Afundelo Tshɛ Wekɔ Ohomba Dia Ndakanya
1 Tokanyi lo dikambo di’ohomba wa Bible tekɔ efula ndo tshikitana. Oko le so, sho mbetawɔka ɔnɛ ekadimwelo w’ekakatanu woleki wolo wahomana l’anto tanemaka lɔkɔ, kâmɛ ndo elembetshiyielo w’eshika dia nɔmbɔla lɔsɛnɔ laso dimɛna. (Tuk. 3:5, 6) Ndoko kɛdimi la lomba lele l’alako wa lo Bible. Ndoko koleki alako w’endana la lɔkɛwɔ walɔmbatɔ. Losango latɔ lekɔ wolo nɛ dia lɔ “mbeyaka nimbitela tukanyi la saki ya utema.” (Heb. 4:12) Ngande ayotokimanyiya anyaso anto dia vɔ mboka ɔnɛ vɔ pombaka mbɔsa dibuku sɔ diosukukadi la tshendo ko tatɛ diala la tshete? Nyɛsɔ tohembe, lo Yitshu, alako amɔtshi wayela anɛ wakalɔngɔsɔma dia mbisha anto Traduction du monde nouveau la dibuku La Bible: Parole de Dieu ou des hommes?
2 Lam’eyaso ɔnɛ anto efula wekɔ lo ndjakiyanya dia kotsha ehomba awɔ a weke, lâsɔ totate sawola la wɔ ɔnkɔnɛ:
◼ “Anto efula wahomana lami nshi nyɛ mbutaka ɔnɛ okiyanu awɔ wa ntondo ele kotsha ɛkɛndɛ awɔ w’akambo w’akuta. Efula wamboyasha tshɛ l’oyangelo wa diangɔ dia l’emunyi, dikambo diatshindja yimba. Naa kiɔkɔ yoleki dimɛna y’alako lo dikambo sɔ? [Tokonge okadimwelo.] Lakɛnyi dia Bible mbishaka alako w’eshika wokoki kimanyiya onto dia nde ndjanyɛ ekakatanu w’anyanya. Enda ɛnyɛlɔ kɛmɔtshi.” Tofole dibuku La Bible: Parole de Dieu ou des hommes? lo lɛkɛ 163 ko sho mbala 1 Timote 6:9, 10, koshilami l’odingɔ 3. Tolembetshiya awui akina l’odingɔ 4, ko sho mbɔlɛkɛ dibuku.
3 Sho kokaka menda kanyi kina nyɛ:
◼ “Etena kalaso jurnalɛ kana kalongaso nsango, sho mbokaka dikambo dikina dia lonyangu nshi tshɛ ko ɔkɛi aso tɔtɛkɔyaka. [Toshile dikambo dimɔtshi dia lonyangu dieke ka salema.] Ngande wayotoshidiya ekakatanu wa ngasɔ? [Tokonge okadimwelo.] Lo 1983, owandji wa lo États-Unis (nshi shɔ Ronald Reagan) akate ate Bible kekɔ la losango loleki ohomba lo nsango tshɛ yokofundamaka ndo ‘ɔnɛ okadimwelo lo ekakatanu tshɛ wakoka onto pomana lawɔ wekɔ lɔkɔ.’ Ɛtɛkɛta ande mboholaka kɛnɛ kata Bible twamɛ. [Tale 2 Timote 3:16, 17.] Lekɔ lo nanga kɛnya lande na kakokaso mbetawɔ Bible.” Totondja tokanyi tɔmɔtshi t’ohomba efula tele lo kiatshikatshi Lande na kahombaye mbetawo Bible. Tôlake dia kalola nto landjôlembetshiya lo woho akɔna wa diambo wakotshama pɔlɔfɛsi ya lo Bible oma l’akambo wasalema l’andja nshi nyɛ.
4 Naka anto efula wa lo mbilo kaso kema l’ɔtɛmwɛlɔ ɔmɔtshi, kete tohembe woho ɔnɛ:
◼ “Anto efula l’andja ɔnɛ wekɔ la kanyi y’ɔnɛ abuku amɔtshi w’ekila ndjânyaka ndo toshimu toto mbatawɔ. Vɔ wekɔ lo mɛna akambo efula wa kɔlɔ wasalema lo lokombo l’ɔtɛmwɛlɔ ko hawoyolanga mbetawɔ kânga Bible. Lâdiko dia lâsɔ, anto efula ndjambolaka ɔnɛ kana Bible ekɔ Dui dia Nzambi kana di’anto. Akanayɛ lo dikambo sɔ na?” Tokonge okadimwelo. Lo ndjela okadimwelo akɔ, tofole dibuku La Bible: Parole de Dieu ou des hommes? lo divɛsa dimɔtshi diatɛkɛta dikambo dia wekamu kana dia kanyi y’ɔtɛkɛtshi aso, ko sho sawola la nde lo kanyi tshɔi kana tokanyi tohende. Oko ɛnyɛlɔ, sho kokaka mbɔsa odingɔ 27 polo 29 tatɛ lo lɛkɛ 66 l’ɔtɛ a dui woyedi w’ɔnɛ “Yeso—Onto Laki lo Nshi y’Edjedja.”
