Towese Saki Kakalomialomiama Oma lo Tokatshikatshi Nkumu ya Diolelo No. 34
1 Waendelo w’eyoyo w’eshika kimanyiyaka onto dia nde mbola. Mbetawɔ kande tafulaka yema yema. Naa alako w’eshika wele ohomba nama lo yimba etena kakalolaso dia tenda anto wakɛnya saki kawɔ lo kiatshikatshi Nkumu ya Diolelo No. 34?
2 Oma ko Mɔmbi 24, 1995, yɛdikɔ ya miliyɔ tshanu y’apandjudi wa Diolelo wokahanyemi lo tshumanelo oko 75000, wekɔ lo kahanya tokatshikatshi Nkumu ya Diolelo No. 34 l’andja w’otondo lo yoho ya lânde. Okahanyelo wa lânde ɔsɔ wayotetemala edja ndo tokatshikatshi tshɛ tele l’etshumanelo tamboshila. Sho pombaka kalola la tenda anto wakatasha kiatshikatshi shɔ.
3 Lo diendelo di’oyoyo, sho kokaka mɛnya onto akɔ ɔnɛ losango lele lo kiatshikatshi nyɛ mendanaka l’akambo wa nshi nyɛ. Tôlonge dimɛna etena katotɛnde tokanyi tande lo kɛnɛ kakandale. Ɔsɔku mbayoteya dikambo diayotosawola la nde mbala kayaye. Naka onto akɔ ambetawɔ l’etena ka diendelo di’oyoyo, kete sho kokaka tatɛ wekelo wa Bible kâmɛ la nde. (1 Kor. 3:6, 7) Okanga wa pomɔ lokolo l’ɔlɔ ko sawo dia wɔdu ndo diakalɔngɔswama dimɛna.
4 Okokiyɛ mbuta lo diendelo di’oyoyo na? Wɛ kokaka mbuta wate: “Aha la tamu wɛ mbohɔka kiatshikatshi yakamakotshikɛ atayala edja. Dimi kanaka nte wɛ akakondja diaaso dia ndjiala ndo dia kana lomba lo losango lele lɔkɔ. Onde wɛ hɛnyi dia losango lele lɔkɔ mendana l’akambo wa nshi nyɛ ndo kendaka wɛmɛ? [Tshikɛ onto akɔ etena akadimole.] Ɛsɔ tênde tokanyi tɔmɔtshi tele lo kiatshikatshi yakɔ nyɛ tendana la nshi yayaye ya diambo yatombɛ Nzambi.” L’ɔkɔngɔ, nyu mbeyaka sɛdingola odingɔ ɔtɔi kana ehende wasungana, ko wɛ mbɔsɛngɔla dia nde mbeka Bible. Naka onto akɔ hɛnya saki, wɛ mbeyaka mbosha numɛlɔ ya Tshoto y’Etangelo kana ya Réveillez-vous! yeke ka tomba.
5 Paka Diolelo diaki Nzambi nto mboyodja lɛnɛ akahekɔ onto. Sho pombaka kitsha wɛkamu wakiso tshɛ lo Diolelo sɔ. Oma kakianɛ, tokimanyiya akina dia vɔ kondja ewo k’oshika dia Dui dia Nzambi l’ekimanyielo ka wekelo wa Bible la ngelo. Tɔsɔngɔlɛ oseka onto tshɛ dia nde mbeka Bible, dia nde mbɔtɔ lo Tshunda di’andja w’oyoyo, dia nde ndjakimɔ le Jehowa ndo dia nde mbewoya lokombo lande. Lɔsɛnɔ l’onto l’onto la lo nshi yayaye nemanɛka la dikambo sɔ. Aha sho tshikɛ eyangelo wa diangɔ dia l’emunyi la ekiyanu wa lo lɔsɛnɔ dihole dia vɔ tohandjɛ lɔsɛnɔ l’oshika latolaka Nzambi.—Luka 21:34-36; 1 Tim. 6:19.
6 Kem’edja, Jehowa ayonya kɔlɔ tshɛ yɛnya anto pâ oma la nkɛtɛ. Anto akɔ wayonga la lɔsɛnɔ la wɔladi l’atei w’akambo w’amɛna lo paradiso. Vɔ wayonga l’alemba wa kokele ndo wayokondja diangɔ efula ndo mbo ya ndɛ ya weoho la weoho. Ande etena k’ɔlɔ kayoyala lee! Shi wɛ kombolaka kondja ɛlɔlɔ wa l’etena kɛsɔ? Ɔsɔku mbediɔ.
7 Lâsɔ todje wolo dia ndjela alako watoshawɔ. Tokondja ɛlɔlɔ watomba oma lo diɔtɔnɛlɔ dia l’apandjudi wambekesanɛ l’olimu. Ɔngɛnɔngɛnɔ aso wayoleka naka sho mbika etshina lo saki ka ntondo lo sakaka waendelo w’eyoyo w’eshika ndo lo nɔmbɔlaka wekelo wa Bible. Nyɛsɔ totombole Jehowa sho tshɛ lo sangwelo diande dia dimɛna efula lo dikambo di’anto.—Osam. 150:6.