Onde Nyeke Ɛhɔmbɔ Wa Mbekelo Mɔtshi Y’ashidi?
1 Yeso Kristo akate ate: “Nyu nyayeya akambu wa mete, ku akambu wa mete wayunyutshungula.” (Joa. 8:32) Eelo, akambo wa mɛtɛ tshungolaka onto. Vɔ tshungolaka onto oma lo dikanyikanyi la wetshelo wa kashi, elongamelo w’anyanya ndo oma lo etsha wa sɔnyi. Koko, oko akadiasalemaka lo nshi ya ntondo, nshi nyɛ Akristo sɛngiyamaka hakoke dia vɔ kalola lo mbekelo mɔtshi y’ashidi.—Ngal. 4:9.
2 Naka onto ambɔsa yɛdikɔ ya koma Ɔmɛnyi wa Jehowa, kete nde ambosuya ɔnɛ Bible ekɔ mɛtɛ Dui dia Nzambi. (2 Tim. 3:16) Sho mbeyaka nto ɔnɛ Bible tɔlɔmbaka dia sho sala etshikitanu wa mamba dia ngɛnyangɛnya Otungi aso. (Kol. 3:9, 10) Sho tshɛ pombaka sala etshikitanu ɛsɔ, oyadi woho akɔna wa lokoho la demba lele laso, wodja aso, kabila kaso kana dioho diaso, nɛ dia Bible shikikɛka ɔnɛ sho tshɛ takotɔ lo pɛkato. (Romo 3:23) Lam’ele sho bu kokele ndo takole lo ditshelo, lo mbekelo ndo lo wetshelo w’oma lo shɛngiya ya pɛkato ndo ya nzambi ka dikongɛ nɛ di’akambo, sho la dia sala etshikitanu efula.
3 Etshikitanu ɛsɔ nɔmbaka dia sho tshika etsha ndo mbekelo tshɛ yahɔtɔnɛ la wetshelo wa Dui dia Nzambi. Oma lo yɛdikɔ shɔ yayotɔsa, sho mbeyaka sɔkama kana petshama oma le anto wahasangi la so ɔtɛmwɛlɔ. Dikambo sɔ ndeka salema l’Afrika lɛnɛ ele mbekelo efula yendana l’osalelo w’otanda, ohandjolelo wa sandja ndo okundelo. Naa ditshelo dimɔtshi diokoki nɛmbia mbetawɔ k’Akristo na?
4 Alelo: Lo ndjela dikisiɔnɛrɛ dimɔtshi, “ndela” kɛdikɛdi “kɛdja asɔyi, kiyana oma l’oshishelo wa, nyanga efula.” Onde kokaka mɛtɛ nshimba onto kɛdja asɔyi kana kiyana l’etena kambondohomɔ mpokoso? Onto mbeyaka ndela nɛ dia kɔlɔ yande kana kandji ka lo demba. Ndela ekɔ saki kɛmɔtshi ka lôtɔ katotutshaka kandji kele l’onto tena dimɔtshi. Lo ndjela Afundelo, kema kɔlɔ ndela, kɛdja asɔyi kana kiyana, kânga ndela efula, etena kavɔ onto ɔmɔtshi lalangayɛ.—2 Sam. 1:11, 12; 18:33; Joa. 11:35.
