Tôkani l’anto dia mbasha dibuku Les Jeunes s’interrogent
1 Mɛtɛ, ngɔndɔ kɛnɛ tekɔ lo mbokana l’anto dia mbasha dibuku Révélation: dénouement, koko ondo tayɔsa tɛdikɔ ta mbokana l’anto dia mbasha dibuku Les Jeunes s’interrogent naka tekɔ lo kɛtshanya la ombutshi wa pami kana wa omoto, kana l’ɔlɔngɔlɔngɔ ɔmɔtshi wayakiyanya di’ekakatanu watana ɛlɔngɔlɔngɔ.
2 Ondo tayɛna dimɛna dia sho mbuta ɔnkɔnɛ:
◼ “Kema dikambo dia tshitshɛ di’onto mbola l’etena k’ofukutanu kɛnɛ. Ɛlɔngɔlɔngɔ wekɔ lo tokomɛ akambo w’eyoyo wâtshutshuya dia vɔ mbɔsa tɛdikɔ t’ehomba. ‘Pombaka dimi nɔ alɔfu oka? Kokaka dimi nɔ kândji? Naa dionga diahomba ndjâla lami otsha le amato kana apami na?’ Ɛlɔngɔlɔngɔ pɛnyahɛnyamaka mbala efula l’ekadimwelo wotshikitanyi lam’ayambolawɔ wembola w’ohomba ɛsɔ. Lende afɔnyayɛ okoki efula kawɔ totana alako na? [Tshikɛ onto akɔ dihole akadimole.] Dibuku Les Jeunes s’interrogent—Réponses pratiques mbishaka elakanyelo w’ohomba. [Kotola yâmbalo y’onto akɔ oya l’ɛtɛ w’awui wofundami, lo mbɛ̂nya weoho w’ɛtɛ w’asawo amɔtshi weso lo tɛkɛta lande.] Ɛlɔngɔlɔngɔ wekɔ l’ohomba wa ekadimwelo wokɛma hwe ndo wa mɛtɛ. Ekadimwelo washa dibuku nɛ mbɛkama lo kɛnɛ kata Bible.”
3 Sawo dimɔtshi diokokiso kamba la diɔ olimu diɔnɛ:
◼ “Ɛlɔngɔlɔngɔ pomanaka l’ekakatanu efula ɛlɔ kɛnɛ. Vɔ wekɔ l’ohomba w’ekimanyielo dia mbâkandola. Lam’asalaso weolo aso tshɛ dia mbakimanyiya, onde na, sho hatokoke nyanga ondaki wa shikaa oka? [Tshikɛ onto akɔ dihole akadimole.] Ekakatanu ɛmɔtshi woleki weke watana ɛlɔngɔlɔngɔ ndjâka oma le asekawɔ. Enda fɔtɔ yele lo lɛkɛ la dikatshi 76 la 77 lo dibuku nɛ. [Kotola yâmbalo ya lo diɔmbwɛlɔ dia fɔtɔ yakɔ ndo lo palagalafɛ kofundami l’alɛta wa loshanya kele lo lɛkɛ la dikatshi 77.] Akatshi wayelana wa lo tshapita nyɛ mbishaka ekadimwelo wa sɔlɔ ndo w’eshika.”
4 Tekɔ lo nsɛna lo “tena dia wulu” djekoleko le ɛlɔngɔlɔngɔ. (2 Tim. 3:1) Mɛtɛ dibuku Les Jeunes s’interrogent kokaka kimanyiya ɛlɔngɔlɔngɔ dia vɔ kandola ekakatanu wa l’etena kɛnɛ. Totshapita 39 ta lɔkɔ tekɔ l’esato w’amɛna, ndo artikɛlɛ wa lɔkɔ wekɔ mɛtɛ ndo sunganaka. Omalɔkɔ, l’oseka diaaso tshɛ diayotokondja, tatotshimbatshimbake dia kamba olimu la dibuku sɔ di’ɔlɔlɔ efula.