Soko Dia Woke Dia Ntsha Olimu Diambodihɔ
1 Paulo, osambisha w’ohetoheto wa lokumu l’ɔlɔlɔ, akayange mbilo (territoires) yaki l’ohomba efula w’osambisha. Osomba w’Ɛfɛsɔ aki ɔtɔi ɔmɔtshi a l’atei ayɔ. Paulo akakondja etombelo w’ɔlɔlɔ efula lɛkɔ ko nde akafundɛ anyande Akristo ate: ‘Soko dia woke diambodihwamela dia dimi ntsha olimu.’ (1 Kor. 16:9) Nde akatetemala kamba lo mbilo kɛsɔ ndo akakimanyiya Ase Ɛfɛsɔ efula dia vɔ koma ambetawudi.—Etsha 19:1-20, 26.
2 Ɛlɔ kɛnɛ, soko dia woke diakatodihwamɛ dia ntsha olimu. Wambotelɛ dia sho kimanyiya tshumanelo diahakoke manyamanya mbilo kawɔ ɔnɔnyi tshɛ. Ɔnkɔnɛ, oma lo weolo aso sho koka shidiya ohomba wele lo tenyi dimɔtshi dia nkɛtɛ.—Enda lo 2 Koreto 8:13-15.
3 Onde Sho Kokaka Kamba Lɛnɛ ele Ohomba Efula w’Apandjudi? Onde tambokanyiyaka lo dɔmbɛlɔ dikoka dia kamba dihole dikina? Ondo etshumanelo kɛmɔ ka l’osomba aso kekɔ l’ohomba w’ekimanyielo. Tote omendji w’otshimbedi dikambo diakɔ ko nde ayotosha tokanyi. Mbeyaka monga nto ko lo mbilo k’etshumanelo kaso shamɛ, anto wahoke dimɛna wekɔ kana wanɛ weya paka ɔtɛkɛta w’angɛndangɛnda ko ndoko onto lambâkimanyiya. Shi ekɔ ɔlɔlɔ sho sala la wolo dia mbeka ɔtɛkɛta awɔ dia sho mbasambisha? Ndo nto, ondo mbeyaka ndjâla ko olui ɔmɔtshi kana etshumanelo kɛmɔtshi ka l’ɔtɛkɛta w’angɛndangɛnda kosukanyi la so, ‘kambɔlɔmba Nkumadiɔndjɔ dia kondja ekambi wa Diolelo efula.’ (Mat. 9:37, 38) Naka ɔsɔku mbediɔ, onde hatokoke kikimanyiya?
4 L’ɛnɔnyi wetshi ɛnɛ, nkumbo nunu y’Akristo yakônɔ otsha lo wedja ekina dia tokamba efula l’olimu wa dinela. Wadi l’omi amɔtshi wakasale ngasɔ wakate vate: “Takakombolaka kambɛ Jehowa lɛnɛ akatakoke monga ohomba efula.” Naka sho nangaka monɔ otsha lo ngelo kɛmɔtshi lo wodja aso ko kana tekɔ l’akoka wa tokamba lo wodja okina, kete tosawole ntondo la dikumanyi dia l’etshumanelo sangwelo diaso.
5 Naka wɛ nangaka mumbola la Société ahole wele ohomba efula w’apandjudi, kete funda awui tshɛ walangayɛ lo tshena pe lo mukanda ko wɛ mbisha kɔmite k’olimu ka l’etshumanelo kanyu. Vɔ wayokotsha kɔmatɛrɛ mɔtshi lɔkɔ ko vɔ tomɛ la Société mukanda ayɛ. Oyadi kakɔna tshɛ, ndo l’edja tshɛ kayotshikalaka soko dia woke hwe dia sho kamba olimu, nyɛsɔ sho tshɛ tongake nshi tshɛ la lotumu efula l’olimu wa Jehowa.—1 Kor. 15:58.