5 Ko lo ndjela mbekelo y’ashidi, ngande watowolelaka wanɛ wambovɔ? Kam’alongolawɔ losango ɔnɛ onto ambovɔ lo nkumbo kawɔ, anto pombaka kolola ahɔndɔ wa pudipudi ko ndɔta ahɔndɔ wa mindo. Amato pombaka minya avo ko tatɛ mbida ekoko dia mɛnya lonyangu lawɔ lo sɛkɛ. Mbala mɔtshi, vɔ tolelaka wemba nkembo yele la wetshelo wa kashi, oko dietawelo di’ɔnɛ anima havu. Amɔtshi totɛka odo di’aha nde mbaohɛ ndo dia nde menda woho wambowonyanga dia nyɔi kande. Naka nde akatshike ana, kete wowombola onto lotondatshike nkumbo kande. Naka sho sɛdingola ɛtɛkɛta ɛsɔ, kema vɔ wekɔ lo nɔmba odo dia nde kimanyiya nkumbo kande? Lonyangu ko, ndo apandjudi wakayikimɔ le Nzambi ndo wakabatizama totaka ɛtɛkɛta wa ngaso nɛ dia vɔ mɛnaka ndo mbokaka anto akina wata. Lo nkembo yakɔ shɔ, amɔtshi tomɛka ase nkumbo akina wakavu awui.
6 Onde Okristo kokaka sala awui wa ngasɔ ko Jehowa ngɛnangɛna? Dui dia Nzambi hadiote ɔnɛ onto ekɔ l’anima wahavu. (Ezek. 18:4) Omalɔkɔ, Okristo hakoke mbutɛ odo awui kânga memba lo delo nkembo yasukɛ kanyi y’ɔnɛ anima havu. Mɛtɛ, kema kɔlɔ mboka kandji ndo hatokoke mboka sɔnyi dia kiɛnya. Nyɔi k’onto lalangaso ekɔ nshi tshɛ oshishelo wa mamba, watonyangiya heyama. Koko, sho hatokesama l’eshimu wata ɔnɛ onto ekɔ l’anima wahavu kana ɔnɛ nde tetemalaka la sɛna l’“andja okina.” Diɔ diakɔ diakokaso nyanga, koko aha oko anto waha l’elongamelo.—1 Tes. 4:13.
7 Olalelo wa l’Odo: Le anto efula wa l’andja, mbekelo ya l’etanda yekɔ hangɔnɛ. Wanɛ wele l’otanda ndalaka otsho w’otondo lɛnɛ oshimbewɔ odo, kânga nshi efula, l’andja lo seka dia dja yatshutshuyama wonya tshɛ. Nkumbo, angɛnyi, asukanyi ndo kânga anto waki kômbeya lam’akinde la lumu, tshumanaka dia mpotoya l’odo polo la pindju. Otshumanelo ɔsɔ mbiviyaka edja tshɛ kakawoshimbe, djekoleko naka odo aki onto la woke. Tena dimɔtshi, ase nkumbo kande tɛkɛtaka la ntondo kande dia mɛnya ɔnɛ aha vɔ mbôdiaki. Akambo efula watosalaka apanganu mbeyaka salema. Wanɛ wasala akambo akɔ mbâsalaka tena efula la wɔma w’odo, dia ‘mbɛ̂nya’ woho wakawôlangaka ndo woho wambowonyanga la dia nyɔi kande. Ko dionga diakɔna diahomba monga l’onto lalanga ngɛnyangɛnya Otungi ande na?
8 Dui dia Nzambi mbutaka ɔnɛ wanɛ wambovɔ bu la lɔsɛnɔ, hawokoke mɛna, hawoke, hawɔtɛkɛta kana kanyiya. (Und. 9:5, 6, 10) Lâsɔ vɔ hawokoke fukutanya wanɛ wasɛna. Vɔ hawodjasɛ l’omamu wa demba diawɔ, lo mendaka kɛnɛ kayowosala la diɔ. Lam’ele sho mbeyaka ngasɔ, bonde kahatatshike shambu ya ndala l’edo? Mɛtɛ, vɔ ndalaka l’odo l’ɔkɔkɔ wa kimanyiya ɔnɛ lovwe dia nde “pandjola diombo” ko mbeta otsha le akina wakavu ntondo. Shi ndjela mbekelo ya ngasɔ ekɔ tɛmɔla wanɛ wambovɔ?
