Toyasha Le Elonganyi Wele Bu Ɛmɛnyi
1 Ande ɔlɔ dia mɛna atshukanyi wokakatanyi kamɛ l’ɔtɛmwɛlɔ wa mɛtɛ lee! Koko, lo nkumbo efula paka olonganyi (conjoint) ɔtɔi oto mbaketawɔ mboka k’akambo wa mɛtɛ. Ngande wakokaso sala dia ndjasha le elonganyi wele bu Ɛmɛnyi ndo mbâkeketsha dia vɔ kambɛ Jehowa kamɛ la so na?—1 Tim. 2:1-4.
2 Towaoke: Mɛtɛ, elonganyi ɛmɔtshi wele bu Ɛmɛnyi tonaka akambo wa mɛtɛ. Koko, tena efula, dikambo sɔ totombaka oma lo wendjodi kana hatoke tokanyi tawɔ. Ɔmɔtshi mbeyaka ndjaoka oko onto laheyama kana mboka kandjema nɛ dia olonganyi ande oyasha l’awui wa lo nyuma w’eyoyo. Pami kɛmɔ ekɔ lo mbohɔ ate: “Dimɛ l’atei a luudu, lakayaokaka oko onto lambokalema.” Okina akate ate: “Lakɛnyi oko wadiɛmi l’ana ami wambɔsɛka.” Apami kokaka kanyiya ɔnɛ vɔ wamboshisha nkumbo kawɔ l’ɔkɔkɔ w’ɔtɛmwɛlɔ. (Enda lo Tshoto y’Etangelo ya Ngɔndɔ k’Enanɛi 15, 1990, lɛkɛ 20-3.) Diɔ diakɔ diele ndeka dimɛna, kotola omi lo sawo kam’atatɛ wadiɛnde mbeka Bible naka kokaka.
3 Tokambe Kamɛ: Pami kɛmɔtshi la wadiɛnde, vɔ tshɛ Ɛmɛnyi, wakakambe kamɛ dimɛna ko wakakimanyiya atshukanyi efula dia vɔ ndjela akambo wa mɛtɛ. Kam’akamɛ kadiyɛso mbeka la omoto ɔmɔ Bible, ɔnangɛso akatshɔka dia tenda omɛnde. Tena efula nde akakokaka tatɛ mbeka l’omi lo yoho shɔ.
4 Tonge la Yimba ya Lɔngɛnyi ndo ya Nangaka Anto: Nkumbo ya l’etshumanelo kokaka kimanyiya nkumbo yahatonge kamɛ l’ɔtɛmwɛlɔ wa mɛtɛ lo ndjashaka le wɔ. Naka sho tshɔka yema dia towaenda lo lɔngɛnyi, kete olonganyi wele bu Ɔmɛnyi ayɛna ɔnɛ Ɛmɛnyi wa Jehowa wekɔ la wangasanu, ndo vɔ wekɔ Akristo wadja anto yimba ndo weya wahɔ wa anyawɔ anto.
5 Tena la tena, dikumanyi kokaka vusolaka weolo womawɔ la mbidja dia ndjasha le elonganyi wele bu Ɛmɛnyi ndo mbeya kakɔna kahomba nɔngɔsɔma nto dia vɔ koma ekambi wa Jehowa.—1 Pet. 3:1.