5 Ombetsha aso wa woke ekɔ lo mbidja yimba dia ewo ka lolango lande mbeyama le onto tshɛ lalanga kikondja. Djembetelo mɔtshi yoleki dimɛna yakokaso salɛ anyaso anto ele mbakimanyiya dia vɔ mandola Bible lo kɛnɛ ketɔ; dikambo sɔ kokaka mbashimbela.—Tuk. 1:32, 33.
[Caption on page 6]
“Lɔsɛnɔ La Pondjo Lɔnɛ”
1 Ɛtɛkɛta wa Yeso wɔkɔndwami lo Joani 17:3, (NW) wekɔ awui w’eshika. Vɔ mbutaka dimɛna kɛnɛ kalangawɔ nembetshiya: mbeka dia mbeya Nzambi la Kristo kɛdikɛdi lɔsɛnɔ la pondjo! Ko onde naka tambeya Jehowa la Yeso kete tambokoka kondja difuto dia ngasɔ? Kema. Ase Isariyɛlɛ wakeyaka vate Jehowa aki Nzambi kawɔ, koko yoho yakawasɛnaka yakangunaka dietawɔ diawɔ. Omalɔkɔ, vɔ wakashisha ɔlɔlɔ a Nzambi. (Hos. 4:1, 2, 6) Ɛlɔ kɛnɛ, miliyɔ y’anto mbeyaka monga “l’ohetoheto lo dikambo dia Nzambi; koko aha l’ewo k’oshika.” (Rɔmɔ 10:2 NW) Vɔ pombaka koma lo mbeya Jehowa, “Nzambi kâmɛ ka mɛtɛ,” ndo mbeya nganɛ a mbokambɛ lo woho wasungana. L’oyango ɔsɔ, tayɔlɛkɛ anto dibuku Ewo Katɔla Otsha lo Lɔsɛnɔ la Pondjo lo Diɛla Woke. Ngande wayotosalaka na? Tokanyi tongana tayela tɔnɛ mbeyaka monga ohomba le so.
2 Lam’ele anto efula hawokaka kanyi y’ɔnɛ anto wayonga la lɔsɛnɔ la pondjo la nkɛtɛ, mbɔtwɛlɔ ka lo sawo kɛnɛ kayokotola yambalo yawɔ:
◼ “Tekɔ lo tambola asukanyi aso dimbola dimɔtshi. Naka wambokelɛ dia wɛ monga la lɔsɛnɔ la pondjo l’andja wele oko wɔnɛ, onde wɛ ayetawɔ? [Towɛnya sango diele lo lɛkɛ 4-5 la dibuku Ewo. Tolonge okadimwelo.] Wɛ kokaka kondja lɔsɛnɔ l’ɔngɛnɔngɛnɔ lɔnɛ. Ko oko le yɛ, ahombayɛ sala dia likondja? [Tôtshike akadimole.] Enda kɛnɛ katɔlɔmbawɔ lo Joani 17:3. [Tale divɛsa diakɔ.] Dibuku nɛ kimanyiyaka anto efula dia vɔ kondja ewo ka lânde. Onde wɛ nangaka kondja dimɔtshi? [Tolonge okadimwelo.] Lam’ayomoya nto, layoyokɛnya bonde kakokaso mbetawɔ ɔnɛ sho kokaka monga la lɔsɛnɔ la pondjo paka lanɛ la nkɛtɛ.”
3 Lam’akalolaso dia tenda wanɛ wakasawola la so lo Joani 17:3, sho kokaka mbuta nganɛ:
◼ “Mbala ketshi, lakakâdiɛ dui dia diambo efula diakate Yeso lo Joani 17:3, lɛnɛ atoshikikɛnde ɔnɛ mbeka dia mbaeya, nde la She, kɛdikɛdi lɔsɛnɔ la pondjo. Koko, anto efula fɔnyaka ɔnɛ paka l’olongo mbayototonga la lɔsɛnɔ la dimɛna efula. Wɛ afɔnyayɛ? [Tolonge okadimwelo.] Nte kɛnya avɛsa amɔtshi wa lo Bible wɛnya ɔnɛ Paradiso kayonga nto lanɛ la nkɛtɛ, kana dibuku diakamakotshikɛ diekɔ suke lango. [Tɔkɛtshanya la nde l’odingɔ 11-16 lo lɛkɛ 9-10 la dibuku Ewo.] Mbala kayaye, layokɛnya bonde kakokayɛ mendɛ l’alaka asɔ wa lo Bible. Lo dimi toyaka, onde wɛ hokoka mbala tshapita 2 lo dibuku diayɛ?”