9 Anto amɔtshi wakalange mbeya dia kana ekɔ kɔlɔ ndala l’odo aha sala sɛlɛmɔnyi la mbekelo kina. Tɔshi oko onto ambovɔ la lopitadi, onde hatokoke ntshɔ la nde mbala kakɔ ɔtɔi otsha la waombo? Ayotokondja lo ndjɛmbana l’odo ande oya la ngelo? Ko naka onto ambovɔ lakande, bonde kahatokundɛ esadi eto? Ntshɔ l’odo mbala kakɔ ɔtɔi otsha la waombo ekɔ dikambo dia dimɛna efula. Aha paka l’ɔnɛ kele hatosambiyama hemɔ yande, koko dikambo sɔ tokimanyiyaka nto di’aha sho mboshimbɛ ko ndjosala wa sɛlɛmɔnyi. Naka tekɔ lo ngelo yahawonyi kotsha awui amɔtshi wa lɛɛta, bonde kahatakundɛ odo la dikɔlɔ dia lushi lakandavwe na? Tôhɔ dia kânga odo wa Yeso kondala. Ɔnkɔnɛ, oyadi kânga mbekelo yakɔna yele l’etenyi ka ngelo kana ya lo wodja, sho nangaka nɛmiya Jehowa, ɔnɛ lakatotondja oma lo wodjima, lo tshika ditshelo tshɛ diendana l’ɔtɛmwɛlɔ wa wanɛ wambovɔ.
10 Onto mbeyaka mvɔ la dikɔlɔ ko heyama mbokundɛ ko lushi lakɔ. Naka nyekɔ l’osomba, kete ayoleka ɔlɔlɔ ndo nyayolama pudipudi naka nyu momba odo lo frigo k’edo (morgue). Naka tɔ bu, kete nyu kokaka nɔngɔsɔla elui efula w’anangɛso wayâmuyanaka l’otsho dia nama odo. L’etena ka ngasɔ, anangɛso pombaka mbɔsa tɛdikɔ ta wolo di’aha anto wa l’andja ɔnɛ ndjosala mbekelo y’ashidi l’odo. Mikaɛlɛ, owandji wa andjelo, kotshika Diabolo dia nde kɛnya l’odo wa Mɔsɛ.—Jude 9.
11 Nto, sho mbeyaka monga lam’akundɛwɔ ombutshi ɔmɔtshi waki komonga ɔtɛmɔdi wa Jehowa. Naka sho mbele l’ɔkɛndɛ wa nɔngɔsɔla awui w’okundelo ande, kete hatotetawɔ dia vɔ sala ɔtɛmwɛlɔ wa wanɛ wambovɔ. Koko, naka aha sho mbele l’ɔkɛndɛ, kete hatokoke mbâfundɛ dia vɔ ndjela ɛlɛmbɛ wa lo Bible.
12 Dikila, Onde Pombaka Futa? Tena dimɔtshi, mbekelo nɔmbaka ɔnɛ onto afute dikila. Otshelo ɔsɔ mɛnyaka ɔnɛ onto lalɔmbawɔ dikila mbôdiaki. Koko, Dui dia Nzambi mɛnyaka ɔnɛ nyɔi ndja oma lo pɛkato k’Adama. Omalɔkɔ, ndoko Okristo w’oshika wahomba ndjela mbekelo ka ngasɔ. (Romo 5:12) Mɛtɛ, ase nkumbo kaso mbeyaka mɛna ɔnɛ tekɔ lo sala kɔlɔ, koko sho pombaka monga nge ndo ndɔshana la wekamu tshɛ w’oma le ase nkumbo.—Mat. 10:35-37.
