Ekongelo Ka Losanganya L’otshimbedi 1995-1996
1 Nsanganya y’otshimbedi yakatatɛ 1995 lo Lovula yekɔ l’ɔtɛ a dui w’ɔnɛ: “Nyosene, Nyushikikali, Nyukikitali.” Ɔsɔ ekɔ ɛtɛkɛta waki Paulo wakandakeketsha Akristo wa l’eleko ka ntondo, wofundami lo 1 Koreto 16:13.
2 Le wanɛ wahataliɔtɔ, losanganya lakɔ layɛnya ntondotondo ɔnɛ tekɔ mɛtɛ l’ohomba wa ndjasɛdingola lo nyuma. Dia sho tshikala nge lo salaka akambo w’ɔlɔlɔ lo “nshi y’ekumelu” nyɛ, ekɔ ohomba dia sho sɛdingola ɔlɔlɔ diokanelo diele l’asaso la Jehowa ndo l’ɔlɔngɔswamelo ande. (2 Tim. 3:1) Wayotohola ɔnɛ Jehowa mandolaka weolo wadjaso. Tekɔ l’ohomba wa vɔ têtsha dia sho nyomoleka mɛnya waonga wa Akristo ndo nama lɔkɛwɔ l’ɔlɔlɔ.
3 Wayoka epole ɔsɛkɛ ndo l’ohomba wa kamba olimu w’endana la mbetɛ anto ambeki l’ohetoheto, tele kawɔ akɔ ango la saki ka pama lo nyuma ndo ka ndjâla l’ɛkɛndɛ. Tokanyi t’eshika tɛnya woho wokokiso ndjela ekongelo k’olelo wa lo nyuma, onto l’onto ndo l’atei a nkumbo, tayoshama l’alako wotshikitanyi, diɛnyɛlɔ ndo ɛkɛtshanyelo.
4 Lushi la Samalo, wanɛ walanga nongola batismu wakotsha akambo walɔmbama wayosala wotelo wa lo sɛkɛ wa ndjakimɔ kawɔ le Jehowa lo nongola batismu. Lo wedi okina, sho nangaka sho tshɛ monga lawɔ lushi la Lomingu dia nonga dako dia lo sɛkɛ diele l’ɔtɛ a dui w’ɔnɛ: “Dihole Diakɔna Diele Layɛ la Ntondo ka Nzambi Na?”
5 Ekongelo kayodihiyama l’ekeketshelo wa tshikala nge lo nyuma, lo kambaka l’asaso lo yimba ya ngandji ndo ya wɔladi. Losanganya l’otshimbedi ekɔ diaaso dimɔtshi dia lânde diatosha Jehowa dia ‘sho tshutshuyana lo ngandji la lo elimu w’ɔlɔlɔ.’ (Heb. 10:24,25) Todje yimba dia sho ndjalɔngɔsɔla dia monga lâwɔ nshi yakɔ hiende.