4 Sawo dimɔtshi nɛ diokoki sungana naka tambohomana l’onto lasambɛ:
◼ “Tekɔ lo sawola l’asukanyi aso dia bonde kɛnaso ɛtɛmwɛlɔ efula wotshikitanyi l’andja nganɛ. Paka l’États-Unis oto, ɛtɛmwɛlɔ wekɔ yɛdikɔ ya 1200, ndo wekɔ ndekana 10000 l’andja w’otondo. Koko, Bible kekɔ paka ɔtɔi. Bonde kambofulanɛ ɛtɛmwɛlɔ ngasɔ na? [Tolonge okadimwelo. Tofole dibuku Ewo lo tshapita 5 ko sho mbala odingɔ 1.] Wɛ ayokondja ekadimwelo w’ɛlɔlɔ lo wembola ɛsɔ naka wɛ mbala tshapita nyɛ. Layɔngɛnangɛna kotshikɛ dibuku nɛ naka wɛ nangaka diala.” Naka ɔtɛkɛtshi aso ambɔsa, tolakane la nde dimɛna ko sho ndihiya la mbuta ɔnɛ: “Mbala kayaye, ondo sho kokaka ndjenda dia kana ɛtɛmwɛlɔ tshɛ wekɔ paka mboka yotshikitanyi yatɔla otsha lo dihole diakɔ diâmɛ.”
5 Lam’ayotoya nto dia ndjotetemala la sawo dia mbeya bonde kele ɛtɛmwɛlɔ efula nganɛ, sho kokaka mbuta ɔnɛ:
◼ “Mbala ka komelo kakatɛnana, lakoke dimbola dia mbeya kana ɛtɛmwɛlɔ tshɛ wekɔ paka mboka yotshikitanyi yatɔla otsha lo dihole diâmɛ. Wɛ akanayɛ? [Tolonge okadimwelo.] Nte kɛnya lo dibuku diakamakotshikɛ kɛnɛ kakate Yeso lo dikambo sɔ. [Tofole dibuku Ewo lo tshapita 5 ko sho mbala odingɔ 6-7 lɛnɛ ele ɛtɛkɛta wa lo Mateu 7:21-23.] Ondo wɛ ndjambolaka bonde kele ekɔ ohomba efula mbeya lolango la Nzambi mɛtɛ. Wɛ ayɛna dia edingɔ wayela wekɔ l’awui efula w’ohomba. Ala etenyi kotshikadi ka tshapita nyɛ, naka wɛ nangaka; ko lam’ayomoya nto, layɔngɛnangɛna dia ndjokɛnya ohomba w’ewo k’oshika ka Bible.”
6 Mbɔtwɛlɔ ka lo sawo ka tshena pe tongaka dimɛna efula dia tatɛ mbetsha anto Bible. Mbɔtwɛlɔ kayela kɛnɛ kakɔsama oma lo lɛkɛ 12 la dibuku “Comment raisonner”:
◼ “Lamboya a ndjokenda dia ndjoketsha Bible la ngelo ofele. Naka wɛ nangaka, kete dimi kɛ̂nya lo tshenyi ya wonya woho wasɛdingola anto Bible lawakawɔ kâmɛ la nkumbo yawɔ lo wedja oko 200. Sho kokaka sawola l’ɔtɛ a dui walangayɛ. [Towɛnya ɛtɛ w’awui wofundami lo dibuku Ewo.] Onde ɔmɔtshi woleki kotola yambalo yayɛ wekɔ?” Tôtshike asɔnɛ. Tofole dibuku lo tshapita yakotola yambalo yande ko sho tatɛ wekelo oma l’odingɔ wa ntondo.
7 Yoho mɔtshi ya tshena pe nyɛ yokokiso pemba dia tatɛ mbeka l’anto Bible:
◼ “Dimi mbetshaka anto Bible ofele ndo leke la dihole lo ekongelo kami ka wonya dia kotsha ambeki akina nto. Dimi kambaka la dibuku nɛ. [Towɛnya dibuku Ewo.] Wekelo akɔ mbiviyaka ngɔndɔ ngana tsho ndo mbishaka ekadimwelo lo wembola wele oko: Lande na katshika Nzambi asui? Lande na katshundaso ndo kavɔso? Ngande wele wakiso wa ngandji wakavu? Kana nto: Ngande wokokiso ndjasukanya le Nzambi?” L’ɔkɔngɔ towombole ɔnɛ: “Kokaka dimi kɛ̂nya woho wasalema wekelo akɔ?” Naka onto akɔ hangɛnangɛna wekelo, towombole dia kana nde nangaka kondja dibuku Ewo dia nde dialaka ndâmɛ. Naka nde ambota ɔnɛ ayodiala, tɔlɛkɛ dimɔtshi ko sho mbotɛ oshinga wa nshi nyɛ.
8 Ande ɛngɔ k’oshinga wolo kele la onto lele l’ewo k’oshika ka Nzambi ndo ka Kristo lee! Mbeka dia mbaeya kɛdikɛdi mɛtɛ lɔsɛnɔ la pondjo laha l’ekakatanu. Lo ngɔndɔ ka Diɛla Woke, tokambe la waaso tshɛ dia mbewoya akina ewo katɔla otsha lo lɔsɛnɔ lɔsɔ.