Sho Koka Ntsha Elimu Woleki Weke
1 Olimu wa Yeso Kristo wakeyamaka oma l’akambo wa mamba wakandatshe. Nde akalesha nunu di’anto lo dihindo, akakɔnɔla efula kawɔ ndo akôlola amɔtshi. (Mat. 8:1-17; 14:14-21; Joa. 11:38-44) Olimu ande akakotola yambalo ya wodja w’otondo. Koko, la dikɔlɔ di’ekomelo la ntondo ka nde mvɔ, nde akatɛ ambeki ande wa kɔlamelo ate: “One lambetawo, ndu ndi ayutsha elimu watumutshaka. Ndu elimu wuleki ene mbayundutsha.” (Joa. 14:12) Ngande wokokiso ntsha elimu ‘woleki weke’ na?
2 Lo Kindjakindjaka Efula lo Mbilo: Olimu wa Yeso wakahembetɛ la Palestine; koko, nde akatɛ ambeki ande wa ntondo dia vɔ ndjâla ɛmɛnyi ande ‘polo ndo lo koma ya nkɛtɛ,’ kɛdikɛdi lɛnɛ anganyi etale efula la ngelo yakandasambisha ndamɛ. (Etsha 1:8) Olimu w’esambishelo wakandahɔhɔla wambokambema ɛlɔ kɛnɛ l’andja w’otondo, lo wedja 232. (Mat. 24:14) Onde wɛ kambaka olimu akɔ woho wahombama lo kindjakindjaka mbilo kakawasha etshumanelo kanyu?
3 Lo Sambishaka Anto Efula: Ambeki wakatshike Yeso dia vɔ tetemala l’olimu w’esambishelo waki yema tshitshɛ. Koko, oma l’esambishelo kawɔ ka l’ohetoheto, anima oko nunu sato waketawɔ sɔlɔ ndo wakabatizama lushi la Pɛntɛkɔsta lo 33 T.D. (Etsha 2:1-11, 37-41) Otshumanyelo a wanɛ ‘wasungana la lɔsɛnɔ la pondjo’ wekɔ lo tatetemala lo nshi yaso nyɛ, ko yɛdikɔ y’anto 1 000 wekɔ lo batizama lushi tshɛ. (Etsha 13:48) Onde wɛ ekɔ lo ntsha tshɛ kokokiyɛ ntsha dia sambisha anto w’etema ɔlɔlɔ l’ahole tshɛ wewɔ ndo nomialomia saki kawɔ esadi esadi?
4 Lo Sambishaka Edja Efula: Olimu wa Yeso wa lanɛ la nkɛtɛ akaviya paka ɛnɔnyi esato l’etenyi eto. Efula l’atei aso tambosambisha edja efula ndeka lâsɔ. Oyadi wayototshika dia tetemala l’olimu ɔsɔ kana bu, sho ngɛnangɛnaka dia kimanyiya ambeki w’eyoyo dia vɔ mbɔtɔ lo mboka katɔla otsha lo lɔsɛnɔ. (Mat. 7:14) Onde sho mongaka la lotumu efula la kamba ngɔndɔ tshɛ l’olimu wa Nkumadiɔndjɔ?—1 Kor. 15:58.
5 Sho kokaka monga l’eshikikelo ɔnɛ l’ekimanyielo ka Yeso, tayotetemala la ntsha elimu woleki weke oko weso ambeki ande w’eshika.—Mat. 28:19, 20.