Onde Wenya Wa Nsanganya Ayotshikitana?

Naka tshumanelo efula diɔtɔ lo Mbalasa ka Diolelo kakɔ kâmɛ wambokana dia mbahɔnaka kana tshikitanya wenya wa nsanganya, vɔ pombaka sala dikambo sɔ lo Tshango 1. Naka vɔ nangaka sukɛ yɛdikɔ shɔ, kete wayokana ngandji lasawɔ ndo wayɔsana la nɛmɔ. Mbala efula, otshikitanyelo wa wenya wa nsanganya salemaka di’ɔlɔlɔ aso woho wa sho kondja diaaso dia mbɔtɔka lɔkɔ aha l’okakatanu kânga yema.

Mɛtɛ, mbeyaka ndjâla ko otshikitanyelo wa wenya wa nsanganya wayosalema lo Tshango hɔtɔnɛ dimɛna l’ekongelo kaso ka wenya. Ondo tayohomba sala etshikitanyelo wayokifukutanya yema. Naka sho ndjâla la yimba ya kamba kâmɛ, kete tayɛnya ɔnɛ sho mbokaka bonde kɔsami yɛdikɔ ya ngasɔ yêla anto tshɛ w’endana la dikambo diakɔ ɛlɔlɔ.

Mɛtɛ, otshikitanyelo wayaye wa wenya wa nsanganya mbeyaka sungana le so dimɛna efula. La tokomaka lɛsɔ, tambokeketshama dia sala etshikitanu wahombama wayotokimanyiya dia mbɔtɔka lo nsanganya tshɛ ya lo lomingu, lo ndjela ekongelo kakashikikɛ etshumanelo. Tosale tshɛ dia mbokoya omembi w’esambu, lakate ate: “Dimi lakangenangena lam’akawamvutela vati: Tutshu utsha lu luudu la [Jehowa, NW]!”​—⁠Osam. 122:⁠1.

L’esomba wɔtɔ tshumanelo efula lo mbalasa kakɔ kâmɛ, londjo totombaka tena dimɔtshi l’asa elui wa dikumanyi lo dikambo dia wenya wa nsanganya. Sho kokaka mbala awui wayela anɛ lo Tshoto y’Etangelo ya Loseketanya 15, 1988 (lo Falase), lɛkɛ 19, odingɔ 15: “Oko ɛnyɛlɔ, naka tshumanelo pende diekɔ lo sangana lo Mbalasa ka Diolelo kakɔ kâmɛ, ndoko kɛnɛ kahomba fɔnya ɔnɛ mbalasa kekɔ ‘kakiwɔ’ ndo ɔnɛ vɔ kokaka fundɛ kekina dia sala kɛnɛ kalangawɔ lo kɛnɛ k’endana la wenya wa nsanganya kana akambo akina. Dilɛmiɛlɔ diashanawɔ ndo yimba ya kamba kâmɛ pombaka mbeta la ntondo.”​—⁠1 Pet. 3:​10-12.