Etena Kambokoka Kakianɛ
1 Lam’akafundɛ ɔpɔstɔlɔ Paulo ase Kɔrɛtɔ mukanda ande wa hende, nde akawaohola dia vɔ wakate dia sala olimu ɔmɔtshi w’ɔlɔlɔ dia kimanyiya asekawɔ ambetawudi wa la Jerusalɛma. Koko, ɔnɔnyi w’otondo wakete ko, vɔ koshidiya olimu wakawatatɛ. Diɔ diakɔ diakasadia Paulo l’ɛtɛkɛta ɛnɛ ate: “Nyotetemale . . . ndo nyoshidiya olimu ɔsɔ. Nyoyale la lolango efula la shidiya olimu akɔ oko akanyɔshi tɛdikɔ.”—2 Kor. 8:11, Français courant.
2 Hasambe lushi lakatayashikikɛ eweso. Ondo kana takayadjangɛ dia nyomoleka sambisha, dia nyomoleka mbeyana la anangɛso, dia ndjâla la waonga walɔmbama ko ndjokondja diɛsɛ dia ndjâla l’ɔkɛndɛ ɔmɔtshi l’olimu, kana dia nɛmbia wɔdu ɔmɔtshi. Koko, kânga mbakiso la tokanyi t’ɛlɔlɔ oma l’etatelo, ondo sho kotetemala polo ndo l’ekomelo. Sho kɔmɛna mingu yatete, ngɔndɔ ndo ɛnɔnyi ko tekɔ nshi tshɛ paka lo dihole diakɔ ɔtɔi. Onde aki ohomba dia sho ndjela dako dia ‘tetemala ndo shidiya’ kɛnɛ kakatatatɛ?
3 Tokotsha Eweso Aso: Sangoya dikambo dimɔtshi wɛmɛmɛ tshikitana la dikotsha. Naka sho mbutaka tsho ɔnɛ: tayo, tayo kete hatototshɔ otsha la ntondo. Sho pombaka mbata dikambo dimɔtshi ko sala tshɛ dia dikotsha ɔlɔlɔ aha la tshimbatshimba. Dia sala ɔsɔku, sho pombaka ndjalɔngɔsɔla. Ekɔ ohomba dia ndjaombɛ etena kahombama dia kotsha olimu akɔ ndo mbidja yimba dia kamba l’etena kakɔ mɛtɛ lo dikambo diakɔ. Dako dia dimɛna diɔ nɛ: toyashikike lushi la wonya wahombaso shidiya olimu akɔ, ndo l’ɔkɔngɔ, lo ndjahokolaka, toyele yɛdikɔ shɔ.
4 Etena kahatatokokaka kotsha oyango aso, sho toyangaka mbuta ɔnɛ: ‘Layoyenda dikambo ndo l’ɔkɔngɔ.’ Koko sho hateye kɛnɛ kayotokomɛ lui. Tukedi 27:1 mbutaka ɔnɛ: “Tuyasemaki dia lui, Ne dia we heyi akambu wayutumbaka la lushi la lushi.” Ombeki Jakɔba akatatshi dia ekɔ wâle mbidja kanyi lo nshi yayaye, nɛ dia ‘sho hateye akambo wayoyala lui lo lɔsɛnɔ laso. . . . Lâsɔ naka onto ɔmɔtshi mbeyaka ntsha kɛnɛ kele ɔlɔlɔ, ko nde hakitshe, dikambo diakɔ diekɔ pɛkato le nde.’—Jak. 4:13-17.
5 Akambo efula kokaka tekola lomba, ndo anto efula kokaka toyanga di’elimu ɛmɔtshi ko eweso aso mbeyaka ndjokita balakata esadi eto. Sho pombaka sala wolo diaha mbohɛ eweso aso. Ekɔ ohomba dia mbutaka eweso akɔ tena efula l’alɔmbɛlɔ aso. Ondo tayokimanyiyama lam’ayotɔlɔmba asekaso dia vɔ toholawɔ ndo tokeketsha. Tofunde eweso akɔ lo alamanaka; ɔsɔku mbayotohɔkɔ dia mbeya woho watatahame. Sho pombaka ndjadjangɛ dia ‘sala oko akatate l’otema aso.’—2 Kor. 9:7.
6 Ngɔndɔ ka Mɔmbi kekɔ lo tosha diaaso di’ɔlɔlɔ efula dia sho ndjasha l’eweso aso. Tayosha anto dibuku Vous pouvez vivre éternellement sur une terre qui deviendra un paradis la tobukubuku. Onde hatokoke ndjashikikɛ eweso w’ɔlɔlɔ? Lande na ahatahembe dia tshika ekanda efula lo mbilo na? Ayonga dikambo dia yimba le anto efula dia vɔ ndjadjangɛ dia sala waendelo w’eyoyo efula ndo dia tatɛ mbeka l’anto Bible.
7 Kema dikambo dia tshundju dia kaloyaka kɛnɛ kele ohomba l’ɔkɔngɔ, lam’ele ‘andja ɔnɛ wekɔ lo tete.’ (1 Joani 2:17) Waɛsɛ la ɛtshɔkɔ wa lânde l’olimu wa Jehowa wekɔ lo mbishama le so kakianɛ. Aya sho mbakimɛ!