Osambishelo lo mbilo yakindjakindjama tena tshe
1 Tshumanelo efula kindjakindjaka mbilo yakiwo ndo sho ngenangenaka efula. (Mat. 24:14; 1 Tim. 2:3, 4) Dikambo so tondjaka ekakatanu emotshi, koko akambo weta menyaka dia vo kokaka nembiama naka olongoswamelo w’ololo ndjala kame ndo dihomo dia ta diakoka kimanyia woho wa shika ekolo.
2 Mbɔtwɛlɔ y’eshika yeko ohomba efula: Eko ohomba monga la mbɔtwɛlɔ otoi kakakongɛma dimena la ntondo kana mbɔtwɛlɔ efula. Tosale woho wa mbidja tokanyi t’eshika tenya lande na kakelakelaso.
3 Dibuku Comment raisonner menyaka mbɔtwɛlɔ efula yasungana. Mbɔtwɛlɔ shato tanemaka lo lɛkɛ 15 la dibuku diako, lo ote a dui one: “Dans les territoires où les gens entendent souvent le message.” Tohole nye yakanaso dia kamba layo olimu lo mbilo kaso.
4 Lo mbilo yakindjakindjama tena tshe, apandjudi kondjaka asawo w’amena lo ndjakimanyia l’awui watama lo tojurunale tafundama lo wodja. Dibuku Comment raisonner mbishaka weho esato wa diɛnyɛlɔ dia woho ako. Tende mbɔtwɛlɔ kahende katanema lo lɛkɛ 11 l’ekimanyelo k’ote a dui one: “Crime/Sécurité,” ndo hiende ya ntondo lo ote a dui “Actualité” watanema lo lɛkɛ 9.
5 Mbɔtwɛlɔ y’onto l’onto: Tatokandakandake dia nongosola ndo kamba olimu l’eteketa wa mbɔtwɛlɔ lo ndjela woho one wenyamiwo lo dibuku Comment raisonner. Totekete oko atototeketaka nshi tshe ndo l’eteketa aso shoameme. La ntondo ka sho tâteketa lo mbilo, lande na keso hatokoke mbâhemba kame la opandjudi omotshi w’ekesane efula l’olimu na?
6 Oko enyelo, sho kokaka mbuta onkone:
◼ “Tatɛ malam’akamaye mbala k’ekomelo, [totekete dia dikambo dimotshi dieke katomba diakotola yambalo y’ase ngelo]. Oyadi kânga teko akanga a dikambo kana kema, dui so tendaka sho tshe, ndo anto efula wa lo kalatiye wakanyange dia dikambo diako. Ondo we lawo akadje lomba lo dikambo diako so. [Tolɛmbohale yema dia tshike onto ako dihole dia nde teketa.] Lo menda woho watete awui wa l’andja one, onde we hetawo eteketa waki omvutshi Jeremiya watanema lo tshapita 10, divɛsa 23 oka?” Tadia divɛsa diako ndo tombole onto ako kene kakanande, ko l’okongo diko tadia divɛsa dikina di’Afundelo di’enya woho akona wayolowanya Jehowa dui diako.
7 Kokaka sho mbuta nto onkone:
◼ “Mete we akoki lo aladiyo ɛlɔ kene dia [totekete dia dikambo dimotshi di’oshika]. Ondo ndo we lawo kanaka oko akanami dia dui so kɛtshaka asolo aso sho tshe. [Tolɛmbohale yema dia tshike onto ako dihole dia nde teketa.] Sho nongameka dia enene wayohemba kandola dikambo so; koko, Bible menyaka woho wayokandoma dikambo diako pondjo pondjo.” Totole yambalo otsha lo divɛsa dimotshi di’Afundelo dialembetshiya kene kayosala Nzambi.
8 “Lande na kayayanyu mbala la mbala na?” Tamu toso kondjaka ekadimwelo w’amena lo dibuku Comment raisonner lo lɛkɛ 20 l’ekimanyielo k’ote a dui “Pourquoi repassez-vous si souvent?” Aha la konga one watosha ekomo, kokaka sho sambisha dimena efula lo ndjakimanyia la diaaso diayonga laso woho wa nembetshiya one: ngandji kokaso Nzambi la onyaso onto mbatotoma dia sho ndjâka mbala la mbala. Diako mbele, ondo ayonga ololo sawola dia dikambo di’endana l’eteketa waki Yeso watanema lo Joani 21:15-17.
9 Totetemale la nembia ekakatanu watanema lo mbilo yakindjakindjama tena tshe polo ndo lo lushi layota Jehowa ate: ambokoka. Aha la sho kalola ekongo ekongo, tɛkami elombwamelo kande, ekokelo kande ndo etshoko ande polo ndo l’ekomelo. —Mat. 28:19, 20.