ l’ɔngɛnɔngɛnɔ w’efula wa ngɛnyangɛnya Jehowa. (Tok. 23:15) Lo mɛtɛ, wɛ koka nkana yimba nto l’ɛtshɔkɔ ekina waya lo monga la lɔngɛnyi la ma ma la Nzambi. Ko ngande wakokayɛ ntetemala ndjasukanya la Nzambi?
WOHO WAKOKAYƐ NTETEMALA “NSUKANA LA NZAMBI”
12. Kakɔna kakayasale dia ndeka ndjasukanya la Nzambi?
12 Naka wɛ ekɔ Okristo wambobatizamaka, kete aha la taamu wɛ akasale akambo efula dia nyomoleka ndjasukanya la Jehowa. Wɛ akeke akambo wa mɛtɛ efula wendana la Jehowa Nzambi ndo la Yeso Kristo, akayatshumoya oma lo pɛkato yayɛ yakete, akɛnya mbetawɔ ka wolo le Nzambi ndo akasale la wolo tshɛ dia nsɛna lo ndjela lolango lande. Koko, dia ndeka ndjasukanya la Nzambi, sho pombaka ntetemala nsala akambo asɔ.—Kɔl. 2:6.
13. Akambo akɔna asato wakoka tokimanyiya dia ntetemala ndjasukanya la Jehowa?
13 Kakɔna kayotokimanyiya dia ntetemala ndjasukanya la Jehowa? 1) Sho pombaka ntetemala mbadiaka ndo mbekaka Bible. Etena kadiaso Bible, sho pombaka nsala awui efula oleki tsho mbeka awui wendana la Nzambi. Tayoshihodia lolango la Nzambi lo dikambo diaso ndo tayɔlɔmbwama l’atɔndɔ wa lo Bible. (Ɛf. 5:15-17) 2) Sho pombaka nkeketsha mbetawɔ kaso lo kanaka yimba lo tolembetelo tɛnya ngandji kande oya le so. 3) Sho pombaka ntetemala mpetsha kɛnɛ tshɛ kahetsha Jehowa ndo mbewɔ monga la lɔngɛnyi l’anto wasala akambo asɔ.—Os. 1:1; 101:3.
14. Kakɔna kahombaso salaka lushi la lushi dia ngɛnyangɛnya Jehowa? (1 Kɔrɛtɔ 10:31) (Enda ndo esato.)
14 Adia 1 Kɔrɛtɔ 10:31. Ekɔ dui di’ohomba le so dia salaka awui wangɛnyangɛnya Jehowa. Kɛsɔ nɔmbaka nsala akambo efula oleki tshɔka tsho lo nsanganya ya l’etshumanelo ndo l’olimu w’esambishelo. Kɛnɛ kasalaso lushi tshɛ pombaka ngɛnyangɛnyaka Jehowa. Ɛnyɛlɔ, sho ngɛnyangɛnyaka Jehowa etena kongaso la losembwe lo akambo tshɛ ndo kakahanaso l’anto akina kɛnɛ kele la so. (2 Kɔr. 8:21; 9:7) Nde nangaka nto dia sho mɛnya nɛmɔ diele la woshasha wa lɔsɛnɔ. Sho ndekaka ndjasukanya l’Ombishi wa lɔsɛnɔ lo monga la wɛdimo lo mbekelo yendana la olelo, ɔnwɛlɔ, ɔkɔkwɛlɔ wa demba ndo l’akambo akina. Etena kɛna Jehowa dia tekɔ lo mbidja welo dia mbɔngɛnyangɛnya lo kɛnɛ tshɛ kasalaso, nde tolangaka lo yɛdikɔ y’efula.—Luka 16:10.
Kɛndjakɛndjaka mutuka lo yoho ya dimɛna, kɔkɔlaka demba, ndɛka mbo ya ndɛ y’amɛna ndo monga la lokaho, ekɔ toho tɔmɔtshi takokaso ngɛnyangɛnya Jehowa (Enda odingɔ 14)
15. Ngande walongamɛ Jehowa dia sho salɛ anto akina akambo?
15 Jehowa ekɔ ɔlɔlɔ le anto w’ɛlɔlɔ ndo le anto wa kɔlɔ. (Mat. 5:45) Woho akɔ waamɛ mbele, nde nongamɛka dia sho mbɔsa anto akina la nɛmɔ. Ɛnyɛlɔ, ‘hatɔtɛkɛta kɔlɔ lo dikambo di’onto, hatonge akanga w’ewanu, koko sho mongaka l’ekanelo k’ɔlɔlɔ ndo sho kɛnɛmɔlaka memakana otsha le anto tshɛ.’ (Tito 3:2) La kanyi shɔ lo yimba, sho hatɔnyɔla anto akina paka l’ɔtɛ wewɔ bu la so dietawɔ ɔtɔi. (2 Tim. 2:23-25) Sho ndekaka ndjasukanya la Jehowa lo salɛka anto tshɛ akambo l’ɔlɔlɔ ndo lo mbaɔsaka la nɛmɔ l’akambo tshɛ wasalɛso.
