Etena konga lɔsɛnɔ edika w’edika

Ɛnyɛlɔ, Sallya ladjasɛ l’États-Unis, lakashisha tshɛ kaki la nde lo lɔpɛpɛ la wolo mbutaka ɔnɛ: “Lakoke dia handjokoka mbikikɛ lonyangu laki la mi. L’ɔkɔngɔ wa nshi efula, lakoke dia laya suke la nkoma lumu.”

Ko akokayɛ nsala naka wɛ ambovusha lakiyɛ la ngandji? Janice ladjasɛ l’Australie mbutaka ɔnɛ: “Etena kakamavusha ana ami ahende w’apami, lakoke oko lambɔkɔmama ndjadi kaha mvula. Lakasɛngasɛnga Nzambi nte: ‘Lam’alangayɛ, otema ami hawotokoka mbikikɛ kandji ka woho ɔsɔ! Otshike mvu. Handjolanga nsɛna nto.’”

Ɛnyɛlɔ ka hende ele ka Daniel lakayakiyanya efula etena kakashisha wadɛnde kɔlamelo. Nde mbutaka ate: “Etena kakate wadɛmi dia nde akashisha kɔlamelo, laki oko onto lambowoka lokuwa l’otema. Kɛnɛ kakasale wadɛmi kakambishaka paa lo demba l’edja ka ngɔndɔ efula.”

Lo numɛlɔ ka Tshoto nyɛ, tayɛna dia ekɔ ohomba ntetemala nsɛna oyadi

• Etena katomba mpokoso

• Etena kavushaso lakiso la ngandji

• Etena kashisha olonganyi ɔmɔtshi kɔlamelo

• Etena keyɛ la hemɔ ka wolo

• Etena konga lɔsɛnɔ edika w’edika

Tondotondo, ngande wakokaso ntondoya etena kahomanaso la mpokoso?