Tokambe La Lokaka La Tobukubuku L’esambishelo
1 Anto wa nshi nyɛ ngɛnangɛnaka oseka sawo tshɛ. Lam’ayototshɔ la tosambisha lo Tshango, tɛmbɛ tobukubuku efula woho wa tokamba la tɔnɛ tayɔngɛnyangɛnya wanɛ wadjasɛ lo mbilo kaso. Lâsɔ katohembe la wɛnyanyelo ɔmɔtshi l’atei wɛnɛ:
2 Dia losha la biukubuku “Diulelu ne diayela Paradisu,” katombole shate:
◼ “Oko le yɛ, ngande wotonga andja otondonga Nzambi ndamɛ oto mbele ɔnɔmbɔdi awɔ? [Tôtshike etena akadimole.] Mɛtɛ sho nɔmbaka ɔnɛ Nzambi ɔshi lowandji la nkɛtɛ lam’alɔmbaso dɔmbɛlɔ dia Shɛso, dɔmbɛlɔ diakatolakanya Yeso Kristo. [Tofole biukubuku lo lɛkɛ 3 ko sho mbala odingɔ 1 washila Mateu 6:10.] Naka wɛ kombolaka mbidjasɛ l’andja wele oko wɔnɛ, kete wɛ pombaka mbala biukubuku nyɛ.” Lɛkɛnde yɔ.
3 Kanyi mɔtshi dia mɛnya onto biukubuku “Quand la mort frappe un être aimé. . . ”:
◼ “Onde wɛ kanaka ɔnɛ lushi lɔmɔtshi ndoko onto layolela onto ande lalangande lambovɔ? [Tôtshike etena akadimole.] Biukubuku nyɛ yakafundama dimɛna efula yambokeketsha miliyɔ y’anto, nɛ dia yɔ nembetshiyaka ɔnɛ lushi lɔsɔ laya suke ndo ɔnɛ ekɔ daka dia mɛtɛ di’oma lo Bible. [Tofole biukubuku yakɔ lo lɛkɛ 5 ko sho mbala odingɔ 5, djekoleko 1 Koreto 15:21, 22. Ko l’ɔkɔngɔ sho ndjowɛnya sango diele lo lɛkɛ 30.] Lanɛ osangi wa sango akɛnya ɔlɔ wayotoka lam’ayotolongola wakiso wa ngandji wakavu etena kayowolɔ. Ko lende ayosalema dikambo di’ɔngɛnɔngɛnɔ nɛ na? Wɛ ayotana okadimwelo w’oma lo Bible lo biukubuku nyɛ.” Naka onto akɔ ambolongola losha laso, tokotsha ɔnɛ: “Dimi nangaka ndja nto dia sho nyomoyosawola ɔlɔlɔ lo dikambo sɔ.”
4 Ondo tayolanga mɛnyanya biukubuku “Voici, je fais toutes choses nouvelles,” kete katɔ̂sɛngɔla mbala kakɔ ɔtɔi dia mbeka lande Bible:
◼ “Anto efula ndjambolaka wembola lo kɛnɛ k’endana la Bible. Ondo dimbola dimɔtshi l’atei awɔ diambokotshindjaka yimba. [Tofole biukubuku yakɔ lo lɛkɛ 30.] Anto efula ndjodihiya lo ndjambola ɔnɛ: ‘Ngande wakokayɛ ndjalɔngɔsɔla dia mbidjasɛ pondjo lo Paradiso na?’ ” Naka sho mbisha kɔmatɛrɛ l’odingɔ 57 la 58 lo lɛkɛ 29 la 30 ko mbala Enyelo 21:3, 4, kete tamboka etshina ka mbeka l’onto Bible. Todihiya lo mbɔlɛkɛ biukubuku ndo lo mbokana lande dia ndjɔsɛdingola wembola ekina.
5 Kânga sho mbeyaka pemba la wɛnyanyelo ɔnɛ waha l’okakatanu wa biukubuku “Le nom divin qui demeure à jamais”:
◼ “Dikambo dimɔtshi dia l’atei wa wanɛ wakameke ntondo lo Bible aki lokombo la Nzambi. Onde wɛ lieyaka? [Tôtshike etena akadimole.] Nte kɛnyalɔ. Lɔ tanemaka oko ɛnyɛlɔ lo Osambu 83:18. [Towâle divɛsa diakɔ.] Biukubuku nyɛ mɛnyaka woho wafundama lokombo la Nzambi, Jehowa, l’ɛtɛkɛta wotshikitanyi. [Towɛnya oshilo wele lo lɛkɛ 8.] Naka wɛ nangaka mbeya awui efula w’endana la Jehowa ndo la asangwelo ande, kete ala biukubuku nyɛ.” Totshumi ɔtɛkɛtshi aso biukubuku yakɔ.
6 La lokaka lɔsɔ la tobukubuku t’amɛna efula, tekɔ mɛtɛ la dihomɔ di’ɔlɔlɔ dia “mbewoya akanga a ndjakitshakitsha lokumu l’ɔlɔlɔ.”—Is. 61:1, NW.