SHO KOKA “NSUKANA LA NZAMBI” KAANGA ETENA KASALASO MUNGA
16. Ngande wakayaoke ofundji wa Osambo 73 l’ɔkɔngɔ w’etena kɛmɔtshi?
16 Koko l’ɔkɔngɔ w’etena kɛmɔtshi, wɛ mbeyaka mfɔnya dia Jehowa aya bu suke la yɛ l’ɔtɛ wa munga mɔtshi yakayasale. Oko wakatadiɛnyi, dui dia ngasɔ diakakomɛ ofundji wa Osambo 73. Nde akate ate: “Ekolo ami waki suke la ntakɔ mboka; akaka ami waki suke la nsɛlɔ.” (Os. 73:2) Nde akayongaka la “ɔkɛyi” ndo la “ekanelo ka kɔlɔ” “oko nyama k’enginya” la ntondo ka Jehowa. (Os. 73:21, 22) Onde nde akafɔnya dia l’ɔtɛ wa munga yande Jehowa hayokoka mbooka ngandji ndo mbodimanyiya?
17. a) Kakɔna kakasale omembi w’esambo kaanga etena kandakɔmɔ? b) Wetshelo akɔna wakokaso nkondja oma lo kɛnɛ kakookomɛ? (Enda ndo esato.)
17 Naka omembi w’esambo akɛnyi diele oko Jehowa ambowɔsɛka, kete nde akakoke mɛna dui sɔ paka l’etena ka mondo keto. Mɛnamaka diele oko l’etena kɛsɔ nde aki l’ohomba wa ndjasukanya la Nzambi diakɔ diakandafunde ate: “Koko kakianɛ dimi laya tena tshɛ kaamɛ la yɛ [Jehowa]; wɛ ambonkimɛ lo lonya lami l’omi. Wɛ ekɔ lo nɔmbɔlami la alako ayɛ, ndo l’ɔkɔngɔ diko, wɛ ayɔntɔla lo lotombo.” (Os. 73:23, 24) Sho lawɔ pombaka nɔmba Jehowa dia tokeketsha etena kokaso dia mbetawɔ kaso kaya wɔdu kana tambɔkɔmɔ l’ɔtɛ wa munga yaso. (Os. 73:26; 94:18) Oyadi kaanga akaka aso kɔsɛlɔka l’etena kɛmɔtshi, sho koka nkalola le Jehowa tele l’eshikikelo ɔnɛ nde ekɔ ‘suke dia todimanyiya.’ (Os. 86:5) Sho pombaka ndeka ndjasukanya la Nzambi kaso ndjekoleko etena kokaso dia tambɔkɔmɔ.—Os. 103:13, 14.
Etena kokaso dia tambɔla lo nyuma, sho pombaka ndeka ndjasukanya la Jehowa lo salaka akambo efula wendana l’ɔtɛmwɛlɔ ande (Enda odingɔ 17)
“NSUKANA LA NZAMBI” PONDJO PONDJO
18. Lande na kele ndooko elelo dia ndjasukanya la Jehowa?
18 Ndooko elelo lo woho wakokaso ndjasukanya la Jehowa ndo lo woho wakokaso nsala dia mbeeya. Bible mbutaka dia lomba la Jehowa, ewo kande ndo mboka yande “hayeyama mɛtɛ nɔnda.”—Rɔmɔ 11:33.
19. Eshikikelo kakɔna katosha dibuku dia Esambo lo dikambo dia nshi yayaye?
19 Osambo 79:13 mbutaka ɔnɛ: “Sho anto ayɛ ndo ɛkɔkɔ wa lo lokoto layɛ, tayokoshaka losaka pondjo pondjo; ndo tayewoyaka lotombo layɛ lo lɔlɔnga la lɔlɔnga.” Oko watayatetemala nsukana la Nzambi, wɛ lawɔ koka monga l’eshikikelo ɔnɛ wɛ koka nkondja ɛtshɔkɔ wa pondjo pondjo ndo wɛ koka mbuta l’eshikikelo tshɛ ɔnɛ: “Nzambi ekɔ dive dia otema ami ndo yema yami pondjo pondjo.”—Os. 73:26.
OSAMBO 32 Eta lo wedi wa Jehowa
a Anto amɔtshi wele la lɔkɔnyɔ kana l’ɔkɛyi l’etena k’otale mbeyaka monga l’ohomba w’ekimanyielo ka dɔkɔtɛlɛ. Dia mbeya awui akina efula, enda Tshoto y’Etangelo, No. 1 2023.