Etena katomba mpokoso

“L’etatelo, takayaoke dia taya bu l’elongamelo. Ɛngɔ tshɛ kaki la so kakalana la elola ndo lɔtɛkɛ.”—Andrew, Sierra Leone.

“Takakalola la ngelo l’ɔkɔngɔ wa lɔpɛpɛ la wolo. Takashisha tshɛ kaki la so. Taki la lonyangu l’efula. Ɔnami la womoto akake adwe ndo akalele.”—David, les Îles Vierges.

NAKA wɛ atahomɔka mpokoso, kete ondo wɛ koka ndjaoka woho wakayaoke anto akina wakahandɔ oma lo mpokoso: monga la lɔkɔnyɔ, oko onto lambɔsɛkama, okiyanu ndo mɛna alɔ wa kɔlɔ. Efula k’anto wahandɔ oma lo mpokoso kɔmɔka ndo nɛmbaka, vɔ shishaka kaanga nsaki ka ntetemala nsɛna.

Naka wɛ akashisha tshɛ kaki la yɛ l’ɔtɛ wa mpokoso, kete wɛ mbeyaka mfɔnya dia wɛ hakokaki mbikikɛ ekiyanu pondjo. Wɛ mbeyaka ntatɛ mfɔnya dia bu ohomba ntetemala nsɛna. Koko, Bible mbutaka dia ekɔ ohomba wɛ ntetemala nsɛna ndo ɔnɛ wɛ ekɔ l’ɛkɔkɔ w’eshika wa monga l’elongamelo ka nshi yayaye y’amɛna.

AKAMBO WA MƐTƐ WA LO BIBLE MBISHAKA ELONGAMELO

Ondaki 7:8 mbutaka ɔnɛ: “Ekomelo ka dui dimɔtshi ndeka etatelo kadiɔ dimɛna.” Etena katatɛyɛ nyomoyakongɛ lo lɔsɛnɔ l’ɔkɔngɔ wa mpokoso, wɛ mbeyaka mɛna dia wɛ aya bu l’elongamelo lo lɔsɛnɔ. Koko, paka nkamba olimu efula dia nyomonga la lɔsɛnɔ laki la yɛ ntondo.

Bible kakatatshi di’ekɔ etena kɛmɔtshi kele “londjo la alelo kana tokoko t’ɔkɛyi hatokɛma nto.” (Isaya 65:19) Awui asɔ wayokotshama etena kayokadimɔ nkɛtɛ paradiso l’ɛlɔmbwɛlɔ ka Diolelo diaki Nzambi. (Osambo 37:11, 29) Mpokoso hatoyala nto pondjo. Hatotohɔ akambo wa kandji kana washa paa l’asolo nto pondjo, nɛ dia Nzambi Kanga-Wolo-Tshɛ ndamɛ tolakaka ate: “Akambo wa ntondo hawotohɔma nto, ndo hawotoya lo otema nto.”—Isaya 65:17.

Ohokanyiya yema: Otungi akalɔngɔsɔla dia “[k]osha nshi yayaye ndo elongamelo,” mbuta ate lɔsɛnɔ la wɔladi l’ɛlɔmbwɛlɔ ka kokele kaki Nzambi. (Jɛrɛmiya 29:11) Shi nkondja ewo k’akambo wa mɛtɛ kɛsɔ koka kokimanyiya dia mɛna ohomba wa ntetemala nsɛna? Sally lakatatɛkɛtshi lo sawo dia ntondo mbutaka ate: “Naka wɛ mbohɔ lokema l’akambo wa diambo wayotosalɛ Diolelo diaki Nzambi lo nshi yayaye, kete dui sɔ koka kokimanyiya diaha ndeka mbidja yimba l’awui wa kɔlɔ wakakokomɛ ndo mbikikɛ awui wele la yɛ nshi nyɛ.”

Shi wɛ koka mbeka akambo akina efula wayosalɛ Diolelo dia Nzambi anto keema edja? Nsala dui sɔ koka koshikikɛ dia oyadi mpokoso kambokɛnya paa, ekɔ ohomba wɛ ntetemala nsɛna etena kakongayɛ l’asolo wa lomɔlomɔ nshi yayaye y’amɛna yele mpokoso hatonga nto. Koko, l’etena kɛnɛ Bible koshaka alako w’eshika wakoka kokimanyiya dia mbikikɛ etombelo wa kɔlɔ w’oma lo mpokoso. Tɔsɛdingole bɛnyɛlɔ dingana to.

Avɛsa wa lo Bible wakoka kokimanyiya

Omuyaka efula.

“Ndeka dimɛna monga la yema ya diomuyelo tshitshɛ lo dihole dia monga la olimu efula wa wolo ko tatshanyaka lɔpɛpɛ.”—Ondaki 4:6.

Eyangelo ɛmɔtshi mɛnyaka “di’anto wonga la lɔkɔnyɔ ndekaka ndjaoka kɔlɔ ndo mongaka l’ekakatanu efula wa lo yimba naka hawolale efula.” Diakɔ diele, ekɔ ohomba momuyaka efula.

Tɛ anto akina woho wayaokayɛ.

“Ekiyanu lo otema w’onto mbɔkɔmɔlaka, koko tshɛkɛta y’ɔlɔlɔ keketshaka.”—Tokedi 12:25.

Tɛ ose nkumbo kana ɔngɛnyi ayɛ lɛkɛyɛ otema awui wakokiyanya. Laadiko dia kohokamɛ etena kawatɛyɛ woho wayaokayɛ, vɔ koka kokeketsha ndo kosha ekimanyielo kele la yɛ ohomba.a

Kana yimba dikambo dia nshi yayaye yoleki amɛna.

“Lo ndjela daka [dia Nzambi], sho tekɔ lo nkonga olongo w’oyoyo ndo nkɛtɛ k’oyoyo, lɛnɛ ayongaka losembwe.”2 Petero 3:13.

a Onto layakiyanya l’etena k’otale mbeyaka monga l’ohomba wa esakelo ɛmɔtshi w’aseka enganga.