Tɔkɛtsha etema w’anto weka laso
1 Onde sho kombolaka di’onto leka Bible laso akotsha kene k’ekande oka? Osoku mbahombande ntsha dia nde monga la waho oma lo diewo diende lo takondja. Dia sokoya ombeki woho wa nde salangana, sho pombaka kɛtsha otema ande. Lo pentekosta ka l’ononyi 33, disikuru di’ekeketshelo diakasha otomami Petero ‘akasutshasutsha etema’ wa suke la 3000 di’anto waketawo “[dui diande l’otema otoi, NW]” ko wakalongola batismu lushi lako. (Etsha 2:37, 41) Woho akona wa ntsha dia kɛtsha otema w’onto leka na?
2 Toyalongosole la kongamu: Tatoyangake dia sedingola akambo efula polo ndo l’etena ka wonya ndjotshikala paka yema tshitshe dia kana lomba kame l’ombeki ako dia dikambo diako. La ntondo, toshikike tokanyi tayotohomba tɛtɛ, ndo ndjashikike dia kana sho mpotoka hwe ndo teko lo kamba olimu dimena la tovɛsa tako t’oma lo Bible. Katambale kana nongosola la ntondo wembola wokuki ndjɛ ombeki ako lo wɔɔngɔ lo ndjela awui wa wenda ndameme. Naka sho mbeyaka onto ako l’ololo tshe, kete tayohomba nongosola tokanyi tomotshi t’endana l’onto ako lo woho wotshikitanyi.
3 Toyele enyelo ka woho wakalakanyaka Yeso: Yeso akakambaka olimu la di’ɛnyɛlɔ kana ekela dia nde mbokiya l’eteketa a wodu tokanyi ta wolo ndo dia nde kimanyia wane wakandalakanyaka woho wa vo mbishola lokanyi l’oshika l’endana la dikambo dimotshi. (Luka 10:29-37) Woho ako mbele, sho kokaka mbidja wetshelo w’amena l’otema w’ombeki naka sho ndjakimanyia la di’ɛnyɛlɔ di’okema ololo, di’osami oma l’akambo weta lo loseno la lushi la lushi, ndo lo mbaokanya la awui a wenda.
4 Wembola weko ohomba efula lo woho wotshikitanyi dia kɛtsha etema w’ambeki, oko akasha Yeso enyelo. (Luc 10:36) Koko, tatongenangenake di’ekadimwelo wadiama paka ladiama oma lo dibuku. Toke wembola w’olowanyelo woho wa kumiya onto ako dia nde mpoto tokitshimudi takinde komboka. Otshelo oso kimanyiaka dia tolonganya okanelo ande a lomba. Toke wembola w’endana la lokanyi l’onto l’onto dia mbeya oko akanande lo dikambo dimotshi. Ondo tayosedingola wonya ako dia mbeya lo awui akona walombama dia ndjelaka onto l’onto.
5 Naka ombeki hahame, sho pombaka mbeya lande na, ondo lo mbowembola lo wenya ekina. Lande na kakandakandande dia pama na? Onde nde hoke dui dimotshi dia l’atei w’Afundelo oka? Onde nde hasalangana dia mbela etshikitanelo emotshi lo loseno lande oka? Naka ombeki omotshi eko lo pemba dia ‘mpakahakahaka lasa bɛkɛ pende diotshikitanyi,’ tokimanyia dia nde mbeya one monga la lokewo la ngaso mbelaka wâle. —1 Nkumi ya Dikanga 18:21.
6 Otomami Paulo akahotoka dia, ndakanya anto wele l’etema w’ololo mete ka lo Bible, akalemaneka la mbitsha nseno motshi; omaloko mbakandalombe akristo tshe dia vo ndjâla ‘nshi tshe la yambalo lo olakanyelo awo.’ (1 Tim. 4:16.) Anto weka laso pombaka mbeya awui efula ladiko dia monga paka la lokanyi la kene kata Bible keto ndo la lone l’endana l’akambo weta l’andja. Vo weko l’ohomba wa kondja diewo di’oshika di’endana la Jehowa kame la Yeso, ndo l’ohomba w’ekimanyielo k’onto l’onto songa longenyi la wangasanu lasande lawo. Paka lo ntsha ngaso mbayowosokoyama dia menya mbetawo kawo oma lo etsha. (Jak. 2:17, 21, 22) Etena kayokɛtshama otema ande, ombeki ayokombola monga la lokewo layosha Jehowa kenemo ndo layowokimanyia dia nde monga la loseno. —Tok. 2:20-22.