Onde Na Waehwelo Wa Jehowa Tosalanganyaka Lo Nyuma?
1 Omembi w’esambu ɔmɔtshi akate lo lembo lɔmɔtshi lakandatombolaka Jehowa ate: “Lo waehwelo ayɛ mbahɛmi asolo.” (Osam. 119:99, NW) Tshɛkɛta y’oma lo Hɛbɛru yokadimɔmi ɔnɛ “waehwelo” yekɔ la kanyi y’ɔnɛ Jehowa toholaka kɛnɛ kata ɛlɛmbɛ la adjango ande. Naka sho mbidja yimba lɔkɔ, kete ɛlɛmbɛ akɔ wayotosalanganya lo nyuma ndo wayotela ɔngɛnɔngɛnɔ.—Osam. 119:2.
2 Oko weso l’atei w’anto wa Jehowa, sho nongolaka alako tena tshɛ; tambôkaka efula k’alako akɔ. Kânga mbangɛnangɛnaso ekeketshelo wa ngasɔ, sho toyangaka mbaohɛ. (Jak. 1:25) Jehowa toshaka waehwelo woludi la ngandji aha la mboka yɛnyi. Ɔpɔstɔlɔ Petero akatɛkɛta dikambo dia waehwelo amɔtshi l’oyango wa ‘mangasanya dikoka diaso dia kana yimba ɔlɔlɔ, woho wa sho mbohɔka adjango wa Khumadiɔndjɔ.’—2 Pet. 3:1, 2.
3 Tena tshɛ vɔ tôholaka dikambo di’ohomba wa tetemala la mbeka onto l’onto ndamɛ ndo dia mbɔtɔka lo nsanganya. Nɛ dia elimu ɛsɔ wekɔ ohomba efula di’ɔlɔlɔ aso wa lo nyuma.—1 Tim. 4:15; Heb. 10:24, 25.
4 Le anto amɔtshi, okakatanu woleki woke ele dia kotsha ɔkɛndɛ awɔ w’Okristo wa sambisha. Diakɔ diahombaso mbidja weolo, mbɔsa tɛdikɔ ndo tetemala. Kânga mbele dikambo sɔ wolo le so, shambu ya ndjâla “l’ekolo wɔlɔtshi elato wa diangatangata dia lokumu l’ɔlɔlɔ” ayotokimanyiya dia sho ‘tshikala nge.’—Ɛf. 6:14, 15, NW.
5 Olimu aso hahombe tshutshuyama paka lo mbohɔka ɛlɛmbɛ wa Jehowa eto. Ɔpɔstɔlɔ Paulo toholaka ɔnɛ otema mbasha saki kele laso ohomba dia sala “wotelo wa lo sɛkɛ dikambo dia panda.” (Rɔmɔ 10:10, NW) Naka sho tekɔ la mbetawɔ ka nge ko otema aso kadimɔka otsha lo waehweolo wa Jehowa, kete tayɔtɛkɛtaka ndo tayotombolaka lokombo lande.—Osam. 119:36; Mat. 12:34.
6 Etena kakambaso efula dia sala akambo w’ɔlɔlɔ, sho nongamɛka mɛtɛ dia tayokondja ɔngɛnɔngɛnɔ oma lɔkɔ. (Und. 2:10) Paulo mbutaka ɔnɛ ɔngɛnɔngɛnɔ ekɔ olowa wa nyuma ka Jehowa, ndo sho pombaka nyanga dia ndjâla la dionga sɔ. (Ngal. 5:22) Petero akakotsha ɔnɛ: “wolo tshɛ wadjama” wayofutama oma l’olimu watɔ elowa, dikambo sɔ mbishaka ɔngɛnɔngɛnɔ.—2 Pet. 1:5-8, NW.
7 Naka tambohomana l’ekakatanu, tohɔ yɛdikɔ ya nge yakɔshi apɔstɔlɔ wakate vate: “Ne dia shu hateyi ntsha dikambu dikina, paka mvuta akambu wakatenyi la wakatuki.” (Etsha 4:20) Sho kondjaka wolo nto lamawohɔso ɔnɛ: ‘lo salaka ɔsɔku, tayoyatsha shoamɛ, ndo sho ndo wanɛ watolonga.’—1 Tim. 4:16.
8 Sho hatomala ndo kema la tokumbɛkumbɛ l’ɔkɔkɔ w’ɔnɛ wekɔ lo tohola wonya tshɛ. Lo woho wotshikitanyi, sho mbeyaka ohomba w’alako akɔ dimɛna. (Osam. 119:129) L’etena kɛnɛ ka wolo, sho ngɛnangɛnaka dia Jehowa tetemala la toholaka dia sho salangana lo nyuma ndo dia totshutshuya lo sho ndjâla l’ohetoheto l’etsha w’ɔlɔlɔ.—2 Pet. 1:12, 13.