Tokalole Dia Tênda Onto Tshɛ Laketawɔ Biukubuku
1 Ɔpɔstɔlɔ Paulo akândola Ase Filipi nɛ dia vɔ ‘wakawohɔ.’ (Fil. 4:10) Naka tayoyela ɛnyɛlɔ kawɔ l’esambishelo, kete ‘tayohɔ’ wanɛ watatasambisha ndo tayotshutshuyama dia ntshɔ towaenda.
2 Naka takatshikɛ onto biukubuku “Diulelu ne diayela Paradisu,” kete sho mbeyaka mbuta kânga ɔnɛ:
◼ “Lakakane yimba lo sawo diakatasawola mbala ketshi, ko avɛsa ahende wakandjɛ lo yimba. Dimi nangaka kɛnyawɔ. Ondo wɛ mbohɔka: Takatɛkɛta dia lowandji layohomba Nzambi kamba lalɔ olimu la nkɛtɛ. Jehowa Nzambi ndakaka lo Bible ɔnɛ dikambo sɔ diayokotshama. [Tâle Danyele 2:44.] Wɛ fɔnyaka dia ayosalema ɔsɔku? [Tôtshike etena akadimole.] Hokamɛ kɛnɛ kata Nzambi lo dikambo dia dikoka diele lande dia kotsha alaka ande. [Tâle Isaya 55:11.] Onde divɛsa nɛ hatokeketsha dia sho kitsha wɛkamu aso lo Diolelo diaki Nzambi? Ko, etena kakɔna kayokotsha Nzambi alaka ande na?” Towote ɔnɛ tayoyokadimola lo wombola ɔsɔ lam’ayotoyowenda mbala kayaye.
3 Naka tambotshɔ dia tênda onto laketawɔ biukubuku “Quand la mort frappe un être aimé. . . ,” kete sho mbeyaka pemba la mbɔtwɛlɔ ka lo sawo kɛnɛ:
◼ “Lam’ele takatɛkɛta mbala ketshi dikambo dia nyɔi k’onto lokaso ngandji, dimi lakatshe tshɛ dia kalola a ndjokenda.” Towɛnya osato wele lo lɛkɛ 30 tawotɛ ɔnɛ: “Onde wɛ akohɔ dikambo nɛ di’ɔngɛnɔngɛnɔ, diɛnaso wanɛ wambolɔ wambɛnana la wakiwɔ wa ngandji? Dimi lakakombola dia kana wɛ mbeyaka lɛnɛ ayeta akambo ango, l’olongo kana la nkɛtɛ. Ondo wɛ akɛnyi kɛnɛ kakadimola Bible, lo lɛkɛ 26 la biukubuku nyɛ.” Tɔtɛkɛtɛ di’atshina w’akambo wele l’odingɔ 3 polo 5, ko sho mbɛnya Joani 5:21, 28, 29. Naka tekɔ l’etena, tâle divɛsa dimɔtshi l’atei a wanɛ woshilami lo lɛkɛ 26.
4 Onde tambomɛka mbeka biukubuku “Voici, je fais toutes choses nouvelles”? Lam’ayotoyowenda nto, sho mbeyaka mimɛ ɔnkɔnɛ:
◼ Tonyomokalola lo lɛkɛ 30 ko sho mumbola dimbola nɛ: “Lo na otshikitanyi Bible l’abuku akina?” Tofole biukubuku lo lɛkɛ 3 la 4 ko sho nyomenda odingɔ 1 polo 4, la osato wele lo lohoso. Tâle divɛsa ɔtɔi kana avɛsa ahende woshilami l’awui wofundami l’ɛse ka dikatshi l’odingɔ 4. Towote ɔnɛ Bible mbele tshɔi ya dibuku diasha elongamelo ka diambo nganɛ. Tɔshi tɛdikɔ dia ndjowenda mbala kekina. L’ɔkɔngɔ wa êndelo ka sato, naka sho mɛnaka ɔnɛ wekelo ayotetemala, kete sho mbeyaka funda l’alapɔlɔ aso.
5 Sho mbeyaka mimɛ sawo nto lo biukubuku “Le nom divin qui demeure à jamais” lo yoho nyɛ:
◼ “Mbala ketshi, dimi lakakɛnya lokombo laki Nzambi lo Bible. Mbeya lokombo la Jehowa ndo kamba lalɔ ekɔ dikambo di’ohomba efula l’ɔtɛmwɛlɔ aso.” Tofole biukubuku lo lɛkɛ 31, tɔsɛdingole tokanyi t’ehomba tele l’edingɔ ɛnɛi w’ekomelo, ko sho mbâlɛ Joani 17:3 la Mika 4:5. Towote ɔnɛ tekɔ lo mbɔsɛngɔla wekelo wa Bible wayowokimanyiya dia nde mbeya ɔnɛ lokombo laki Nzambi layɔlɛmiama ndo ɔnɛ anto wayonga l’ɔngɛnɔngɛnɔ wa sɛna lo nkɛtɛ kayokadimɔ paradiso.
6 Lâsɔ tohɔke anto wakahomana laso. Sho pombaka tetemala la ntshɔka dia towaenda ndo ndjalɔngɔsɔlaka dia mbaewoya awui w’ekeketshelo. Ɔnkɔsɔ, tayonga Akristo ‘watɔ mɛtɛ elowa’ l’olimu wa mbetɛ anto ambeki w’eyoyo.—Mat. 13:23.