Tokambe l’Abuku w’Edjedja Dimɛna
1 Jehowa toshaka mbo ya ndɛ ya lo nyuma y’amɛna ndo y’efula. L’edja k’ɛnɔnyi, ekanda k’ɔlɔlɔ ka mbo ya ndɛ shɔ kakatombe oko abuku wa ndjɛkɛ 192. Lo Lotena Eduwa, tayosha anto oseka dibuku tshɛ dia ndjɛkɛ 192 diakatombe la ntondo ka 1982. Onde tekɔ l’amɔtshi weke amɛna? Onde etshumanelo kekɔ l’amɔtshi lo lɔkɔtɔ? Naka ngasɔ, kete ayonga dimɛna nyomala kɛnɛ kele lɔkɔ ndo sɔna tokanyi tayokoka kamba latɔ lo wɛnyanyelo aso.
2 Naka dibuku “Que ton royaume vienne!” mbashaso anto, sho kokaka tatɛ sawo l’ɛtɛkɛta ɛnɛ:
◼ “Aya yɛdikɔ y’ɛnɔnyi suke la 2000 mbambɔlɔmba Akristo di’oyelo wa Diolelo diaki Nzambi. Oko akanayɛ, Diolelo sɔ ayodiosalɛ anto na? [Totshike onto akɔ etena akadimole. Tofole dibuku lo lɛkɛ 25 ndo towɛnya kiombokombo yasɔtɔla ɛtshɔkɔ ɛmɔtshi wayosalema mɛtɛ lam’ayolɛ Diolelo.] Dibuku nɛ tɛkɛtaka dia kɛnɛ kayosala Diolelo, ndo nembetshiyaka nganɛ wakokayɛ wɛ la nkumbo kayɛ kondja ɛtshɔkɔ ɛsɔ. Naka wɛ nangaka diala, kete layɔngɛnangɛna dia kotshikɛ dimɔtshi.”
3 Naka dibuku “Le bonheur — Comment le trouver?” mbɛnyanyaso, kete sho mbeyaka mbuta ɔnɛ:
◼ “Ekakatanu wekɔ efula l’andja ɔnɛ, diakɔ diahakoke anto efula ndjâla l’ɔngɛnɔngɛnɔ. Onde wɛ fɔnyaka ɔnɛ anto kokaka ndjala l’ɔngɛnɔngɛnɔ l’atei w’akambo wa nshi nyɛ? [Totshike onto akɔ etena akadimole. Tofole dibuku lo lɛkɛ 40, kele tɔtɛkɛtɛ akambo amɔtshi akɔ wakoka tâta asolo.] Bible tɛnyaka woho wakokaso tokomɛ akambo asɔ ko ndjokondja ɔngɛnɔngɛnɔ waha la komelo l’andja w’oyoyo wa wɔladi. [Tofole dibuku lo lɛkɛ 191, kele tale Isaya 32:17, 18.] Bible mbishaka alako w’eshika wakoka tokimanyiya dia sho ndjâla l’ɔngɛnɔngɛnɔ efula lo lɔsɛnɔ. Dibuku nɛ mɛnyaka alako amɔtshi a l’atei awɔ ndo nembetshiyaka woho wa mbayela.”
4 Naka tekɔ lo kamba la dibuku “La paix e la sécurité véritable: comment est-ce possible?” kete ondo taholanga pemba la mbɔtwɛlɔ ka lo sawo kɛnɛ:
◼ “Onto tshɛ nangaka ndjala la lɔsɛnɔ l’andja wayoyala la wɔladi wa mɛtɛ ndo lotui tshitshi. Lonyangu ko, tatasɛnaka ndoko lushi l’atei w’akambo wa ngasɔ. Oko akananyɛ, kakɔna kotohomba salema dia wɔladi la lotui tshitshi ndjâla akambo wa mɛtɛ? [Totshike onto akɔ etena akadimole.] Nzambi ekɔ la wolo wokoki dia mbidja wɔladi la nkɛtɛ, ndo nde akalake dia sala dikambo sɔ.” Towɛnya sango diele lo lɛkɛ 98, ko sho mbala Mika 4:3, 4. Naka onto akɔ ekɔ lo mɛnya saki, tonyomolembetshiya efula lo dikambo di’elongamelo ka Diolelo. Towosha dibuku, ndo tɔshi tɛdikɔ dia ndjosala diendelo di’oyoyo.
5 “Anto efula ndjambolaka lande na katshika Nzambi dia pâ y’efula ya nganɛ ndjâla. Nɛ dia nde ekɔ kanga wolo tshɛ, lande na kahandasale ndoko dikambo dia shidiya fɔnu yaso na? Akanayɛ lo dikambo sɔ na? [Totshike onto akɔ etena akadimole.] Bible toshikikɛka dia Nzambi hatokale.” Tofole biukubuku lo lɛkɛ 27; odingɔ 22, kele tale Osambu 37:11, 29. Tokotole yambalo yande oya lo sango dia dimɛna diɛnya kɛnɛ kakokaso kongɛ lo nshi yayaye. Naka onto akɔ ambolongola biukubuku, towote dia sho ndja a ndjowɛnya woho wokokinde kamba la yɔ dia mbeka Bible.
6 Ekanda aso wakasokoya miliyɔ y’anto dia vɔ sɛdingola Bible dimɛna dimɛna. Kɛnɛ kakaweke akawasha elongamelo ka nshi yayaye y’ɔngɛnɔngɛnɔ. (Osam. 146:5) Tekɔ la diɛsɛ dia mbakimanyiya.