13 Sho kokaka ntshɔ dia tenda wanɛ wele l’otanda dia mbâsamba. Tena dimɔtshi, sho mbeyaka kimɔ yema ya dikuta dia somba dibaya kana dihɔndɔ dia mbokundɛ, kana dia tshima diombo. Ɔsɔ ekɔ dui dia dimɛna. Koko, sho pombaka ndjashikikɛ ɔnɛ dikuta diokimweso hadiotɔtɔ lo sala wa sɛlɛmɔnyi y’apanganu. Diɔ diakɔ diele ndeka ɔlɔlɔ sho mbisha ɔnangɛso kana kadiyɛso kovushisha dikuta diaso l’omamu sho la nde ato.—Mat. 6:2-4.
14 Wɔ̂tshɛlɔ: Lo mbekelo mɔtshi vɔ mbɔsaka onto lovushisha omi kana wadi ɔnɛ nde ekɔ mindo. Lo ndjela mbekelo shɔ, onto akɔ hakoke mbɔka l’edja ka nshi mɔtshi, kânga ngɔndɔ mɔtshi. Nde hakoke sakola divo diande ndo nde pombaka ndɔta pidi. La ntondo ka nde ndjɔsɛna oko anto tshɛ, vɔ pombaka ‘mbɔ̂tsha.’ Lushi la lawɔ̂tshawɔ, vɔ mbonyaka divo ndo mbɔ̂lɔtshaka ahɔndɔ wa wɛma. Mbala mɔtshi, vɔ nɔmbaka wadi aki odo dia nde mbeyana l’ɔnango omɛnde ɔmɔtshi kana owotɔ okina waki diɛwɔ. Paka l’ɔkɔngɔ wa sɛlɛmɔnyi shɔ mbokokinde kondja dikimɔ dia tshukama nto. Otshelo ɔsɔ wasalema ndo le apami, mbɔsamaka oko ɔnɛ wambɛdia wadi aki odo kana omi aki odo oma lo “okishi” wa diɛwɔ. Ko tete le, oko akadiɛnya nkumekanga Davidi, l’etena katata onto mbokokiso ndjakiyanya lo dikambo diande koko aha l’etena kambondovɔ. (2 Sam. 12:21-23) Omalɔkɔ, sho pombaka ndjatshikitanya l’ase andja ɔnɛ lo tshika mbekelo ya mbɔtshanya.—Ef. 4:17, 18.
15 Wodjelo wa Sima lo Diombo la Awui Watowotɛka Wanɛ Wambovɔ: Lo wodjelo wa sima lo diombo vɔ tosalaka nto wa sɛlɛmɔnyi kina y’apanganu. La ntondo ka mbôkundɛ, tena dimɔtshi vɔ totɛka onto lambovɔ ɔnɛ: “Luudu layɛ lɔ lɔnɛ. Tambokɔlɔmba kakianɛ dia wɛ mbidjasɛ lanɛ.” Lam’ele wanɛ wambovɔ hawoke ndo haweye ndoko dui, Akristo wa mɛtɛ hawohombe ndjela mbekelo ya mbutɛka wanɛ wambovɔ awui. (Und. 9:5, 6) Naka Okristo amboyela mbekelo kɛmɔtshi kendana l’ɔtɛmwɛlɔ wa wanɛ wambovɔ ko nde hayatshumudi, kete nde kokaka mbitshanyema oma l’etshumanelo nɛ dia ɔsɔ ekɔ ɔtɛmwɛlɔ wa dikishi.—1 Kor. 5:11; Euh. 18:10, 11.
16 Tonge l’elongamelo ka eolwelo ka wanɛ wambovɔ ndo totshike sala mbekelo ya l’andja ɔnɛ wele lo wodjima. Tohetsha kɛnɛ tshɛ kahangɛnyangɛnya Jehowa. (Heb. 1:9) Dikambo sɔ diayotokokɛ lo tena di’ehemba. Totshikale lo dihole di’ekokelo dia lo nyuma diaki Jehowa lo tshika sala mbekelo y’ashidi yahɔtɔnɛ l’Afundelo. Ɔsɔku mbayotetawɔma le Jehowa, Nzambi k’akambo wa mɛtɛ.—Osam. 31:5.